கட்சி தொடங்கிய மூன்றே மாதத்தில் முதல்வராகிறார் ரங்கசாமி

புதுச்சேரியில் நடந்த சட்டமன்ற தேர்தல் ஒட்டு எண்ணிக்கையில் என்.ஆர்.காங்கிரஸ்-அ.தி.மு.க. கூட்டணி தனிப்பெரும்பான்மையுடன் வெற்றி பெற்று ஆட்சியை பிடித்தது. இதைத்தொடர்ந்து அக்கட்சியின் தலைவர் ரங்கசாமி மீண்டும் முதல்-அமைச்சராக பதவி ஏற்கிறார். காங்கிரஸ் கட்சியில் இருந்து விலகி புதிய கட்சியை தொடங்கி அ.தி.மு.க.வுடன் கூட்டணி அமைத்து, அவர் முதல் முறையாக தேர்தலை சந்தித்து வெற்றி பெற்று உள்ளார்.

காங்கிரஸ்-என்ஆர்.காங்கிரஸ். கூட்டணி மோதல்

புதுச்சேரி மாநிலத்தில் காங்கிரஸ் கட்சியில் இருந்து விலகி என்.ஆர்.காங்கிரஸ் என்ற புதிய கட்சியை தொடங்கிய ரங்கசாமி அ.தி.மு.க.வுடன் கூட்டணி அமைத்து இந்த தேர்தலில் போட்டியிட்டார். மேலும் இக்கூட்டணியில் தே.மு.தி.க., மார்க்சிஸ்ட் கம்யூனிஸ்டு, இந்திய கம்யூனிஸ்டு கட்சியும் இடம் பெற்று இருந்தன. காங்கிரஸ் கூட்டணியில் தி.மு.க., பாட்டாளி மக்கள் கட்சி, விடுதலைசிறுத்தைகள் உள்ளிட்ட கட்சிகளும் இணைந்து தேர்தலை சந்தித்தன.

ரங்கசாமி 2 தொகுதியில் அமோக வெற்றி

புதுச்சேரி முன்னாள் முதல்-மந்திரி என்.ஆர்.ரங்கசாமி கதிர்காமம் மற்றும் இந்திராநகர் ஆகிய தொகுதிகளில் போட்டியிட்டார். அவர் போட்டியிட்ட 2 தொகுதியிலும் வெற்றி பெற்றுள்ளார். கதிர்காமம் தொகுதியில் தன்னை எதிர்த்து போட்டியிட்ட காங்கிரஸ் வேட்பாளர் பெத்தபெருமாளை விட 9, 757 ஓட்டுகள் வித்தியாசத்திலும், இந்திராநகர் தொகுதியில் தன்னை எதிர்த்து போட்டியிட்ட காங்கிரஸ் வேட்பாளர் ஆறுமுகத்தை 16 ஆயிரத்து 677 ஓட்டுகள் வித்தியாசத்தில் வெற்றி பெற்றார்.

வைத்திலிங்கம் வெற்றி

புதுச்சேரி காமராஜ் நகர் தொகுதியில் இருந்து மாநில முதல்-மந்திரி வைத்திலிங்கம் தேர்ந்தெடுக்கப்பட்டார். அவர் தன்னை எதிர்த்து போட்டியிட்ட மார்க்சிஸ்ட் கம்யூனிஸ்டு கட்சி வேட்பாளரை 6,029 ஓட்டுகள் வித்தியாசத்தில் வெற்றி பெற்றார்.

புதுச்சேரி மாநில வருவாய் மந்திரி மல்லாடி கிருஷ்ணராவ் 19,118 ஓட்டு வித்தியாசத்தில் சுயேச்சை வேட்பாளர் சாய்குமாரை வென்றார். மாகி தொகுதியில் போட்டியிட்ட காங்கிரஸ் அமைச்சர் வல்சராஜ் வெற்றி பெற்றார்.

பாகூர் தொகுதியில் போட்டியிட்ட சபாநாயகர் ராதாகிருஷ்ணன் தோல்வி அடைந்தார். ஏம்பலம் தொகுதியில் போட்டியிட்ட அமைச்சர் கந்தசாமியும், காலாப்பட்டு தொகுதியில் போட்டியிட்ட அமைச்சர் ஷாஜகானும் தோல்வி அடைந்தனர்.

மண்ணாடிப்பட்டு தொகுதியில் என்.ஆர்.காங்கிரஸ் சார்பில் போட்டியிட்ட டி.பி.ஆர்.செல்வம் வெற்றி பெற்றார். நெடுங்காடு தொகுதியில் என்.ஆர்.காங்கிரஸ் வேட்பாளர் சந்திரகாசு வெற்றி பெற்றார். மங்கலம் தொகுதியில் காங்கிரஸ் வேட்பாளர் தேனீ ஜெயக்குமார் வெற்றி பெற்றார். ஏனாம் தொகுதியில் அமைச்சர் மல்லாடிகிருஷ்ணராவ் வெற்றி பெற்றார்.

லாஸ்பேட்டை தொகுதியில் என்.ஆர்.காங்கிரஸ் வேட்பாளர் வைத்தியநாதன் வெற்றி பெற்றார். நெல்லித்தோப்பு தொகுதியில் அ.தி.மு.க. வேட்பாளர் ஓம்சக்தி சேகர் வெற்றி பெற்றார்.

முத்தியால்பேட்டை தொகுதியில் தி.மு.க. வேட்பாளர் நந்தாசரவணன் வெற்றி பெற்றார்.

அரியாங்குப்பம் தொகுதியில் என்.ஆர்.காங்கிரஸ் வேட்பாளர் வி.சபாபதி வென்றார். ஓசுடு தனி தொகுதியில் என்.ஆர்.காங்கிரஸ் வேட்பாளர் பி.கார்த்திகேயன் வெற்றி பெற்றார். ஓரிலேன்பெட் தொகுதியில் போட்டியிட்ட என்.ஆர்.காங்கிரஸ் வேட்பாளர் நேரு வெற்றிபெற்றார். திருநள்ளாறு தொகுதியில் போட்டியிட்ட என்.ஆர்.காங்கிரஸ் வேட்பாளர் பி.ஆர்.சிவா, காலபெட் தொகுதியில் என்.ஆர்.காங்கிரஸ் வேட்பாளர் கல்யாணசுந்தரம் ஆகியோர் வெற்றி பெற்றார். காரைக்கால் தொகுதியில் போட்டியிட்ட காங்கிரஸ் வேட்பாளர் திருமுகன் வெற்றி பெற்றார்.

மணவெளி தொகுதியில் அ.தி.மு.க. வேட்பாளர் புருஷோத்தமன் 13979 ஒட்டுகள் பெற்று தி.மு.க. வேட்பாளர் அனந்தராமனை 4333 ஓட்டுகள் வித்தியாசத்தில் வெற்றி பெற்றார். முதலியார்பேட்டையில் அ.தி.மு.க. வேட்பாளர் பாஸ்கரன் 17016 ஓட்டுகள் பெற்று தன்னை எதிர்த்து போட்டியிட்ட தி.மு.க. வேட்பாளர் சுப்பிரமணியத்தை விட சுமார் 10 ஆயிரம் ஓட்டுகள் வித்தியாசத்தில் வெற்றி பெற்றார்

நிரவி-.ஆர்.பட்டினம் தொகுதியில் சுயேச்சை வேட்பாளர் வி.எம்.சி.வி.சிவக்குமார் 8860 ஓட்டுகள் பெற்று வெற்றி பெற்றார். உழவர்கரை தொகுதியில் என்.ஆர்.காங்கிரஸ் வேட்பாளர் என்.ஜி.பன்னீர்செல்வம் 8998 ஓட்டுகள் பெற்று வெற்றி பெற்றார்.

தனிப்பெரும்பான்மை

புதுச்சேரி மாநிலத்தில் 30 தொகுதிகளில் பதிவான ஓட்டு எண்ணிக்கை நேற்று நடந்தது. இதில் என்.ஆர்.காங்கிரஸ் கூட்டணி 17 இடங்களிலும், காங்கிரஸ் கூட்டணி 11 இடங்களிலும் வெற்றி பெற்றன. 2 தொகுதிகளில் சுயேச்சைகள் வெற்றி பெற்றன.

மொத்த தொகுதிகள் : 30

முடிவு தெரிந்தவை : 30

என்.ஆர்.காங்கிரஸ்-

அ.தி.மு.க. கூட்டணி

என்.ஆர்.காங்கிரஸ்: 15

அ.தி.மு.க. : 5

காங்.தி.மு.க.கூட்டணி

காங்கிரஸ் : 7

தி.மு.க. : 2

சுயேச்சை : 1

-

30

-

இந்த வெற்றியின் மூலம் என்.ஆர்.காங்கிரஸ்-அ.தி.மு.க. கூட்டணி ஆட்சி அமைக்கும் அளவுக்கு தனிப்பெரும்பான்மையை பெற்று உள்ளது.

ஜெயலலிதாவுடன் ஆலோசனை

முன்னாள் முதல்-மந்திரியும் என்.ஆர்.காங்கிரஸ் கட்சி தலைவருமான என்.ரங்கசாமி புதுச்சேரியில் ஆட்சி அமைப்பது பற்றி அ.தி.மு.க. பொதுச்செயலாளர் ஜெயலலிதாவுடன் ஆலோசனை நடத்துகிறார். அப்போது மந்திரி சபை பட்டியலை அவர் இறுதி செய்கிறார்.

இன்னும் 2 நாட்களில் புதுச்சேரியில் புதிய ஆட்சி அமைக்க கவர்னர் இக்பால்சிங் தனக்கு அழைப்பு விடுப்பார் என முன்னாள் முதல்-அமைச்சரும், என்.ஆர்.காங்கிரஸ் தலைவருமான ரங்கசாமி எதிர்பார்க்கிறார்.

தினதந்தி