சித்திரைத் திருவிழாவுக்குத் தயாராகும் மதுரை மீனாட்சிசுந்தரேசுவரர்

சித்திரைத் திருவிழாவை முன்னிட்டு மதுரை அருள்மிகு மீனாட்சிசுந்தரேசுவரர் திருக்கோயில் தேர்களைப் புதுப்பிக்கும் பணி வியாழக்கிழமை தொடங்கியுள்ளது.

அருள்மிகு மீனாட்சிசுந்தரேசுவரர் திருக்கோயிலில் சித்திரைத் திருவிழாக் கொடியேற்றம் வரும் 21-ஆம் தேதி (செவ்வாய்க்கிழமை) நடைபெறுகிறது. தொடர்ந்து 28ஆம் தேதி மீனாட்சியம்மனுக்கு பட்டாபிஷேகம், 29-ஆம் தேதி திக் விஜயம், 30-ஆம் தேதி அருள்மிகு மீனாட்சிசுந்தரேசுவரர் திருக்கல்யாணம் என விழாவின் முக்கிய நிகழ்வுகள் நடைபெறுகின்றன.

மே 1 ஆம் தேதி (வெள்ளிக்கிழமை) சித்திரைத் தேரோட்டம் மாசி வீதிகளில் நடைபெறுகிறது. இதையடுத்து தேரைப் புதுப்பிக்கும் பணிகள் வியாழக்கிழமை தொடங்கின.

தேரின் சக்கரங்களுக்கான ஹைட்ராலிக் பிரேக், அச்சு ஆகியவை சரிபார்க்கப்பட்டு, தேர்ச் சிற்பங்கள் வார்னிஷ் போன்றவற்றால் சுத்தப்படுத்தப்பட்டு புதுப்பிக்கப்படவுள்ளன.

மீனாட்சிசுந்தரேசுவரர் திருக்கோயில் தேர்கள் கீழமாசி வீதியில் உள்ள தேரடியில் நிலை நிறுத்தப்பட்டுள்ளன. அவற்றைச் சுற்றிலும் கண்ணாடிப் பேழைகள் அமைக்கப்பட்டு பாதுகாக்கப்பட்டுள்ளன.

தேர்களில் சுவாமி தேர் பெரிய தேர் என அழைக்கப்படுகிறது. இதன் உயரம், அகலம் 25 அடியாகும். தேரோட்டத்துக்காக இதில் கொடுங்கை பட்டறை எனும் முறையில் துணியால் ஆன கோபுர அமைப்பு, அலஞ்சாடி எனும் தொங்கும் அமைப்பு மற்றும் குதிரை சிற்பங்கள் பொருத்தி அழகுபடுத்தப்படும். அழகுபடுத்தப்பட்ட தேர் 45 அடி உயரமுடையதாக இருக்கும்.

அம்மன் தேரானது சிறிய தேர் என அழைக்கப்படும். இது தலா 20 அடி அகலம், உயரம் கொண்டது. தேரோட்டத்துக்காக அழகுபடுத்தப்படும் நிலையில் 40 அடி உயரமிருக்கும்.

தேரின் இரண்டாம் நிலையில் அரிய சிற்பங்கள் உள்ளன. கடந்த 300 ஆண்டுகளுக்கு முன் திருமலை நாயக்கர் மன்னர் காலத்தில் தேர்கள் வடிவமைக்கப்பட்டதாகக் கூறப்படுகிறது. கடந்த 20 ஆண்டுகளுக்கு முன்பு தேருக்கு நவீன இரும்புச் சக்கரங்கள் பொருத்தப்பட்டன. தேர் புதுப்பிக்கப்படும் நிலையில் அவற்றுக்கு 24 மணி நேர போலீஸ் பாதுகாப்பு வழங்கப்பட்டுள்ளதாக போலீஸார் தெரிவித்தனர்.
-
தினமணி