ஆயுதங்களுடன் அரபு விமானம்: கோல்கட்டாவில் சிறைபிடிப்பு

**சிவா** · **சிவா** Tue Sep 08, 2009 6:06 pm

கோல்கட்டா : உரிய அனுமதியில்லாமல், ஆயுதங்களுடன் கோல்கட்டா விமான நிலையத்தில் தரையிறங்கிய ஐக்கிய அரபு எமிரேட் விமானத்தை அதிகாரிகள் சிறை பிடித்தனர்.ஐக்கிய அரபு எமிரேட்டின் விமானப்படை விமானம், சீனாவின் ஹன்யாங் என்ற இடத்தை நோக்கி சென்றது. எரிபொருள் தீர்ந்து விட்டதால், கோல்கட்டாவின் நேதாஜி சுபாஷ் சந்திரபோஸ் சர்வதேச விமான நிலையத்தில், நேற்று முன்தினம் மாலை தரையிறங்கியது.

இந்த விமானத்தில் ஒன்பது பேர் இருந்தனர்.விமானத்தை தரையிறக்கும் முன், "ஆயுதங்கள் ஏதும் இல்லை'என்ற பைலட், பின் சில ஆயுதங்கள் உள்ளதாக சுங்க அதிகாரிகளிடம் தெரிவித்தார். இதையடுத்து, விமான நிலைய சுங்க அதிகாரிகள் விமானத்தை சோதனையிட்டதில், ஏராளமான ஆயுதங்கள் இந்த விமானத்தில் இருந்தது கண்டு பிடிக்கப்பட்டது. இதையடுத்து, விமான அதிகாரிகள் அனைவரும் அருகில் உள்ள ஓட்டலில் விசாரணைக்காக தங்க வைக்கப்பட்டுள்ளனர். விமானமும் சிறை பிடிக்கப் பட்டுள்ளது.விசாரணை முழுமையாக முடிந்த பின் விமானம் விடுவிக்கப்படும் என, விமான நிலைய அதிகாரிகள் தெரிவித்துள்ளனர். இந்த விஷயம் குறித்து வெளியுறவுத்துறை மற்றும் நிதித்துறை அமைச்சகத்திடம் தெரியப்படுத்தப்பட்டு,மேல் விசாரணை நடக்கிறது.