முதல் சவாலில் சாதிக்குமா இந்தியா?

இந்தியா, இங்கிலாந்து அணிகள் மோதும் முதல் ஒரு நாள் போட்டி இன்று ராஜ்கோட்டில் நடக்கிறது. தொடரில் முதல் வெற்றியை பெற, இரு அணிகளும் தீவிரமாக தயாராகி வருகின்றன. இந்தியா வந்துள்ள இங்கிலாந்து அணி 7 போட்டிகள் கொண்ட ஒரு நாள் தொடரில் விளையாடுகிறது. இவ்விரு அணிகளுக்கு இடையிலான முதல் ஒரு நாள் போட்டி ராஜ்கோட்டில் உள்ள மாதவ்ராவ் சிந்தியா மைதானத்தில் இன்று நடக்கிறது. தோனி நம்பிக்கை: ஆஸ்திரேலியாவுக்கு எதிரான டெஸ்ட் தொடர் வெற்றிக்குப் பின் இந்திய அணி, இங்கிலாந்துக்கு எதிராக ஒரு நாள் தொடரில் காலடி வைக்கிறது.


இது குறித்து பேட்டி அளித்த இந்திய கேப்டன் தோனி கூறியதாவது: சமீபத்தில் தான் ஆஸ்திரேலியாவுக்கு எதிரான டெஸ்ட் தொடரை முடித் துள்ளோம். 3 நாட்கள் இடைவெளிக்குப் பின் ஒரு நாள் தொடரில் மீண்டும் களமிறங்குகிறோம். உடனடியாக டெஸ்ட் போட்டியிலிருந்து ஒரு நாள் போட்டிக்கு மாறுவது என்பது கடினம் தான். இருப்பினும் இதற்கு ஏற்ப எங்களை மாற்றிக் கொள்வோம். தவிர, ஒரு நாள் தொடரில் பங்கேற்கும் வீரர்களில் பாதி பேர் டெஸ்ட் போட்டியில் பங்கேற்க வில்லை. இது எங்களுக்கு சாதகம் தான். தொடரின் துவக்கத்தில் ஒரு வேளை இந்தியா பின்னடைவை சந்தித்தாலும், கடைசி வரை போராடி வெற்றியை எட்டுவோம்.


ஆர்வமூட்டும் விஷயம்: ஒரு நாள் போட்டிகளின் புதிய விதிமுறைப்படி கடைசி பவர் பிளே ஓவரை(5 ஓவர்) நிர்ணயிக்கும் உரிமை பேட்டிங் செய்யும் அணியிடம் கொடுக்கப் பட்டுள்ளது ஆர்வமூட்டும் விஷயம். அதிக ரன் சேர்க்க வேண்டும் என நினைக்கும் பட்சத்தில், இதை உபயோகித்துக் கொள்ளலாம். இருப்பினும் பீல்டிங் செய்யும் அணியின் சுதந்திரம் தடை படுகிறது. இம்முறை எப்படி பயன்படப் போகிறது என்பதை தற்போது கூற முடியாது. ஒரு சில போட்டிகளுக்குப் பின் தான் முடிவு செய்ய முடியும்.


வெற்றி பெறுவோம்: இங்கிலாந்துக்கு எதிரான ஒரு நாள் தொடரில், இளம் இந்திய படை சாதிக்கும் என எதிர்பார்க்கிறேன். பயிற்சி போட்டியில் தோல்வி அடைந்ததால், இங்கிலாந்தை குறைவாக எடை போட வில்லை. தொடரில் எப்படி செயல்படுகிறோம் என்பதே முக்கியம். இவ்வாறு தோனி கூறினார்.


இஷாந்த் இல்லை: இன்றைய முதல் போட்டியில் ஆஸ்திரேலியாவுக்கு எதிரான டெஸ்ட் தொடரில் அசத்திய இஷாந்த் சர்மா காயம் காரணமாக இடம் பெறவில்லை. இது இந்திய அணிக்கு சற்று பின்னடைவை ஏற்படுத்தி உள்ளது. இருப்பினும் முனாப் படேல், ஆர்.பி.சிங் இருவரில் ஒருவர் களமிறங்குவர் என எதிர்பார்க்கப்படுகிறது.

இங்கிலாந்து தீவிரம்: இன்றைய முதல் போட்டியில் வெற்றியை எட்ட இங்கிலாந்து தீவிரமாக தயராகி வருகிறது. இது குறித்து பேட்டி அளித்த இங்கிலாந்து கேப்டன் கெவின் பீட்டர்சன் கூறுகையில், ""இந்தியாவை அதன் சொந்த மண்ணில் எதிர் கொள்ளத் தயாராக உள்ளோம். பேட்டிங், பவுலிங் என இரண்டிலும் இங்கிலாந்து பலத்துடன் உள்ளது. சமீபத்தில் நடந்த தென் ஆப்ரிக்காவுக்கு எதிரான ஒரு நாள் தொடரை, இங்கிலாந்து 4-0 என கைப்பற்றி அசத்தியுள்ளது. அதே உற்சாகத்துடன் இந்தியாவுடன் மோதுவோம். முதல் போட்டியில் சைடுபாட்டம் இடம் பெறாதது பாதிப்பை ஏற்படுத்தாது. அவருக்குப் பதில் ஸ்டூவர்ட் பிராட் களமிறங் குவார். தவிர, பிளின்டாப், ஹார்மிசன், ஆன்டர்சன் உள்ளிட்ட வேகக் கூட்டணி சாதிக்க தயாராகவே உள்ளது. இந்திய அணி அர்ப்பணிப்புடன் கிரிக்கெட்டை விளையாடி வருகிறது. இந்திய அணியின் கேப்டன் தோனி மிகச் சிறந்த வீரர். அணியை திறமையுடன் வழி நடத்தி செல்கிறார். போட்டியின் போது பதட்டமில்லாமல் ரிலாக்சாக விளையாடக் கூடியவர். ஆட்டத்திறனில் எனக்கும், அவருக்கும் இடையே சிறிய வேறுபாடு மட்டுமே உள்ளது. புதிதாக ஒரு நாள் போட்டிகளில் அறிமுகப்படுத்தப்பட்டுள்ள "பவர் பிளே' முறையை, ஆவலுடன் எதிர்நோக்கி காத்திருக்கிறோம்,'' என்றார்.


மைதானத்தில் இதுவரை...: * ராஜ்கோட், மாதவ்ராவ் சிந்தியா மைதானத்தில் இதுவரை 10 ஒரு நாள் போட்டிகள் நடந்துள்ளன. 9 போட்டிகளில் விளையாடிய இந்திய அணி, 4 ல் வெற்றி பெற்றுள்ளது. இம்மைதானத்தில் இங்கிலாந்து அணி விளையாடியது இல்லை.


* ராஜ்கோட்டில் நடந்த ஒரு நாள் போட்டிகளில் அதிக பட்ச ஸ்கோரை நியூசிலாந்து அணி பதிவு செய்துள்ளது. கடந்த 1999 ம் ஆண்டு இந்தியாவுக்கு எதிராக நடந்த இப்போட்டியில் நியூசிலாந்து 349 ரன்கள் குவித்தது. இதே போட்டியில் 306 ரன்கள் குவித்த இந்திய அணி தனது அதிக பட்ச ஸ்கோரை பதிவு செய்தது. இங்கு 2 முறை 300 ரன்களைக் கடந்துள்ளது இந்திய அணி.


* கடந்த 1989 ம் ஆண்டு இம்மைதானத்தில் நடந்த போட்டியில் இலங்கை அணிக்கு எதிராக வெஸ்ட் இண்டீஸ் அணி 176 ரன்கள் குவித்தது. இதுவே இம்மைதானத்தில் பதிவு செய்யப்பட்ட குறைந்த பட்ச ஸ்கோர். இம்மைதானத்தில் இந்தியாவின் குறைந்த பட்ச ஸ்கோர் 185(எதிர் தென் ஆப்ரிக்கா).


* இம்மைதானத்தில் அதிக ரன் எடுத்த வீரர் என்ற பெருமையை முன்னாள் வீரர் கங்குலி பெற்றுள்ளார். 3 போட்டிகளில் விளையாடியுள்ள கங்குலி, 2 அரைசதம் உட்பட 175 ரன் எடுத்தள்ளார். இரண்டாவது இடத்தில் சேவக்(4 போட்டி, 174 ரன்) உள்ளார். இங்கு இந்தியா தரப்பில் சேவக், சித்து, ராமன் லம்பா ஆகியோர் தலா ஒரு சதம் அடித்துள்ளனர்.


* ராஜ்கோட் மைதானத்தில் அதிக விக்கெட் வீழ்த்திய வீரர் இந்தியாவின் வெங்கடேச பிரசாத். 3 போட்டிகளில் பந்து வீசிய இவர் 6 விக்கெட்டுகள் கைப்பற்றியுள்ளார். இப்பட்டியலின் இரண்டாவது இடத்தில் அனில் கும்ளே(4 போட்டி 5 விக்.,) உள்ளார்.


ஆடுகளம் எப்படி? : ராஜ்கோட் மாதவ் ராவ் சிந்தியா மைதானத்தில் இன்று மழை பெய்ய வாய்ப்பு இல்லை. ஆடுகளம் முதல் பாதியில் வேகப் பந்து வீச்சுக்கு அதிகம் ஒத்துழைக்கும் என எதிர்பார்க்கப்படுகிறது. இதனால் முதலில் பீல்டிங் செய்யும் அணிக்கு வெற்றி வாய்ப்பு அதிகம்.