காற்றழுத்தம் மேலும் தீவிரம் அடைகிறது புதிய புயல் சின்னத்தால் குமரிக்கு மீண்டும் ஆபத்து?

சென்னை:
வங்க கடலில் நிலை கொண்டுள்ள புயல் சின்னத்தால் குமரி
மாவட்டத்துக்கு ஆபத்து ஏற்பட்டுள்ளதா என்பது குறித்து
வானிலை ஆய்வாளர் விளக்கம் அளித்துள்ளார்.

இலங்கை அருகே தென்மேற்கு வங்க கடலில் திடீரென கடந்த
வியாழக்கிழமை குறைந்த காற்றழுத்த தாழ்வு நிலை உருவானது.

இது மேலும் வலுப்பெற்று குறைந்த காற்றழுத்த தாழ்வு பகுதியாக
மாறியது. இதன் காரணமாக கன்னியாகுமரி, ராமநாதபுரம்
மாவட்டத்தை சேர்ந்த மீனவர்கள் கடந்த 5 நாட்களாக மீன்பிடிக்க
செல்லவில்லை.

நேற்றிரவு குறைந்த காற்றழுத்த தாழ்வு மண்டலமாக வலுப்
பெற்றது. இதனால் குமரி கடல் பகுதியில் மீண்டும் புயல்
உருவாகும் அபாயம் ஏற்பட்டுள்ளது.

இதுகுறித்து வானிலை ஆராய்ச்சியாளர் ஒருவர் கூறியதாவது:

தென்மேற்கு வங்க கடலில் உருவான காற்றழுத்த தாழ்வு நிலை
படிப்படியாக வலுவடைந்து நேற்று தீவிர காற்றழுத்த தாழ்வு
பகுதியாக மாறியுள்ளது. அடுத்தடுத்து தீவிர காற்றழுத்த தாழ்வு
மண்டலமாகவும் மாறும்.

இதுவே புயலுக்கான அறிகுறி தான். ஓகி புயல் ேபான்று தற்போது
குமரி கடல் அருகே மீண்டும் ஒரு புயல் ஏற்பட அதிகம் வாய்ப்புள்ளது.
ஆனால் இந்த புயல் கரை பகுதி அருகே வராமல் கடலுக்குள்ளேயே
தொலை தூரத்தில் நகர்ந்து அரபிக்கடலுக்கு செல்லும்.

ஓகி புயல் கரைக்கு மிக அருகே நகர்ந்து சென்றதால் தான் அதிக
பாதிப்பு இருந்தது. இருப்பினும் காற்று பலமாக வீசும் என்பதால்
மக்கள் எச்சரிக்கையுடன் இருக்க வேண்டும்.

புயல் சின்னம் குமரி கடலை கடந்து சென்ற பிறகு, காற்றின் இழுப்பு
காரணமாக உள்மாவட்டங்களில் அதிக மழை பெய்யும் வாய்ப்புள்ளது.
தற்போது இலங்கைக்கு தெற்கு மாலத்தீவு, லட்சத்தீவு
பகுதியையொட்டி காற்றழுத்தம் நிலை கொண்டுள்ளது. இது மெல்ல,
மெல்ல வடமேற்கு திசையில் நகர்ந்து தென்கிழக்கு அரபிக்கடலில்
புயலாக மாறக்கூடும்.இவ்வாறு அந்த அதிகாரி கூறினார்.

இதற்கிடையில், புயல் சின்னம் காரணமாக நேற்று நெல்லை,
தூத்துக்குடி ஆகிய மாவட்டங்களில் சில இடங்களில் லேசானது
முதல் மிதமான மழை பெய்தது.

மணிக்கு 60 கி.மீ வேகத்துக்கு காற்று வீசும்:
இதுகுறித்து சென்னை வானிலை ஆய்வு மையம் இயக்குனர்
பாலச்சந்திரன் கூறுகையில், ‘வங்க கடலில் இலங்கை, குமரிக்கடல்
மற்றும் மாலத்தீவுகள் அருகே வலுவான குறைந்த காற்றழுத்த தாழ்வு
பகுதி நிலவுகிறது. அடுத்த 36 மணி நேரத்தில் தென்கிழக்கு அரபிக்
கடல் அருகே காற்றழுத்த தாழ்வு மண்டலமாக வலுப்பெறும்.

அந்த சமயத்தில் குமரி, மன்னார் வளைகுடா, மாலத்தீவு பகுதிகளில்
மணிக்கு 40 முதல் 60 கி.மீ வேகத்தில் காற்று வீசும்.
எனவே, மீனவர்கள் அடுத்த 3 தினங்களுக்கு கடலுக்கு செல்ல
வேண்டாம்’ என்றார்.
-
140 ஆண்டுகளுக்கு பிறகு முதல்முறை: புதிய புயல் அரபிக்
கடலுக்கு சென்றால் அது வரலாற்று நிகழ்வு ஆகும்.

ஏன் என்றால் கடந்த 140 ஆண்டுக்கு பிறகு தற்போது தான் முதல்
முறையாக மார்ச் மாதம் அரபிக்கடலில் புயல் ஏற்படுகிறது.
தமிழகத்தில் ஏற்கனவே கடந்த 2008ம் ஆண்டு மார்ச் மாதம்
இதுபோன்று புயல் சின்னம் ஏற்பட்டுள்ளது குறிப்பிடத்தக்கது.


----------------------------------
தினகரன்