கராச்சி நகரம் எரிகிறது

பாகிஸ்தானில் உள்ள கராச்சி நகரில் உள்ளூர் மக்கள் மற்றும் வெளியிடங்களில் இருந்து கராச்சியில் குடியேறியவர்கள் இடையே அடிக்கடி மோதல் நடந்து வருகிறது. இதில் ஒரு தரப்பினருக்கு அவாமி தேசிய கட்சியும், இன்னொரு தரப்பினருக்கு முத்தாகித் குவாமி கட்சியும் ஆதரவாக செயல்பட்டு வந்தனர்.

இந்த நிலையில் முத்தாகித் குவாமி கட்சி தலைவரும் சிந்து மாநில எம்.எல்.ஏ.வுமான ராசா ஹைதர் மர்ம நபர்களால் சுட்டுக்கொல்லப்பட்டார்.
அவரை அவாமி லீக் கட்சியினர் தான் கொன்றதாக கருதி அவர்கள் மீது முத்தாகித் குவாமி கட்சியினர் தாக்குதல் நடத்தினார்கள்.

இது பெரும் கலவரத்தை ஏற்படுத்தியது. இருதரப்பினரும் துப்பாக்கி உள்ளிட்ட பயங்கர ஆயுதங்களுடன் மோதிக்கொண்டனர்.

தொடர்ந்து 4 நாட்களாக அங்கு கலவரம் நடந்து வருகிறது. கொலை, தீ வைப்பு போன்ற சம்பவங்கள் தொடர்கின்றன.

கலவரத்துக்கு இதுவரை 76 பேர் பலியாகி உள்ளனர். 200-க்கும் மேற்பட்டோர் காயம் அடைந்துள்ளனர்.

கராச்சி மற்றும் நிசாமாபாத் ஆகிய நகரங்கள் மோசமாக பாதிக்கப்பட்டு உள்ளன. கராச்சி நகரில் 300-க் கும் மேற்பட்ட கடைகளுக்கு தீ வைக்கப்பட்டன. 50 கார் மற்றும் வாகனங்கள் தீ வைத்து எரிக்கப்பட்டன.

நிசாமாபாத்தில் மசூதியில் வெடிகுண்டு வீசி தாக்குதல் நடத்தினார்கள். இதில் 5 பேர் காயம் அடைந்தனர்.

கலவரத்தில் ஈடுபடுபவர்களை கண்டதும் சுட உத்தரவு பிறப்பிக்கப்பட்டுள்ளது. ஆனாலும் கட்டுப்படுத்த முடியாத அளவுக்கு கலவரம் நீடித்து வருகிறது.

இதில் அரசின் பாராமுகங்கள் இருக்கலாம், அதனால்தான் நிலைமையை கட்டுக்குள் கொண்டுவர மறுக்கிறார்கள்! இராணுவமும், போலீசும் இணைந்து ஒரு மணி நேரத்திற்குள் நகரை அமைதிப்படுத்தலாம்!