புதிய அணைக்கு தமிழக அரசு ஆதரவு தர கேரளா கோரிக்கை

கொச்சி:""நூற்றாண்டு பழமைவாய்ந்த, தற்போதைய முல்லைப் பெரியாறு அணைக்குப் பதிலாக, புதிய அணை கட்ட கேரள அரசு மேற்கொள்ளும் முயற்சிகளுக்கு தமிழக அரசு ஒத்துழைப்பு வழங்க வேண்டும்,'' என, கேரள நீர்வளத்துறை அமைச்சர் பி.ஜே.ஜோசப் வலியுறுத்திஉள்ளார்.கொச்சியில் நிருபர்களிடம் பேசிய அவர் மேலும் கூறியதாவது:முப்பது லட்சத்திற்கும் மேற்பட்ட மக்களைப் பாதுகாக்க, புதிய அணை கட்ட வேண்டியது அவசியமான ஒன்று. முல்லைப் பெரியாறு அணைப் பகுதியில் வசிக்கும் மக்களின் பாதுகாப்பை கருத்தில் கொண்டு, புதிய அணை கட்டும் பிரச்னையில் சுமுக பேச்சுவார்த்தை மூலம் தீர்வு காண தமிழக அரசு முன்வர வேண்டும். புதிய அணை கட்டுவதால், தமிழகத்திற்கு தண்ணீர் தருவதில் பாதிப்பு ஏற்படாது.
தமிழகத்திற்கு தற்போது வழங்கப்படும் தண்ணீர் தொடர்ந்து வழங்கப்படும்."முல்லைப் பெரியாற்றில் புதிய அணை கட்ட எந்த சூழ்நிலையிலும் அனுமதிக்க முடியாது' என, சமீபத்தில் தமிழக அரசு தெரிவித்துள்ளது. சுப்ரீம் கோர்ட்டில் இதுதொடர்பான வழக்கு விசாரணையில் இருக்கும் போது, இதுபோன்ற கருத்துக்களை தெரிவிக்க முடியாது. அணை, அபாய நிலையில் உள்ளது என்பதை நிரூபிக்க தேவையான அனைத்து வாதங்களையும் சுப்ரீம் கோர்ட்டில் கேரள அரசு முன்வைக்கும்.சுப்ரீம் கோர்ட்டால் நியமிக்கப்பட்ட கமிட்டி, சமீபத்தில் முல்லைப் பெரியாறு அணையை பார்வையிட்டு ஆய்வு செய்தது. அந்த குழுவினர், அணையின் அடிப்பகுதியில் சேதம் ஏற்பட்டுள்ளதையும், விரிசல் விழுந்துள்ளதையும் கண்டு பிடித்து உள்ளனர். இதைப் பார்க்கும் போது, இந்த விஷயத்தில் கேரளாவுக்கு, சுப்ரீம் கோர்ட் சரியான நீதி வழங்கும் என, நம்புகிறோம்.இவ்வாறு ஜோசப் கூறினார்.

நன்றி தினமலர் .