தொடரை இழந்தது இந்தியா; மழையால் போட்டி ரத்து

-
லாடர்ஹில்:
-
இரண்டாவது 'டுவென்டி-20' போட்டி மழையால் பாதியில்
கைவிடப்பட்டது. இதனையடுத்து 2 போட்டிகள் கொண்ட
தொடரை இந்திய அணி 0-1 என பரிதாபமாக இழந்தது.

அமெரிக்கா சென்ற இந்தியா, வெஸ்ட் இண்டீஸ் அணிகள்
2 போட்டிகள் கொண்ட சர்வதேச 'டுவென்டி-20' தொடரில்
பங்கேற்றன. முதல் போட்டியில் இந்தியா தோல்வி அடைந்தது.
நேற்று, 2வது போட்டி புளோரிடாவில் உள்ள லாடர்ஹில்
மைதானத்தில் நடந்தது.

மிஸ்ரா வாய்ப்பு:
-------------
இந்திய அணியில் 'ஆல்-ரவுண்டர்' ஸ்டூவர்ட் பின்னி நீக்கப்பட்டு
சுழற்பந்துவீச்சாளர் அமித் மிஸ்ரா சேர்க்கப்பட்டார்.
வெஸ்ட் இண்டீஸ் அணியில் மாற்றம் எதுவும் செய்யப்படவில்லை.
'டாஸ்' வென்ற இந்திய அணி கேப்டன் தோனி, மீண்டும் 'பீல்டிங்'
தேர்வு செய்தார்.

மிஸ்ரா அசத்தல்:
வெஸ்ட் இண்டீஸ் அணிக்கு லீவிஸ் (7) ஏமாற்றினார். முகமது ஷமி
வீசிய 4வது ஓவரில் ஒரு சிக்சர், 2 பவுண்டரி அடித்த சார்லஸ்,
43 ரன்கள் எடுத்து அமித் மிஸ்ராவிடம் சரணடைந்தார். அஷ்வின்
'சுழலில்' சிம்மன்ஸ் (19), சிக்கினார். பும்ரா 'வேகத்தில்'
சாமுவேல்ஸ் (5), பிளட்சர் (3) அவுட்டாகினர். போலார்டு (13),
டுவைன் பிராவோ (3), ஆன்ட்ரி ரசல் (13) ஏமாற்றினர். கேப்டன் கார்லஸ்
பிராத்வைட் (18) பெரிய அளவில் சோபிக்கவில்லை.
பத்ரி (1) நிலைக்கவில்லை. வெஸ்ட் இண்டீஸ் அணி 19.4 ஓவரில்
143 ரன்களுக்கு 'ஆல்-அவுட்' ஆனது. சுனில் நரைன் (9) அவுட்டாகாமல்
இருந்தார். இந்தியா சார்பில் மிஸ்ரா 3, அஷ்வின், ஷமி, பும்ரா தலா
2 விக்கெட் கைப்பற்றினர்.

மழை குறுக்கீடு:
சுலப இலக்கை விரட்டிய இந்திய அணிக்கு ரோகித் சர்மா, அஜின்கியா
ரகானே ஜோடி நல்ல துவக்கம் தந்தது. இந்திய அணி 2 ஓவரில் விக்கெட்
இழப்பின்றி 15 ரன்கள் எடுத்திருந்த போது மழை குறுக்கிட்டதால்,
ஆட்டம் நிறுத்தி வைக்கப்பட்டது. தொடர்ந்து மழை பெய்ததால் போட்டியை
நடத்த முடியாத சூழ்நிலை ஏற்பட்டது.இதனால் போட்டியை பாதியில்
ரத்து செய்வதாக அம்பயர்கள் அறிவித்தனர்.

இதனை ஏற்றுக் கொண்ட இரு அணி கேப்டன்களும் ஒருவருக்கு ஒருவர்
கை குலுக்கிக் கொண்டனர்.

இதனையடுத்த இரண்டு போட்டிகள் கொண்ட 'டுவென்டி-20' தொடரை
இந்திய அணி 0-1 என இழந்தது. வெஸ்ட் இண்டீஸ் அணி கோப்பை
வென்றது.
-
------------------------------------
தினமலர்