சில்லரை வர்த்தகத்தில் அன்னிய முதலீடு: மத்திய அரசு பணிந்தது;

**இளமாறன்** · **இளமாறன்** Tue Dec 06, 2011 1:04 am

புதுடெல்லி, டிச.5-

சில்லரை வணிகத்தில் 51 சதவீத நேரடி அன்னிய முதலீட்டுக்கு மத்திய அரசு அனுமதி வழங்கியது. இதற்கு நாடெங்கும் கடும் எதிர்ப்பு ஏற்பட்டது. கடந்த 1-ந் தேதி இந்தியா முழுவதும் கடையடைப்பு போராட்டம் நடத்தப்பட்டது. சில்லரை வர்த்தகத்தில் அன்னிய முதலீட்டுக்கு அனுமதித்தால் இந்தியாவில் உள்ள வியாபாரிகள் மற்றும் விவசாயிகளின் வாழ்வாதாரம் அழிந்து விடும் என்று, பா.ஜ.க., இடதுசாரி கட்சிகள் எதிர்ப்பு தெரிவித்தன.

எனவே மத்திய அரசு இந்த முடிவை வாபஸ் பெற கோரி பாராளுமன்றத்தில் எதிர்க்கட்சிகள் அமளியில் ஈடுபட்டன. இதனால் பாராளுமன்றம் முடங்கியது. பாராளுமன்றத்தை சுமூகமாக நடத்தினால்தான் முக்கிய மசோதாக்களை நிறைவேற்ற முடியும். எனவே மத்திய அரசு எதிர்க்கட்சிகளுடன் சமரச முயற்சிகளில் ஈடுபட்டது.

இன்று காலை மத்திய நிதி மந்திரி பிரணாப்முகர்ஜி, எதிர்க்கட்சித் தலைவர் சுஷ்மா சுவராஜுடன் பேசினார். சில்லரை வர்த்தகத்தில் நேரடி அன்னிய முதலீடு குறித்து இருவரும் நீண்ட நேரம் விவாதித்தனர். அப்போது பிரணாப்முகர்ஜி, அன்னிய முதலீடு தொடர்பான முடிவை நிறுத்தி வைப்பதாக உறுதியளித்தார்.

அரசியல் கட்சிகளிடம் ஒருமித்த கருத்து ஏற்படும் வரை சில்லரை வர்த்தகத்தில் நேரடி அன்னிய முதலீடு தொடர்பான எல்லா சீர்திருத்தங்களையும் அரசு திரும்பப் பெறும் என்று சுஷ்மாவிடம் பிராணாப்முகர்ஜி கூறினார்.

பிரச்சினைக்கு முற்றுப்புள்ளி வைக்கும் வகையில் இந்த விவகாரத்தில் மத்திய அரசு பணிந்துள்ளது. மத்திய அரசின் முடிவுக்கு மகிழ்ச்சி தெரிவித்த பா.ஜ.க. தலைவர் சுஷ்மாசுவராஜ், இது பற்றி மத்திய அரசு அதிகாரப்பூர்வமாக அறிவிப்பு வெளியிட வேண்டும் என்று கேட்டுக் கொண்டார். அதை நிதி மந்திரி பிரணாப்முகர்ஜி ஏற்றுக் கொண்டார். நாளை மறுநாள் (புதன்கிழமை) பாராளுமன்ற குளிர்காலக் கூட்டத் தொடர் மீண்டும் கூட உள்ளது. அப்போது நிதி மந்திரி பிரணாப்முகர்ஜி, அன்னிய முதலீட்டை நிறுத்தி வைக்கும் முடிவுக்கான அறிவிப்பை வெளியிடுவார் என்று எதிர்பார்க்கப்படுகிறது.

இதனால் 7-ந் தேதி முதல் பாராளுமன்ற இரு அவைகளும் சுமூகமாக நடைபெற வாய்ப்புள்ளது. இதற்கிடையே நிதி மந்திரி பிரணாப்முகர்ஜி அன்னிய முதலீட்டை அனுமதிக்கும் முடிவை நாங்கள் திரும்ப பெறவில்லை. தற்காலிகமாக நிறுத்தி மட்டுமே வைத்துள்ளோம் என்று விளக்கம் அளித்துள்ளார்.

சில்லரை வர்த்தகத்தில் நேரடி அன்னிய முதலீட்டை கொண்டு வந்தே தீருவோம். அதை திரும்ப பெறும் பேச்சுக்கே இடம் இல்லை என்று பிரதமர் மன்மோகன்சிங் மிக,மிக உறுதிபட கூறி வந்தார். இதற்கு கடும் எதிர்ப்பு தெரிவித்த பா.ஜ.க., இடது சாரிகள் உள்ளிட்ட எதிர்க் கட்சிகள் பாராளுமன்றத்தில் எந்த ஒரு அலுவலையும் செய்ய விடமாட்டோம் என்று எச்சரித்தன. ஆளும் கூட்டணியில் உள்ள மம்தா பானர்ஜியும் அன்னிய முதலீட்டுக்கு சம்மதிக்கவில்லை.

மேற்கு வங்க மாநிலத்துக்கு மத்திய அரசு சிறப்பு நிதி ஒதுக்கீடாக ரூ.8 ஆயிரம் கோடி ஒதுக்கீடு செய்து, இந்த சர்ச்சையில் மம்தாவிடம் ஆதரவு பெற முயன்றது. ஆனால் மம்தா பானர்ஜி அன்னிய முதலீட்டை ஆதரிக்க பிடிவாதமாக மறுத்து விட்டார். இப்படி எல்லா தரப்பில் இருந்தும் எதிர்ப்புகள் வலுத்துள்ளதால், பிரதமர் மன்மோகன்சிங் வேறு வழியின்றி எதிர்க்கட்சிகளிடம் பணிந்துள்ளார்

மாலைமலர்

சில்லரை வர்த்தகத்தில் அன்னிய முதலீடு: மத்திய அரசு பணிந்தது;

சில்லரை வர்த்தகத்தில் அன்னிய முதலீடு: மத்திய அரசு பணிந்தது;

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக