கோவையில் வேகமாக பரவும் வைரஸ் காய்ச்சல்

கோவை, நவ. 28-

கோவை அரசு மருத்துவமனை வளாகத்தில் நர்சு பயிற்சி கல்லூரி செயல்படுகிறது. இதில் 550 மாணவிகள் விடுதியில் தங்கி இருந்து பயிற்சி பெற்று வருகிறார்கள். முதலாம் ஆண்டு மற்றும் 3-ம் ஆண்டு படிக்கும் மாணவிகளுக்கு தேர்வு முடிந்து விட்டதால் அவர்கள் அனைவரும் ஊருக்கு சென்று விட்டனர்.

தற்போது 2-வது ஆண்டு படித்து வரும் மாணவிகளுக்கு மட்டும் செய்முறை தேர்வு நடைபெற்று வருகிறது. இதனால் 139 மாணவிகள் மட்டும் தங்கி இருந்தனர்.

இந்த நிலையில் விடுதியில் தங்கி இருந்த மாணவிகள் ஒரு சிலருக்கு லேசான வைரஸ் காய்ச்சல் இருந்தது. இது மளமளவென சக மாணவிகளுக்கும் பரவியது. 26 மாணவிகள் வைரஸ் காய்ச்சலால் பாதிக்கப்பட்டனர். அவர்கள் கோவை அரசு ஆஸ்பத்திரியில் சேர்க்கப்பட்டார்கள். இதில் அங்காள ஈஸ்வரி, தங்கம், பானு, ஆதிலட்சுமி, பாண்டீஸ்வரி, பிரியா ஆகிய 6 மாணவிகளின் உடல் நிலை மோசமானதால் அவர்கள் தீவிர சிகிச்சை பிரிவில் சேர்க்கப்பட்டனர்.

அவர்களுக்கு அங்கு சிகிச்சை அளிக்கப்பட்டு வருகிறது. இதில் அங்காளபரமேஸ்வரி மட்டும் தனியார் ஆஸ்பத்திரிக்கு மாற்றப்பட்டார். வைரஸ் காய்ச்சல் பரவியதை தொடர்ந்து விடுதியில் தங்கி இருந்த மற்ற மாணவிகள் அனைவரும் உடனடியாக அவர்களது ஊருக்கு அனுப்பி வைக்கப்பட்டனர். ஒரு சிலர் மட்டும் இங்கே தங்கி இருந்தனர்.

இந்த நிலையில் இன்று காலை 2-ம் ஆண்டு மாணவி மல்லிகா (19) என்பவர் வைரஸ் காய்ச்சலால் பாதிக்கப்பட்டு அரசு ஆஸ்பத்திரியில் அனுமதிக்கப்பட்டார். கோவை அரசு ஆஸ்பத்திரி வளாகத்தில் வைரஸ் காய்ச்சல் வேகமாக பரவி வருவதால் ஆஸ்பத்திரியில் பணியாற்றும் நர்சுகள் அனைவருக்கும் தடுப்பூசி போடப்பட்டுள்ளது.

மேலும் முகத்தில் மாஸ்க் அணிந்து பணியாற்றுகிறார்கள். தொடர் மழை காரணமாக வைரஸ் காய்ச்சல் பொது மக்களுக்கும் விரைவில் பரவும் அபாயம் ஏற்பட்டுள்ளது. அதனை தடுக்க சுகாதார துறையினர் தடுப்பு நடவடிக்கைகளில் ஈடுபட்டுள்ளனர்.

மாலைமலர்