கருமுட்டை தானம் மூலம் குழந்தை பிறந்தது: ஐரோப்பாவில் அதிசய நிகழ்வு

மாறி வரும் உலக காலாசாரத்தின் பயனாக நன்மைகளை நாம் பெற்றுக் கொள்ளும் அதே அளவில் தீமைகளும் நம்மை ஆட்கொள்ளாமல் இல்லை எனலாம். அத்தகைய ஒரு நிகழ்வாக இன்றைய உலகில் நம்மை ஆட்கொண்டு குடும்பத்தில் சந்தோசத்தை இழந்து சில பேர் தவிப்பதற்குக் காரணமாக அமைந்து விட்டது தான் குழந்தை பேறின்மை. ஆனாலும் மாறி வரும் விஞ்ஞான அசுர வளர்ச்சியில் இத்தகைய குறைபாடுகள் நீக்கப்பட்டு குழந்தை பாக்கியம் கிடைப்பதற்குப் பல ஆராய்ச்சிகள் நடைபெற்று வருகிறது.

இத்தகைய ஆராய்ச்சியின் பயனாக, பிறவியிலேயே கரு முட்டை உற்பத்தி செய்ய இயலாத பெண் கரு முட்டையைத் தானமாகப் பெற்றதன் மூலம் குழந்தை பேற்றை அடைந்து சாதனை படைத்து இருக்கிறார் ஒரு பெண். இச்சம்பவம் நடைபெற்றது பிரான்ஸ் தலைநகர் பாரீஸில். இங்கே இரட்டையர்களாக பிறந்து வளந்தவர்கள் காரின் திரியாட் மற்றும் ஸ்டீபெய்ன் ஆகியோர். இவர்களுக்குத் திருமணமும் நடந்து முடிந்தது. இவர்களில் ஸ்டிபெய்ன் 2 குழந்தைகளைப் பெற்றெடுத்து விட்டார்.

35 வயதினையும் கடந்து விட்ட நிலையில் காரின் திரியாட்க்குக் குழந்தை பிறக்காததால் மருத்துவர்கள் அவரைப் பரிசோதனை செய்தனர். முடிவில் அவருக்குக் கரு முட்டை உற்பத்தியாகவில்லை என்பது தெரிய வந்தது.


குரோமோசோம்களில் போதிய வளர்ச்சியின்மை ஏற்பட்டால் இத்தகைய குறைபாடுகள் 2500 பெண்களில் ஒருவருக்கு ஏற்பட வாய்ப்புள்ளதாக மருத்துவர்கள் தெரிவிக்கின்றனர்.

எனவே, காரின் திரியாட்க்குக் கரு முட்டை தானம் மூலம் குழந்தை பேற்றைப் பெறுவது என முடிவு செய்யப்பட்டது. இத்திட்டதின் படி அவருடன் இரட்டையராக பிறந்த ஸ்டிபெய்ன் சோதனை செய்யப்பட்டு அவரிடமிருந்தே கருமுட்டை தானமாகப் பெற்றுக் கொள்ளப்பட்டு அவரது கருப்பையில் வைக்கப்பட்டது. தொடர்ந்து மருந்துவர்களின் கண்காணிப்பிலே காரின் திரியாட் இருந்த போது அவர் கர்ப்பம் அடைந்தது உறுதி செய்யப்பட்டது.

இதனைத் தொடர்ந்து 10-வது மாதத்தில் அறுவை சிகிச்சை மூலம் காரின் திரியாட் ஒரு பெண் குழந்தையைப் பெற்றெடுத்தார். அக்குழந்தைக்கு விக்டோரியா என பெயரிடப்பட்டுள்ளதாகவும் தாயும், குழந்தையும் நலமாக உள்ளனர் என்றும் அவருக்குச் சிகிச்சை அளித்த பெல்ஜியம் மகப்பேறு மருத்துவர் டாக்டர் ஜேக்குவல் டோன்னெஷ் தெரிவித்தார்.

இந்நிகழ்வின் மூலம் காரின் திரியாட் தான் ஐரோப்பா கண்டத்தில் கரு முட்டை தானம் மூலம் குழந்தை பெற்ற முதல் பெண் என்ற பெருமையைப் பெறுகிறார் என்ற செய்தியும் அவர் பெற்ற பெண் குழந்தைக்குக் கரு முட்டை உற்பத்தியாவதில் எந்தப் பிரச்சனையும் இல்லை என்ற மருத்துவ சோதனை முடிவும் அக்குடும்பத்தினரைப் பெரும் மகிழ்ச்சியில் ஆழ்த்தியுள்ளது.

இன்னெரம்