பாகிஸ்தான் கிரிக்கெட் அணி இந்தியா சென்று விளையாடக்கூடாது: ஐ.சி.சி. முன்னாள் தலைவர் சொல்கிறார்

பாகிஸ்தான் கிரிக்கெட் அணி இந்தியா சென்று விளையாடக்கூடாது: ஐ.சி.சி. முன்னாள் தலைவர் சொல்கிறார்

2008-ம் ஆண்டில் மும்பையில் பாகிஸ்தான் தீவிரவாதிகள் நடத்திய தாக்குதலை தொடர்ந்து இரு நாடுகள் இடையே கிரிக்கெட் போட்டி எதுவும் நடத்த அனுமதி அளிக்கப்படவில்லை. இரு நாட்டு கிரிக்கெட் வாரியங்களும் எடுத்த முயற்சியினால் அரசின் அனுமதியுடன் இரு நாடுகள் இடையே 5 ஆண்டுகளுக்கு பிறகு முதல் முறையாக கிரிக்கெட் போட்டி தொடர் நடக்க இருக்கிறது.

பாகிஸ்தான் கிரிக்கெட் அணி, இந்தியாவில் சுற்றுப்பயணம் செய்து இரண்டு 20 ஓவர் மற்றும் 3 ஒருநாள் போட்டி தொடரில் விளையாடுகிறது. இரு அணிகள் இடையிலான முதலாவது 20 ஓவர் போட்டி பெங்களூரில் வருகிற 25-ந் தேதியும், இரண்டாவது 20 ஓவர் போட்டி ஆமதாபாத்தில் வருகிற 27-ந் தேதியும் நடக்கிறது.

முதலாவது ஒருநாள் போட்டி சென்னையில் வருகிற 30-ந் தேதியும், 2-வது ஒருநாள் போட்டி கொல்கத்தாவில் ஜனவரி 3-ந் தேதியும், 3-வது மற்றும் கடைசி ஒருநாள் போட்டி டெல்லியில் ஜனவரி 6-ந் தேதியும் நடக்கிறது. இந்த நிலையில் பாகிஸ்தான் கிரிக்கெட் அணி, இந்தியா சென்று விளையாடக்கூடாது என்று சர்வதேச கிரிக்கெட் கவுன்சில் (ஐ.சி.சி) முன்னாள் தலைவரும், பாகிஸ்தான் வாரிய முன்னாள் நிர்வாகியுமான இஷான் மணி எதிர்ப்பு தெரிவித்து உள்ளார்.

இது குறித்து அவர் அளித்த பேட்டியில் கூறியதாவது:-

இந்திய சுற்றுப்பயணத்துக்கு பாகிஸ்தான் கிரிக்கெட் வாரியம் ஒப்புக்கொண்டது தவறான முடிவாகும். இது அரசியல் ரீதியாக முடிவு செய்யப்பட்டு இருந்தால், இந்திய அணி, பாகிஸ்தான் வந்து விளையாடுவதையோ? அல்லது பொதுவான இடத்தில் விளையாடுவதையோ உறுதி அளிக்க வேண்டும் என்று பாகிஸ்தான் கிரிக்கெட் வாரியத்தினர் அரசியல்வாதிகளிடம் கேட்டு இருக்க வேண்டும்.

பாகிஸ்தான் அணி இந்தியா சென்று விளையாடக்கூடாது என்பது தான் எனது கருத்தாகும். மும்பை தாக்குதலுக்கு பிறகு பாகிஸ்தான் கிரிக்கெட்டை, சர்வதேச கிரிக்கெட் கவுன்சிலில் இருந்து இந்தியா தனிமைப்படுத்தியது. பொதுவான இடத்தில் இரு நாடுகளும் விளையாடினால் கூட பாகிஸ்தான் கிரிக்கெட் வாரியத்துக்கு அதிக வருவாய் கிடைக்கும் என்பதை அறிந்து இந்திய கிரிக்கெட் வாரியம் அதனை தவிர்த்தது.

இந்த போட்டி தொடர் இந்திய கிரிக்கெட் வாரியம் கனிசமான தொகையை வருவாயாக ஈட்ட உதவுமே தவிர, பாகிஸ்தானில் மீண்டும் சர்வதேச கிரிக்கெட் தொடர்கள் நடக்க உதவுவதாக இருக்காது. தற்போதைய பாகிஸ்தான் கிரிக்கெட் வாரிய நிர்வாகிகளின் செயல்பாடுகள் சரியானதாக இல்லை.

இவ்வாறு அவர் கூறியுள்ளார்.


-மாலை மலர்