உன் தேக பயணத்தில் எனது இதழ்கள்.....

**கரூர் கவியன்பன்** · 23/09/2012

கோடை மழை
தனித்த என் உடல் சூடு
இக்கணத்தில் பல்கிப் பெருக
காண்கிறேன்
மழை நனைத்த
உன் உடல் போர்த்திய
ஆடையில் உனைக் கண்டு

உன் உச்சியில் விழுந்து
நெற்றி வழியே பயணித்து
உன் மூக்கின் வழியே நின்ற
பனித்துளி சொன்னது.......
நானே இந்தப் பிரபஞ்சத்தை வென்றவன் என்று

சப்தமின்றி தொடும் சாரலாக
என் இதழ் பதித்து
உன் உயிரை உறிஞ்சி இருப்பேன்
நீ எழுப்பும் அந்த
ஷ்.. ஷ்.. ஷ்..... என்ற சப்தத்திற்காக

ஆலங்கட்டி மழையாக பொழிந்திருப்பேன்
என் அன்பை...
தோல் போர்த்திய செம்பூவின்
இதழ் வலிக்கும் எனக் கொண்டு
கவனமாகவே பயணிக்கிறேன்
உன் தேக பயணத்தில்
எனது இதழ்கள்....