இந்தியாவிலும் 3-ல் ஒரு பங்கு செல்போன்கள் பயன்பாட்டில் இல்லை

புதுடெல்லி, நவ. 1-

இந்தியாவிலும் மூன்றில் ஒரு பங்கு செல்போன்கள் பயன்பாட்டில் இல்லை என்ற தகவல் வெளியாகி உள்ளது. உலகிலேயே செல்போன் பயன் படுத்துபவர்களின் எண்ணிக்கை இந்தியாவில்தான் அதிகம். ஒருவர் ஒன்றுக்கும் மேற்பட்ட செல்போன்களை வைத்திருப்பதில் அலாதி பிரியம் கொண்டவர்கள். இதனால்தான் செல்போன் விற்பனை இந்தியாவில் அதிகமாக உள்ளது.

உலக செல்போன் நிறுவனங்களின் முன்னணி சந்தையாக இந்தியா திகழ்கிறது. செல்போன் நம்பர்களை அடிக்கடி மாற்றும் மனோபாவமும் இந்தியர்களிடம்தான் அதிகம் காணப்படுகிறது. வைத்திருக்கும் செல்போன் நம்பர்களையும் முறையாக பயன்படுத்து வதில்லை. இதனால் சம்பந்தப்பட்டவர்களின் செல்போன் நம்பருக்கு தொடர்பு கொள்ளும் போது, “நாட்-இன்-யூஸ்” (பயன்பாட்டில் இல்லை) என்ற பதில் கிடைக்கும்.

புள்ளி விவரங்களின்படி இந்திய மக்கள் தொகையான 120 கோடி பேரில், 90 கோடி பேர் செல்போன் வாடிக்கையாளர்களாக உள்ளனர். ஆனால், அரசு வெளியிட்டுள்ள அதிகாரப்பூர்வ புள்ளி விவரப்படி 60 கோடி செல்போன் நம்பர்கள் மட்டுமே பயன்பாட்டில் இருக்கின்றன. மீதமுள்ள 30 கோடி செல்போன் நம்பர்கள் பயன்பாட்டில் இல்லை என்று தெரியவந்துள்ளது. அதாவது, மூன்றில் ஒரு பங்கு செல்போன் நம்பர்கள் பயன்படுத்தாமல், “மரண நிலை”யில் வைக்கப்பட்டுள்ளன.

இதற்கு வாடிக்கையாளர்களின் சூழ்நிலைகள் காரணமாக இருக்கலாம் என்று கூறப்படுகிறது.ஆயுள் முழுவதற்குமான திட்டத்தின் கீழ் பெறப்படும் செல்போன் நம்பர்கள்தான் அதிகளவில் பயன்படுத்தாமல் உள்ளன என்பது குறிப்பிடத்தக்கது.

இது பற்றி தொலைத் தொடர்புதுறை “டிராய்”க்கு (தொலைத் தொடர்பு ஒழுங்கு முறை ஆணையம்) எழுதியுள்ள கடிதத்தில், குறிப்பிட்ட காலத்துக்கு மேல் பயன்படுத்தாமல் உள்ள செல்போன் நம்பர்களை, அழித்து விட்டு அதே நம்பர்களை புதிய சிம்கார்டுகளில் ஏற்றி, புதிதாக பயன்பாட்டுக்கு விட வேண்டும் என்று பரிந்துரை செய்துள்ளது. இதன் மூலம், வருவாய் இழப்பு ஏற்படுவதை தவிர்க்க முடியும் என்றும் குறிப்பிட்டுள்ளது.

மாலைமலர்