உந்தன் மின்னல் பர்வை ஒன்றிற்காக!

**ரிபாஸ்** · **ரிபாஸ்** Thu Feb 25, 2010 10:46 am

உந்தன் மின்னல் பர்வை ஒன்றிற்காக!

உன்
சந்திரப் பார்வைக்குள்
சிக்கித் தவிக்கிறேன்

என்னை நீ பார்த்த
அந்த
ஒரே பார்வையில்
என் சுவாசங்களை
உனக்கே தந்துவிட்டேன்

உறங்கும்போதும்
என்
மனக்கண்
விழித்துக் கொண்டிருக்கிறது

காதலின் ஆரம்பம்
கைதுசெய்து
வைத்த
கனாக்கள் இவை

உறக்கத்தைத் தொலைத்துவிட்டு
இப்போதெல்லாம்
கனவுகளுக்காகவே
உறங்குகிறேன்

இப்போதெல்லாம்
மௌனம் குடிகொண்டிருக்கும்
என்
அறைக்குள்
என் இமைகள் படபடக்கும்
சப்தமே கேட்கிறது

அந்த
ஐன்னலுக்குத் தான் தெரியும்
என் காத்திருப்பின் களைப்பு

உன்னைக்
காணாத ஏக்கத்தால்
என் பெருமூச்சும் என்னை
குளிர்காய வைத்துள்ளது

உன்னைக் காணாத தவிப்பால்
மூச்சுக் காற்றும்
காற்றோடல்லவா
கலக்கிறது

நிமிடம் நகர்வது தெரியாமல்
அசையாமல்
உட்கார்ந்திருக்கிறேன்

உந்தன் மின்னல் பார்வை ஒன்றிற்காக
உயிரை
அள்ளி பூவாய் தூவுகிறேன்

ரகசியமாய் எரிகின்ற
காதல் தீயால்
என்
முகத்திலோ முத்தான வியர்வைகள்

அதோ உனக்காகக் காத்திருந்த
என்
மௌனத்தைக் கலைத்து விட்டாய்
உன் வரவால் வசந்த நினைவுக்குள்
என்
நெஞ்சம் புதைகிறது

அந்த ஒரே நொடிப் புன்னகைக்குள்
லட்சம்
மின்னல்கள் தெரிகிறது

இன்னும் எத்தனை நாட்களுக்குத் தான்
இப்படி
நான் ஏங்குவது

காதல் அது தரும்
ரகசிய அவஸ்தையின்
தவிப்பு
இது!