கனிமொழி எம்.பி.யிடம் வருமானவரித்துறை விசாரணை

கனிமொழி எம்.பி.யிடம் வருமானவரித்துறை விசாரணை சென்னையில் நடந்தது

ஸ்பெக்ட்ரம் விவகாரம் தொடர்பாக தி.மு.க. எம்.பி. கனிமொழியிடம் சென்னை வருமான வரித்துறையின் புலனாய்வு பிரிவு அதிகாரிகள் விசாரணை நடத்தினர்.

2ஜி அலைவரிசை ஒதுக்கீடு வழக்கு தொடர்பாக சென்னை நுங்கம்பாக்கத்தில் உள்ள வருமானவரி புலனாய்வு இயக்குனரகத்தில் இருந்து கலைஞர் டி.வி. இயக்குனர்களுக்கு சம்மன் அனுப்பப்பட்டது. அந்த டி.வி.யின் இயக்குனர் என்ற முறையில் அதன் பங்குதாரரான கனிமொழிக்கும் சம்மன் வந்தது. மே 12 மற்றும் 13-ந் தேதிகளில் வருமானவரி புலனாய்வு இயக்குனரகத்தில் ஆஜராகி விளக்கம் அளிக்க வேண்டும் என்று அதில் கூறப்பட்டு இருந்தது.

விசாரணை

அதைத் தொடர்ந்து கனிமொழி நேற்று காலை 11.45 மணியளவில் வருமானவரி புலனாய்வு இயக்குனரகத்திற்கு காரில் வந்திறங்கினார். கனிமொழியுடன் அவரது கணவர் அரவிந்தன் வந்திருந்தார். 2 பேரும் அந்த கட்டிடத்தில் உள்ள 2-வது தளத்துக்கு சென்றனர். அங்கு கனிமொழியிடம் வருமானவரி புலனாய்வு துணை இயக்குனர் ராமகிருஷ்ண பண்டி விசாரணை நடத்தினார். சுமார் 11/2 மணி நேரம் விசாரணை நடத்தப்பட்டது.

இந்த அலுவலகத்துக்கு கனிமொழி வந்த சிறிது நேரத்தில் கலைஞர் டி.வி.யின் நிர்வாக இயக்குனர் சரத்குமார் வந்தார். அவரிடமும் விசாரணை நடத்தப்பட்டது. விசாரணை முடிந்ததும் கனிமொழி வேறு வழியாக அலுவலகத்தை விட்டு வெளியேறினார்.

விசாரணை விவரங்கள்

கனிமொழியிடம் நடத்திய விசாரணை பற்றிய விவரங்களை வருமானவரி புலனாய்வு இயக்குனரகத்தின் டைரக்டர் ஜெனரல் சுதிர் சந்திராவிடம் ராமகிருஷ்ண பண்டி எடுத்துரைத்தார். அப்போது இணை கமிஷனர் வித்யா சுப்பிரமணியம் உட்பட சில அதிகாரிகள் உடனிருந்தனர்.

இந்த விசாரணை பற்றி அதிகாரிகளிடம் கேட்டபோது அவர்கள் கூறிய பதில்கள் வருமாறு:-

இயக்குனர் என்ற முறையில்

கேள்வி:-கனிமொழிக்கு சம்மன் எப்போது தரப்பட்டது?

பதில்:-கடந்த 9-ந் தேதி சம்மன் அளிக்கப்பட்டது.

கேள்வி:-தனிப்பட்ட முறையிலா கனிமொழிக்கு சம்மன் அனுப்பப்பட்டது?

பதில்:-கலைஞர் டி.வி.யின் இயக்குனர் என்ற முறையில் அவருக்கு சம்மன் தரப்பட்டது.

கேள்வி:-தயாளு அம்மாள் உட்பட மற்ற இயக்குனர்களுக்கும் சம்மன் அனுப்பப்பட்டதா?

பதில்:-அனைத்து இயக்குனர்களுக்குமே சம்மன் அனுப்பினோம். அவர்கள் நேரில் ஆஜராக வேண்டும் என்பதில்லை. வக்கீல்கள் மூலமாகவும் விளக்கம் அளித்திருக்கலாம்.

தேவைப்பட்டால் அழைப்போம்

கேள்வி:-கனிமொழியின் சொத்து தொடர்பாக விசாரணை நடத்தினீர்களா?

பதில்:-இது சொத்து சம்பந்தப்பட்ட விசாரணை இல்லை. 2ஜி ஸ்பெக்ட்ரம் தொடர்பாக விசாரணை டில்லியில் நடைபெறுகிறது. நாங்களும் அது தொடர்பாகத்தான் விசாரித்தோம். நீங்கள் கேட்டபடி, கலைஞர் டி.வி.யில் நடந்த ரூ.200 கோடி பண பரிவர்த்தனையும் இந்த விசாரணையில் அங்கம் வகித்தது.

கேள்வி:-அவரிடம் விசாரணை தொடருமா?

பதில்:-கனிமொழி சில விளக்கங்களை அளித்திருக்கிறார். அவற்றை தொகுத்து, போதுமானவையா என்பதை நாங்கள் சரிபார்க்க வேண்டும். தேவைப்பட்டால் மீண்டும் விசாரணைக்கு அவர்களை அழைப்போம். நாளைக்கு (13-ந் தேதி) அவர் இங்கு வரத்தேவையில்லை.

இவ்வாறு அவர்கள் பதிலளித்தனர்.

தினதந்தி!