ஆர்.பி.கே:இரண்டாவது மனு

உள்நாட்டுப் பாதுகாப்புச் சட்ட(இசா) தடுப்புக் காவல் கைதி ராஜா பெத்ரா கமாருடின் இரண்டாவது ஹெபியர்ஸ் கார்பஸ் மனுவை கோலாலம்பூர் உயர் நீதி மன்றத்தில் சமர்பித்துள்ளார். வழக்கறிஞர் குழு அந்த விண்ணப்பத்தைச் சமர்ப்பித்ததாக அவரது மனைவி மரீனா லீ அப்துல்லா கூறினார்.

“அந்த விண்ணப்பம் முதல் மனுவிலிருந்து முற்றாக மாறுபட்டது”, என்று அவர் சொன்னார்.

“முதலாவது தடுப்பு உத்தரவு அவர் 60 நாட்கள் வரை தடுத்து வைக்கப்படலாம் என்று பொருள்படும். அவர் ஆயுளுக்கு தடுத்து வைக்கப்படலாம் என்று இரண்டாவது உத்தரவுகூறுகிறது.”

தடுப்புக் காவல் கைதிகளை தொடந்து வைத்திருப்பதற்கு அரசாங்கத்திற்கு உரிமை இருக்கிறதா என்பதை முடிவு செய்வதற்காக ஒரு நீதிபதி முன்னிலையில் ஆஜர்படுத்துமாறு அதிகாரிகளுக்கு ஹெபியர்ஸ் கார்பஸ் மனு உத்தரவிடுகிறது.

தேசியப் பாதுகாப்புக்கு பாதகத்தை ஏற்படுத்தக் கூடும் என்று கருதப்படும் ஒரு நபரை விசாரணைக்காக கூடின பட்சம் 60 நாட்களுக்கு தடுத்து வைப்பதற்கு போலீசை அனுமதிக்கும் இசா சட்டத்தின் 73(1) பிரிவின் கீழ் அந்த பிரபலமான வலைப் பதிவாளர் முதலில் பிறப்பிக்கப்பட்ட தடுப்பு ஆணைக்கு எதிராக செப்டம்பர் 16 ம் தேதி முதல் விண்ணப்பம் சமர்பிக்கப்பட்டது.

ஆனால் அந்த மனு மீது செப்டம்பர் 23 விசாரணை தொடங்குவதற்கு ஒரு நாள் முன்னதாக உள்துறை அமைச்சு இன்னொரு ஆணையில் கையெழுத்திட்டது. அடுத்த நாள் பேராக் கமுண்டிங் தடுப்புக் காவல் முகாமுக்கு ஆர் பி கே அனுப்பப்பட்டார்.

இசா சட்டத்தின் எட்டாவது பிரிவு இரண்டு ஆண்டுகளுக்குத் தடுத்து வைக்க வகை செய்கிறது. அமைச்சரின் விருப்பத்திற்கு ஏற்ப அதனைப் புதுப்பிக்கலாம்.

ஆகவே ராஜா பெத்ரா தடுத்து வைக்கப்பட்ட சட்டப் பிரிவு மாற்றப்பட்டிருப்பதால் அந்த விண்ணப்பம் செல்லாது என அரசாங்கத் தரப்பு வழக்கறிஞர்கள் வாதாடினர்.

முடிவு இன்னும் எடுக்கப்படவில்லை. 73 (1) பிரிவின் கீழ் ராஜா பெத்ராவுக்கு எதிராக பிறப்பிக்கப்பட்ட உள்துறை அமைச்சர் சைட் ஹமிட் அல்பாரின் உத்தரவை மறு ஆய்வு செய்வதற்கு சமர்ப்பிக்கப்பட முதல் விண்ணப்பம் இன்னும் காத்துக் கொண்டிருப்பதை ராஜா பெத்ராவின் வழக்குரைஞரான மாலிக் இம்தியாஸ் சர்வார் தமது வலைப் பதிவில் குறிப்பிட்டுள்ளார்.

“ஏட்டளவில் மட்டும் இருப்பதால் அதனை தள்ளுபடி செய்வதா இல்லையா என்பது குறித்து நீதிபதி ஒரு முடிவு எடுக்க வேண்டும். “எங்கள் கண்ணோட்டத்தில் அவ்வாறு முடியாது. ஏனெனில் போலீஸ் பரிந்துரைகளுக்கு இணங்க அமைச்சரால் அந்த உத்தரவு பிறப்பிக்கப்பட்டது”, என மாலிக் கூறினார்

“போலீசாரின் முந்திய தடுப்புக் காவலிலிருந்து அமைச்சர் அந்த உத்தரவை வெளியிட்டுள்ளார்.

“தற்போது, ஆர் பி கே சட்டப்பூர்வமாகத் தடுத்து வைக்கப்பட்டிருக்கிறாரா என்ற கேள்விக்கு முந்திய தடுப்புக் காவலின் சட்டப்பூர்வத் தன்மை முக்கியமானது என்று நாங்கள் கருதுகிறோம்”, என்று அவர் கூறினார். அந்த அம்சம் அக்டோபர் 28 ம் தேதி மேலும் எழுப்பப்படும்.

இரண்டாவது ஹெபியர்ஸ் கார்பஸ் மனு மீதான விசாரணைத் தேதி இன்னும் நிர்ணயிக்கப்படவில்லை என்று மாலிக் சொன்னார்.

ஹரிராயாவுக்குப் பின்னர் அது தெரியும் என எதிர்பார்ப்பதாக அவர் தெரிவித்தார்.

“உயர் நிலையில் உள்ள அரசாங்கத் தலைவர்கள் மீது சரமாரியாக கண்டனக் கணைகளை தொடுத்ததால் ராஜாபெத்ரா புகழ் பெற்றுள்ளார்.”

அவர் முஸ்லிம்களிடையே உணர்வுகளைத் தூண்டக் கூடியவை எனக் கருதப்பட்ட கட்டுரைகளை எழுதியதற்காக அவர் தடுத்து வைக்கப்பட்டுள்ளார்.