நாங்கள் நினைத்தால் நீங்கள் ரோட்டில் நடக்க முடியுமா? அன்பரசன் எச்சரிக்கை

பூஜிதா · பூஜிதா Mon Oct 25, 2010 5:21 pm

""நாங்கள் நினைத்தால் கம்யூனிஸ்ட் கட்சியினர் கூட்டம் போட முடியுமா? ரோட்டில் நடக்க முடியுமா?'' என, அமைச்சர் அன்பரசன் எச்சரிக்கை விடுத்தார்.

காஞ்சிபுரம் நகர தி.மு.க., சார்பில், முப்பெரும் விழா மற்றும் தி.மு.க., அரசின் சாதனை விளக்க பொதுக்கூட்டம் காஞ்சிபுரத்தில் நடந்தது. நகரச் செயலர் சேகர் தலைமை தாங்கினார்.

கூட்டத்தில் அமைச்சர் அன்பரசன் பேசும்போது கூறியதாவது: கடந்த சட்டசபை தேர்தலுக்கு முன் தேர்தல் அறிக்கையில் கூறிய அனைத்தையும், தமிழக முதல்வர் நிறைவேற்றியுள்ளார். கடந்த அ.தி.மு.க., ஆட்சியில் தமிழக மக்கள் படாதபாடுபட்டனர். அரசு ஊழியர்கள், ஆசிரியர்கள் மீது எஸ்மா, டெஸ்மா சட்டம் பாய்ந்தது. ஆடு, கோழி வெட்ட தடை விதிக்கப்பட்டது. பணி நியமன தடை சட்டம் கொண்டு வரப்பட்டது. கருணாநிதி கொண்டு வந்த திட்டங்கள் அனைத்தும் நிறுத்தப்பட்டன. படாளம் சர்க்கரை ஆலை மூடப்பட்டது. தற்போது அது திறக்கப்பட்டுள்ளது.தி.மு.க., ஆட்சி பொறுப்பேற்ற நான்கரை ஆண்டுகளில் 4 லட்சத்து 90 ஆயிரம் பேருக்கு அரசு வேலை வழங்கப்பட்டுள்ளது. புதிய தொழிற்சாலைகள் உருவாக்கப்பட்டு 15 லட்சம் பேருக்கு வேலை வாய்ப்பு உருவாக்கி தரப்பட்டுள்ளது. கடந்த அ.தி.மு.க., ஆட்சியில் மூன்றரை லட்சம் அரசுப் பணியிடங்கள் நிரப்பப்படவில்லை.

தமிழகத்தில் ஆறு ஆண்டுகளில் 21 லட்சம் குடிசை வீடுகளை கான்கிரீட் வீடுகளாக மாற்றும் திட்டத்தை முதல்வர் அறிவித்துள்ளார். தொடர்ந்து ஆட்சியிலிருக்கப் போகிறவர் முதல்வர். எனவே ஆறு ஆண்டுகளில் திட்டத்தை நிறைவேற்றுவார். தற்போது கம்யூனிஸ்டுகள் ஆட்டம் போடுகின்றனர். காஞ்சிபுரம் மாவட்டத்தில் கம்யூனிஸ்ட் கட்சியில் ஊருக்கு ஒருவர் உள்ளார். நாங்கள் நினைத்தால் நீங்கள் கூட்டம் போட முடியுமா? ரோட்டில் நடக்க முடியுமா? அடக்கி வாசியுங்கள். ஜாக்கிரதை.இவ்வாறு அமைச்சர் அன்பரசன் பேசினார்