சச்சின்-காம்ப்ளி சாதனை எரிப்பு

மும்பை: சச்சின், காம்ப்ளி இணைந்து, பள்ளி அளவிலான போட்டியில் ஏற்படுத்திய சாதனை ஆவணங்களை கரையான் அரித்ததால் எரிக்கப்பட்டன.
இந்திய அணியின் மாஸ்டர் பேட்ஸ்மேன் சச்சின், 39. சர்வதேச டெஸ்ட், ஒரு நாள் போட்டிகளில் சதத்தில் "சதம்' அடித்தவர். சர்வதேச போட்டிகளில் மட்டுமன்றி, பள்ளி அளவிலான போட்டிகளிலும் பல சாதனைகள் படைத்துள்ளார்.
இவரும், வினோத் காம்ப்ளியும் சாராதாஸ்ரம் வித்யாமந்திர் பள்ளியில் படித்தனர். மும்பை பள்ளிகள் விளையாட்டு சங்கம் (எம்.எஸ்.எஸ்.ஏ.,) சார்பில் ஹாரிஸ் ஷீல்டு கோப்பை கிரிக்கெட் நடந்தது.
வரலாற்று சாதனை:
இதில், செயின்ட் சேவியர் அணிக்கு எதிரான போட்டியில், சச்சின் - காம்ப்ளி இணைந்து 1988, பிப்., 24ல், 664 ரன்கள் சேர்த்து சாதித்தனர். இது உலகிலுள்ள எவ்வகை கிரிக்கெட்டிலும், எந்த ஒரு விக்கெட்டுக்கும் எடுக்கப்பட்ட அதிகபட்ச ரன். பின், 2007ல் மனோஜ் குமார், முகமது ஷாபாஸ் சேர்ந்து 721 ரன்கள் எடுத்து இதை முறியடித்தனர்.
"ஷீட்' எரிக்கப்பட்டன:
இதனிடையே, எம்.எஸ்.எஸ்.ஏ.,ல் பாதுகாக்கப்பட்டு வந்த, சச்சினின் சாதனைக்கான "ஸ்கோர் ஷீட்டை' இப்போது எரித்து விட்டார்கள்.
இதுகுறித்து எம்.எஸ்.எஸ்.ஏ., செயலர் எச்.எஸ்.போர் கூறுகையில்,"" எங்களைப் பொறுத்தவரை, மற்ற ஆவணங்கள் போலத் தான் இதுவும். சில ஆண்டுகளுக்கு முன், கரையான் அரித்து விட்டது. 25 ஆண்டுகள் ஆகிவிட்டதால், வைத்திருக்க இடமில்லை,'' என்றார்.
பலத்த எதிர்ப்பு:
வரலாற்று சான்றாக இருக்க வேண்டிய ஆவணத்தை எரித்த, எம்.எஸ்.எஸ்.ஏ., செயல், கிரிக்கெட் ஆர்வலர்கள் இடையே கொந்தளிப்பை ஏற்படுத்தியுள்ளது. இதற்குப் பதில் அவற்றை "பிரேம்' செய்து சச்சினிடம் பரிசாக கொடுத்திருக்கலாம் அல்லது அலுவலகத்தில் வைத்திருக்கலாம். இப்படி எரித்தது மோசமான செயல் என, பலர் தெரிவித்தனர்.
சாராதாஸ்ரம் பள்ளி தலைமை ஆசிரியர் கிருஷ்ணன் ஷர்சத் கூறுகையில்,"" இதை எப்படி ஏற்றுக்கொள்வது என்றே தெரியவில்லை. வரலாற்று ஆவணங்களை பாதுகாக்க வேண்டிய பொறுப்பு அவர்களுக்கு உள்ளது,'' என்றார்.
எம்.எஸ்.எஸ்.ஏ., தலைவர் பாதர் ஜூடு கூறுகையில்,"" இது சீரியசான விஷயம். இதை எளிதாக விடமாட்டேன். என்னென்ன ஆவணங்கள் இல்லை என, ஊழியர்களிடம் விசாரிக்கவுள்ளேன். ,'' என்றார்.

நன்றி:தினமலர்

:அடபாவி: :அடபாவி: :அடபாவி: