கற்பழித்த ஒவ்வொருவரையும் அடையாளம் காட்டிய 16 வயது சிறுமி

புதுடில்லி : மூன்று ஆண்டுகளுக்கு முன்பு தன்னைக் கடத்தி வந்தவர்கள், முகம் தெரியாத மாநிலத்தில், ஒவ்வொரு இடத்திலும் அடைத்து வைத்துக் கற்பழித்தவர்கள் என, அனைவரையும் அடையாளம் காட்டியிருக்கிறார், 16 வயது சிறுமி.

மேற்கு வங்க மாநிலம், 24 பர்கானா மாவட்டத்தின், ஹப்ரா கிராமத்தைச் சேர்ந்தவர் மிது தாஸ்(16). பாரம்பரிய நடனம் ஆடுவதில் வல்லவர். இவர் குடும்பம் வறுமையில் இருந்ததால், பக்கத்து வீட்டுக்காரர், 'குஜராத்தில் மிது நடனம் ஆடினால் நிறைய வருமானம் வரும். மாதா மாதம் ஆறாயிரம் ரூபாய் உங்கள் வீட்டுக்குத் தருகிறோம்' என்று கூறி, மிதுவை அழைத்துச் சென்றார். அப்போது மிதுவின் வயது 13. அதன் பின், மிதுவின் வாழ்க்கையில் இருண்ட காலம் தொடங்கியது. குஜராத்துக்கு அவரைக் கூட்டிச் சென்றவர்கள், அங்கு ஓர் அறையில் அடைத்து வைத்து, ஆபாசப் படங்களைக் காட்டி அதன்படி செய்யச் சொல்லி வற்புறுத்தினர். இந்தச் சித்ரவதை, நாள் கணக்காக, மாதக்கணக்காக, ஆண்டுக்கணக்காக நீடித்திருக்கிறது. அவரை, மெஹ்சனா, பரோடா, விராட்நகர், ஆமதாபாத், கான்பூர் என்று ஊர் ஊராக அழைத்துச் சென்று 'வாடிக்கையாளர்'களுக்குத் தாரை வார்த்தனர். இறுதியில், இரண்டு மாதங்களுக்கு முன்பு, 'அன்ஹத்' என்ற தனியார் தொண்டு நிறுவனம் மூலம் அவர் மீட்கப்பட்டார். அப்போது நடந்த மருத்துவப் பரிசோதனையின் போதுதான் அவருக்கு எச்.ஐ.வி., இருப்பதும் தெரிய வந்திருக்கிறது. ஆனால், மனம் தளரவில்லை மிது. தன்னைக் கடத்தியவர்கள், ஒவ்வொரு ஊரிலும் கற்பழித்தவர்கள் என எல்லாரையும், போலீசாரிடம் அடையாளம் காட்டியிருக்கிறார்.

இதுகுறித்து பிரட்சிதா ரத்தோர் என்ற பெண் போலீஸ் கூறியதாவது: அவர் உண்மையிலேயே நுட்பமான புத்திசாலிதான். அவரால் எங்கள் விசாரணை மிக எளிதில் முடிந்திருக்கிறது. குஜராத்துக்கு இதற்கு முன்பு அவர் வந்ததில்லை. ஆனால் முன்பு, தான் கொண்டு செல்லப் பட்ட ஒவ்வொரு இடத்தையும் மிகத் தெளிவாக நினைவில் வைத்து, போலீசாரை அழைத்துச் சென்றிருக்கிறார். சந்துகளுக்குள்ளும், குறுக்குத் தெருக்களுக்குள்ளும் தங்கியிருந்த இடங்களை நினைவுபடுத்தி அடையாளம் காட்டியுள்ளார். அவரால் அடையாளம் காட்டப்பட்ட, 'தொழிலில்' ஈடுபட்டிருந்த பெண்கள்,'நாங்கள் வயதானவர்கள். எங்களால் எப்படி இதைச் செய்திருக்க முடியும்?' என்று கேட்ட போது, அவர்கள் ஒவ்வொருவரும் தன்னை எப்படிக் கொடுமைப்படுத்தினர் என்பதைத் தெளிவாகக் கூறினார் மிது. இவ்வாறு பிரட்சிதா தெரிவித்தார்.

நடந்த சம்பவங்கள் குறித்து மிது கூறுகையில், 'எனக்கு அவ்வளவாக ஞாபக சக்தி கிடையாது. ஆனால் இவ்வழக்கில் நான் போராட விரும்பினேன். அதனால் ஒவ்வொரு வீட்டையும் நினைவுபடுத்தி, அடையாளம் காட்டினேன். எனக்கு நடந்த கொடுமைகள் எதுவும், என் தாய்க்குத் தெரியாது. அவருக்கு மாதாமாதம் பணம் போயிருக்கும். நடந்த அனைத் தையும் மறந்து விட நினைக்கிறேன். புதிய வாழ்வை சந்தோஷமாக ஆரம்பிக்க ஆசைப்படுகிறேன்' என்கிறார். மிதுவால் அடையாளம் காட்டப்பட்டவர்களில், 'தொழில்' பெண்களும் உண்டு. 'வாடிக்கையாளர்'களில் தொழிலதிபர், நடுத்தர குடும்ப ஆண்கள், ஓட்டல் உரிமையாளர்களும் உண்டு. மிது மீட்கப்பட்ட பின், குஜராத்தில் இதுபோன்று மேற்கு வங்கத்திலிருந்து பெண்கள், குழந்தைகளைக் கடத்தி வந்து விபசாரத்தில் ஈடுபடுத்தும் பெரிய கும்பல், போலீஸ் பிடியில் சிக்கியுள்ளது. இந்தியாவில் மேற்கு வங்கத்தில் தான், அதிகளவில் பெண்கள், குழந்தைகள் கடத்தப்படுகின்றனர். அம்மாநிலத்திலுள்ள 265 கிராமங்களில், நகர்ப்புறங்களில் வேலைபார்க்கச் செல்லும் 3,429 குழந்தைகளில் 271 பேர், ஒரு கிராமத்துக்கு ஒருவர் வீதம், மீண்டும் வீடு திரும்புவதில்லை என்று மாநில அரசின் அறிக்கை கூறுகிறது.