கல்வியும் பெரும் செல்வமே !

பூர்ணகுரு · பூர்ணகுரு Fri 29 Mar 2013 - 14:51

மின்வெட்டு தாக்கிய இரவு அது

விளக்கேற்ற அன்னையின் கையில் தீப்பெட்டி

பற்ற வைத்தத் தீக்குச்சி பட்டு

பற்றி எரிந்தது மெழுகுவர்த்தி

அவ்வொளி அறை முழுதும்

வெளிச்சம் வார்த்தாலும் மகள்

படிக்க ஏதுவானதாக அமையவில்லை

மீண்டும் சில மெழுகுகளை

ஏற்றி வைத்தாள் அன்னையவள்

இம்முறை தீப்பெட்டி இல்லை

தீக்குச்சி இரையாக்கப் படவில்லை !

மாறாக ,

முதல் ஏற்றிய மெழுகுவர்த்தி தீபத்திலே

மீண்டும் மீண்டும் பற்றவைக்கப்பட்டது

அன்னையின் போக்கு விசித்திரமாய் இருந்தது

மகளான சிறுமியவளுக்கு

கேட்டே விட்டாள்

ஏனம்மா இம்முறை தீக்குச்சித் துணை தேடவில்லை ...?

அன்பு மகளுக்கு அர்த்தம் புரிய

கண்ணம்மா முதல் தீப்பொறி எழ

ஓர் தீக்குச்சி மட்டும் போதும்

அச்சிறு தீப்பொறியின் உதவியிலே

பல தீப்பொறிகள் உண்டாகி ஜுவாலை உருவாக்கலாம்

மீண்டும் மீண்டும் தீக்குச்சிகள் வீணாக்கப்பட வேண்டியதில்லையே !

மேலும் ,

கல்வியும் அது போலதான் கண்மணி

ஒருவர் தான் கற்றதை

பிறருக்கு கற்பித்தால் பேரறிவு கொண்ட

உலகை உருவாக்கலாம் என் செல்லமே

உன்னைப் போல் கல்வியும் பெரும் செல்வமே !

இப்பொழுது,

ஒளிர்ந்தது ஒளி மட்டுமல்ல மகளின் மனமும் தான் !