வவுனியா முகாம் தாக்குதல்: இனிமேல் நடக்காமல் இருக்க நாம் நடவடிக்கை எடுக்கிறோம்:

வவுனியா முகாம் தாக்குதல்: இனிமேல் நடக்காமல் இருக்க நாம் நடவடிக்கை எடுக்கிறோம்: பஸில் தமிழ் கூட்டமைப்பினரிடம் உறுதி

வவுனியா பூந்தோட்டம் அகதி முகாமைச் சேர்ந்த ஒருவர் இராணுவத்தினரால் தாக்கப்பட்ட சம்பவம் குறித்து த.தே. கூட்டமைப்பின் நாடாளுமன்ற உறுப்பினர்கள் நேற்று பஸில் ராஜபக்ஷ எம்.பி. யை சந்தித்து முறையிட்ட போது, அவர் இப்படியான சம்பவங்கள் இனிமேல் நடக்காமல் இருக்க நாம் நடவடிக்கை எடுக்கிறோம் என்று எம்மிடம் கூறினார்.

இது தொடர்பாக தெரியவருவதாவது:-

வவுனியா பூந்தோட்டம் அகதி முகாமைச் சேர்ந்த ஒருவர் இராணுவத்தினரால் தாக்கப்பட்ட சம்பவம் குறித்து தமிழ் தேசியக் கூட்டமைப்பின் நாடாளுமன்ற உறுப்பினர்கள் நேற்று ஜனாதிபதியின் ஆலோசகரும் நாடாளுமன்ற உறுப்பினருமான பஸில் ராஜபக்ஷவை சந்தித்து பேச்சு நடத்தியுள்ளனர்.

நாடாளுமன்றக் கட்டடத் தொகுதியில் இடம்பெற்ற இச்சந்திப்பில் மாவை சேனாதிராஜா தலைமையிலான தமிழ் தேசியக் கூட்டமைப்பின் குழு ஒன்று கலந்து கொண்டது.

இது குறித்து மாவை சேனாதிராஜா எம்.பி. மேலும் தெரிவித்தவை வருமாறு:

வவுனியா பூந்தோட்ட அகதி முகாம் ஒன்றில் இடம்பெற்ற இச்சம்பவம் குறித்து நாம் பஸில் ராஜபக்ஷ எம்.பி. யைச் சந்தித்து கலந்துரையாடினோம்.

அவர் இந்த விடயம் குறித்து சம்மந்தப்பட்ட தரப்பினருடன் பேச்சு நடத்தப்படும் என எம்மிடம் தெரிவித்தார்.

அத்துடன் இப்படியான சம்பவங்கள் இனிமேல் நடக்காமல் இருக்க நாம் நடவடிக்கை எடுக்கிறோம் என்றும் எம்மிடம் பஸில் உறுதி கூறினார்.

இவ்வாறு சேனாதிராஜா தெரிவித்தார்.