கருணாநிதி பிறந்த நாள் : "அம்மா' உணவகத்தில் இலவச உணவு!

வேலூர்: கருணாநிதி பிறந்த நாளுக்கு, "அம்மா' உணவகத்தில் இலவச உணவு வழங்கப்பட்டது.வேலூர் மாநகராட்சியில், 10 இடங்களில் அம்மா உணவகம், கடந்த, 2ம் தேதி துவங்கப்பட்டது. முதல் நாள், 3,806 பேருக்கு சாம்பார் சாதம், தயிர் சாதம் விற்பனை செய்யப்பட்டது.

சத்துவாச்சாரியில் உள்ள, பீடி தொழிலாளர்கள் குடியிருப்பு அருகில், அம்மா உணவகம் உள்ளது. நேற்று காலை, 7:00 மணிக்கு காலை டிபன் வாங்க நீண்ட க்யூ வரிசையில் பொது மக்கள் காத்திருந்தனர். அப்போது, கவுன்டரில் இருந்த மகளிர் குழுவை சேர்ந்தவர்கள், பணம் வாங்காமல் டோக்கன் கொடுத்தனர்.வேலூர் மாநகராட்சி, 20வது வார்டு, தி.மு.க., கவுன்சிலர், சசி குமார் சார்பில், கருணாநிதியின், 90வது பிறந்த நாளையொட்டி, அம்மா உணவகத்தில் மொத்தமாக பணம் கொடுத்து, டோக்கன் வாங்கியதால், இலவசமாக வழங்கியது தெரிந்தது.அதே போல, மதியம் சாம்பார் சாதம், தயிர் சாதத்துக்கு, கவுன்சிலர் மொத்தமாக டோக்கன் வாங்கி, அனைவருக்கும் இலவசமாக கொடுத்தார். இந்த தகவல் அறிந்த அப்பகுதி, அ.தி.மு.க.,வினர், வாக்கு வாதம் செய்தனர்.

சத்துவாச்சாரி மண்டல அலுவலர், விசாரணை நடத்தி, "இனிமேல் மொத்தமாக டோக்கன் கொடுக்கக் கூடாது' என, மகளிர் சுய உதவிக்குழுவினரை எச்சரித்தார்.வேலூர், எம்.எல்.ஏ., அலுவலகத்துக்கு பக்கத்தில் உள்ள அம்மா உணகவகம் தவிர, மற்ற ஒன்பது இடங்களில் உள்ள அம்மா உணவகங்களில், இதே போல, தி.மு.க., வினர் மொத்தமாக டோக்கன் வாங்கி, கருணாநிதி பிறந்த நாளுக்காக, பொது மக்களுக்கு இலவசமாக வழங்கினர்.நேற்று ஒரே நாளில், 14,809 இட்லி, 3,525 சாம்பார் சாதம், 2,007 தயிர் சாதம் என, மொத்தம், 38,455 ரூபாய்க்கு விற்பனை நடந்துள்ளது.

நன்றி : தினமலர்