திருமந்திரம் – இறைவனால் மீட்டெடுக்கப்பட்ட தமிழ் ஆகமம்!

ஏறத்தாழ 3 பெரிய கடற்கோள்களால் தமிழ்நாட்டின் பெரும்பகுதி கடலில் மூழ்கியது என்று உரிய நூல்களால் அறியவருகிறோம். கடற்கோள் களுக்கெல்லாம் முன்னால் இப்போதைய குமரிமுனைக்குக் கீழே ஏழு தமிழ்நாடுகள் இருந்ததாக இறையனார் களவியலும், சிலப்பதிகார உரையாசிரியரான அடியார்க்கு நல்லார் உரையும் எடுத்துக்காட்டுகின்றன. இந்த ஏழு நாடுகளின் அழிவில் கடலில் மூழ்கி அழிந்த தமிழ் நூல்கள் பல. அவற்றுள் ஒன்று ஆகமம்.

பேரழிவினால் கட்டடங்கள் மறைந்தன; காட்சிகள் மாறின என்பதெல்லாம் ஒருபுறமிருக்க, தமிழர்களின் உயிரோட்டமான பண்பாட்டுக் கூறுகள் அடங்கிய ஆகமம் சிதைந்து சின்னாபின்னமான பெருங்கொடுமை. இக்கடல் கோள்களுக்குத் தப்பி உயிர்பிழைத்தோர்கள் நினைவில் தங்கிய ஆகமங்களின் கூறுகளே பின் தொடர்ந்தன. அவையும் காலக்கோளாறினால் பல சிதைவுகளைப் பெற்றன. இந்த நிலையில் தான் சொன்ன ஆகமத்தை மீண்டும் மீட்டெடுக்க இறைவன் திருமூலரைப் பயன்படுத்தினான் என்று அவருடைய வரலாறு கூறுகிறது.

திருமூலர் வரலாறு:
இமயமலைச் சாரலிலிருந்து மிகப்பழைமையான காலத்தில் ஒரு முனிவர் தெற்கே பொதிகை நோக்கிப் புறப்பட்டார். அவர் பெயர் சுந்தரநாதர். பொதிய மலையில் அக்காலத்திலிருந்த அகத்தியரை (வடமொழி அகஸ்தியர் அல்ல) அவர் சந்திக்கப் புறப்பட்டார். இந்த நெடும்பயணத்தில் தெற்கே திருவாவடுதுறைக்கு அருகே சாத்தனூர் என்ற ஊர் அருகில் ஒரு மேய்ச்சல் நிலத்தைத் தாண்டி வந்து கொண்டிருக்கும் போது அவருக்கு ஒரு புதுமையான காட்சி தென்பட்டது.

மேய்ந்து கொண்டிருந்த மாடுகள் எல்லாம் கூடி ஓர் இடத்தில் வட்டமிட்டு நின்று கொண்டிருந்தன. எட்டிப்பார்த்தபோது நடுவே ஒரு மனிதன் இறந்து கிடந்தான். அவனை இந்த மாடுகள் உடலெங்கும் நக்கிக் கொடுத்தன. அவைகளின் கண்களிலிருந்து நீர் கொட்டிக் கொண்டிருந்தன. இறந்த மனிதன் கையில் கோல் இருந்தது. எனவே, இவன் இந்த மாடுகளை மேய்த்தவனாக இருப்பான் என்றும் திடீரென இறந்துவிட்டதால் அவன்பால் அன்பு கொண்ட மாடுகள் அவன் உடலைச் சூழ்ந்து நின்று நக்கிக் கொடுத்து, அவனது பிரிவால் துயருற்று கண்ணீர் சொரிந்தன என்பதை சுந்தரநாதர் ஊகித்தறிந்தார்.

மாடுகள் அந்த இடையன் மீது காட்டிய அன்பு அவரை என்னவோ செய்தது. உடன் அந்தப் பசுக்களின் துயரைப்போக்க எண்ணம் கொண்டார். தனக்குத் தெரிந்த கூடுவிட்டுக் கூடுபாயும் சித்தியை மாடுகளுக்கு ஆதரவாகப் பயன்படுத்த முனைந்தார். தமது உடலில் இருந்த அந்த இடையனின் உடலில் புகுந்தார். உடன் எச்சரிக்கையாக தமது உடலை ஓரிடத்தில் மறைத்து வைத்துப் பத்திரப்படுத்தினார்.
(தொடரும்) மேல் தகவல்களுக்கு http://www.eegarai.net/t83414-1 , http://www.eegarai.net/t83432-2 படியுங்கள்