உதகையில் கோர விபத்து: சுக்கு நூறாக சிதறிய அரசுப் பேருந்து; உடல்களை மீட்பதில் சிக்கல்

உதகை:
ஊட்டியில் இருந்து மேட்டுப்பாளையம் நோக்கி சென்று கொண்டிருந்த
அரசுப் பேருந்து உதகை - குன்னூர் சாலையில் மந்தாடா அருகே
50 அடி பள்ளத்தில் விழுந்து விபத்துக்குள்ளானது.

வளைவில் திரும்பும் போது கட்டுப்பாட்டை இழந்து பேருந்து பள்ளத்தில்
கவிழ்ந்ததாகவும், மழை காரணமாக எதிரே வந்த பேருந்துக்கு வழி
விடும் போது விபத்து நேரிட்டதாகவும் நேரில் பார்த்தவர்கள்
கூறுகிறார்கள்.

பள்ளத்தில் கவிழ்ந்த அரசுப் பேருந்து சுக்கு நூறாக சிதறியுள்ளது.
பேருந்தின் ஒவ்வொரு பாகமும் பல இடங்களில் சிதறி விழுந்துள்ளது.
விபத்தில் சிக்கிய பேருந்தில் சுமார் 45 பயணிகள் இருந்ததாகக்
கூறப்படுகிறது.

விபத்து நிகழ்ந்த இடத்தில் 7 பேரின் உடல்கள் கண்டெடுக்கப்பட்டது.
4 பேரின் உடல்கள் உதகை அரசு மருத்துவமனைக்கு பிரேத
பரிசோதனைக்காக கொண்டு வரப்பட்டுள்ளது. பேருந்து விழுந்த
இடம் மிக மோசமான பள்ளம் என்பதாலும், மழை பெய்து
கொண்டிருப்பதாலும் மேலும் மூவரின் உடல்களை சாலைக்குக்
கொண்டு வருவதில் தாமதம் ஏற்பட்டுள்ளது.

விபத்தில் படுகாயமடைந்த 3 பேர் மேல் சிகிச்சைக்காக கோவை
அரசு மருத்துவக் கல்லூரிக்குக் கொண்டு செல்லப்பட்டுள்ளனர்.

தீயணைப்புத் துறையினரும், காவல்துறையினரும் மீட்புப் பணியில்
ஈடுபட்டிருந்தாலும், மழை மற்றும் போதிய வசதி இல்லாததால்,
மீட்புப் பணிகளில் தாமதம் ஏற்பட்டு வருகிறது.

அதோடு, பேருந்தின் பாகங்கள்,இ பல்வேறு பகுதிகளில் சிதறிக்
கிடப்பதாலும், பல இருக்கைகள் புதர்கள் இருக்கும் இடங்களில்
விழுந்திருப்பதாலும் தேடுதல் பணி தீவிரப்படுத்தப்பட்டுள்ளது.

இதனால் பலி எண்ணிக்கை மேலும் அதிகரிக்கும் என்று
அஞ்சப்படுகிறது.
-
-----------------------------
தினமணி