மன்மத விளையாட்டில்- போலீஸ்

அப்துல்லாஹ் · அப்துல்லாஹ் Sat 25 Jun 2011 - 12:52

நெல்லை புதிய பேருந்து நிலையத்தில் குடிபோதையில் பெண்களை மானபங்கப்படுத்த முயன்ற காவல்துறை உதவி ஆய்வாளரைக் காவல்துறையினர் பிடிக்காமல் தப்ப விட்ட சம்பவம் நெல்லையில் மக்களிடையே அதிர்ச்சியை ஏற்படுத்தியுள்ளது.

நெல்லை புதிய பேருந்து நிலையத்தில் நேற்று முன்தினம் இரவு 7.30 மணி அளவில் அதிக கூட்டம் காணப்பட்டது. அப்போது தென்காசி பேருந்து நிறுத்தம் அருகே பேருந்துக்காக காத்திருந்த பயணிகள் நடுவே இருந்த நாற்காலியில் 40 வயது மதிக்கத்தக்க ஒருவர் வந்து அமர்ந்தார். அப்போது அவர் மிகுந்த போதையில் இருந்தார். அவர் அங்கிருந்த பெண்களிடம் ஆபாச சைகைகள் மூலம் முகம் சுளிக்க வைத்துக்கொண்டிருந்தார்.

இதற்கிடையில் அவர் அருகே அமர்ந்திருந்த முன்னீர்பள்ளம் அருகே ஒரு கிராமத்தைச் சேர்ந்த இளம்பெண்ணிடம் பேச்சுக்கொடுத்தவர், திடீரென்று அப்பெண்ணைத் தொட்டு சில்மிஷம் செய்தார். இதனால் நிலைகுலைந்த அப்பெண் ஆத்திரத்தில் அவரைத் திட்டியதோடு அருகில் இருந்த புறக்காவல் நிலைய காவலரிடம் புகார் செய்தார்.

காவல்துறையினர் வருவதற்குள் அந்த ஆசாமி அடுத்த வரிசை நாற்காலியில் அமர்ந்திருந்த பாப்பாக்குடியைச் சேர்ந்த மற்றொரு பெண்ணிடமும் தவறாக நடக்க முயன்றார்.

அத்துடன் நில்லாமல் நெரிசலில் ததும்பி வழிந்த பாபநாசம் பேருந்தில் முன்பக்கம் ஏறி பெண்களை இடித்துக்கொண்டு நின்றார். இதனால் பெண்கள் மிரண்டனர். அதற்குள் அங்கு வந்தபுறக்காவல் நிலைய காவலர்கள் அவரைப் பிடித்துவிட்டனர். தன்னை அழைத்துச் சென்ற காவலரிடம் தானும் ஒரு காக்கி சட்டைக்காரர் என்றும் காவல்துறை துணை ஆய்வாளர் பொறுப்பில் உள்ளதாகவும் அவர் கூறினார்.

அப்போதுதான் தாங்கள் கையும் களவுமாக பிடித்தவர் ஒரு காவல்துறை அதிகாரி என்பதை உணர்ந்த காவலர்கள், அடுத்த விநாடி தோழமை உணர்வால் சுதாரித்துக்கொண்டு அவரைத் தப்பவிட்டனர். பொது இடத்தில் அநாகரீகமாகவும் அத்துமீறலாகவும் நடந்து கொண்டவரைக் குறித்து பாதிக்கப்பட்ட பெண்ணே புகார் கொடுத்தும், அதனைப் புறக்கணித்துவிட்டு பொது மக்கள் முன்னிலையிலேயே அவரைத் தப்ப விட்ட காவல்துறையினரை அங்குக் கூடியிருந்த பொதுமக்கள் சபித்தபடியே பிரிந்து சென்றனர். இந்தச் சம்பவம் பேருந்து நிலையத்தில் பெரிதும் பரபரப்பை ஏற்படுத்தியது.

இந்நேரம்