ராஜசேகர ரெட்டி கடந்து வந்த பாதை

ஐதராபாத்: 1949ம் ஆண்டு ஜூலை 8ம் தேதி ஆந்திர மாநிலம் கடப்பா மாவட்டத்தில் உள்ள புலிவேந்துலா என்ற இடத்தில் பிறந்தவர் ஒய்.எஸ்.ராஜசேகர ரெட்டி.

எடுகுரி சந்திந்தி ராஜசேகர ரெட்டி என்பது இவரது முழு பெயர். செல்வந்தரான ராஜசேகர ரெட்டியின் தந்தை, அந்தப் பகுதி மக்களிடம் செல்வாக்கு மிகுந்தவராக இருந்தார்.

இளம் வயதிலேயே படிப்பில் சிறந்து விளங்கிய ராஜசேகர ரெட்டிக்கு, டாக்டராகி மக்களுக்கு சேவை செய்ய வேண்டும் என்ற எண்ணம் ஏற்பட்டது. குல்பர்கா பல்கலைக்கழகத்தில் எம்பிபிஎஸ் படித்து பட்டம் பெற்றார். பயிற்சி முடித்த கையோடு சொந்த ஊரிலேயே மகனுக்கு தனியாக ஆஸ்பத்திரி கட்டிக் கொடுத்தார் தந்தை. இப்போதும் அந்த ஆஸ்பத்திரி செயல்பட்டு வருகிறது. கைராசி டாக்டர் என பெயர் பெற்ற ராஜசேகருக்கு அரசியலில் ஈர்ப்பு ஏற்பட்டது.

காங்கிரசில் சேர்ந்து பணியாற்றினார். செல்வாக்கு மிக்க குடும்பத்தைச் சேர்ந்தவர் என்பதால் இவருக்கு கட்சியில் நல்ல வாய்ப்புகள் கிடைத்தன. படிப்படியாக கட்சியில் பல பதவிகளைப் பிடித்த ராஜசேகர ரெட்டிக்கு கடப்பா மக்களவை தொகுதியில் சீட் கிடைத்தது. முதல் தேர்தலிலேயே வெற்றி பெற்றார். தொடர்ந்து அதே தொகுதியில் 4 முறை வெற்றி பெற்று எம்.பி.யாக இருந்தார். பின்னர், சட்டசபை தேர்தலில் போட்டியிட விரும்பினார்.

சொந்த ஊரான புலிவேந்துலா தொகுதியில் தொடர்ந்து 6 முறை போட்டியிட்டு வெற்றி பெற்றார். 1980ல் காங்கிரஸ் அமைச்சரவையில் இடம் பெற்றார். 3 ஆண்டுகள் அமைச்சராக பதவி வகித்தார். ஆட்சி மாற்றம் ஏற்பட்ட பிறகு தொடர்ந்து 5 ஆண்டுகள் சட்டசபை எதிர்க்கட்சித் தலைவராகவும் இருந்துள்ளார்.

ஆந்திராவில் காங்கிரசை மீண்டும் ஆட்சியில் அமர்த்த வேண்டும் என்ற குறிக்கோளுடன் 2003ம் ஆண்டு மாநிலம் முழுவதும் பாதயாத்திரை நடத்தினார். பல்வேறு மாவட்டங்களில் 1500 கி.மீ. பயணம் செய்து தொண்டர்களையும், மக்களையும் சந்தித்தார். இவரது பாதயாத்திரை, காங்கிரசுக்கு புத்துணர்ச்சி அளித்தது. இதன்பயனாக, 10 ஆண்டுகளுக்குப் பிறகு 2004ல் நடந்த சட்டசபை தேர்தலில் காங்கிரஸ் அமோக வெற்றி பெற்றது.

பெரிய கட்சியாக திகழ்ந்த தெலுங்குதேசத்தை வீழ்த்தியதில் ராஜசேகர ரெட்டிக்கு பெரும் பங்கு இருந்ததால் கட்சி மேலிடம் அவரையே முதல்வராக்கியது. 5 ஆண்டு கால ஆட்சியில் மக்களுக்கு பல்வேறு நலத்திட்டங்களை செயல்படுத்தினார். இவரது திட்டங்களும், எளிமையும் மக்களிடையே செல்வாக்கை அதிகரித்தது. சாதாரண மக்களுடன் நெருங்கிப் பழகினார்.

கடந்த மே மாதம் நடந்த சட்டசபை தேர்தலில் சந்திரபாபு நாயுடு, நடிகர் சிரஞ்சீவி என இரு பெரும் சக்திகளை எதிர்த்து காங்கிரசை மீண்டும் வெற்றி பெற வைத்தார். 2வது முறையாக முதல்வர் பொறுப்பையும் ஏற்றார். ராஜசேகர ரெட்டி மனைவி பெயர் விஜயலட்சுமி. இவர்களுக்கு ஜெகன்மோகன் ரெட்டி என்ற மகனும் சர்மிளா என்ற மகளும் உள்ளனர்.

நல்ல தகவல், அவரது ஆத்மா சாந்தி அடைய வாழ்துகள்.

சாதரண குடும்பத்தில் பிறந்து உயர்ந்தவர் என்று செய்திகளில் சொன்னார்கள்......