மசூதியில் பெண்களை அனுமதிக்க சுப்ரீம் கோர்ட்டில் மனு

புதுடில்லி:
மசூதிகளில் பெண்கள் தொழுகை நடத்த அனுமதிக்கக் கோரி, பத்திரிகையாளர், ஜியா உஸ் சலாம் என்பவர், உச்ச நீதிமன்றத்தில் மனு தாக்கல் செய்துள்ளார்.

கடந்த ஆண்டு, யாஸ்மீன் சுபேர் அகமது பீர்சாதி என்பவர், 'மசூதியில் பெண்களை அனுமதிக்க வேண்டும்; அனுமதி மறுப்பது, அரசியல் சாசனத்திற்கு எதிரானது' என, உச்ச நீதிமன்றத்தில் மனு தாக்கல் செய்திருந்தார்.இந்த மனுவுடன் சேர்த்து விசாரிக்கக் கோரி, ஜியா உஸ் சலாம் நேற்று, உச்ச நீதிமன்றத்தில் ஒரு மனு தாக்கல் செய்தார்.

அதில் கூறப்பட்டுள்ளதாவது

:மெக்கா, மதினாவில், ஆணும், பெண்ணும் தொழுகை நடத்த அனுமதிக்கப்படுகிறது. மேற்கு ஆசியா, ஐரோப்பா மற்றும் அமெரிக்காவில் உள்ள மசூதிகளில், பெண்கள் தொழுகை நடத்துகின்றனர்

.ஆனால், இந்தியாவில் பெண்கள் மசூதியில் நுழைய வெளிப்படையான தடை இல்லை என்றபோதிலும், மறைமுகமான தடை உள்ளது.
இதை, மசூதியின் கட்டுமானத்தில் புரிந்து கொள்ளலாம். இங்கு, பெண்களுக்கு என, தனி நுழைவாயில் கிடையாது. தொழுகைக்கு முன், கை, கால் கழுவுவது உள்ளிட்ட வசதிகளும் தனியே இல்லை.

பெண்கள், மசூதியில் வெறும் உறுப்பினர்களாக மட்டுமே உள்ளனர்.இது, இஸ்லாமிய நெறிமுறைகளுக்கு எதிரானது. 'இந்தியாவில் ஆணும், பெண்ணும் சமமாக நடத்தப்பட வேண்டும்' என, அரசியல் சாசனம் அளித்துள்ள உறுதிமொழியை மீறுவதாகும்.
நபிகள் நாயகம், பெண்கள் மசூதியில் தொழுகை செய்ய அனுமதித்துள்ளார்.

மசூதியில் பெண்கள் நுழையக் கூடாது என, எந்த இடத்திலும், இஸ்லாமியரின் மறை நுாலான குரான் கூறவில்லை. எனவே, மசூதியில் பெண்களையும் தொழுகை நடத்த உத்தரவிட வேண்டும்.இவ்வாறு, அதில் கூறப்பட்டுள்ளது.

இந்த மனுவுடன், சபரிமலையில் அனைத்து வயது பெண்களையும் அனுமதிப்பது உட்பட, மதம் சார்ந்த அனைத்து மனுக்களும், உச்ச நீதிமன்றத்தின் ஒன்பது நீதிபதிகள் அடங்கிய அமர்வு முன். பிப்ரவரி முதல் வாரம், விசாரணைக்கு வரும் என, எதிர்பார்க்கப்படுகிறது.

தினமலர்