குடி தண்ணீர் கேட்டு பெண்கள் ஆவேசம் ! ஆத்தூரில் கமிஷனர் வீடு முற்றுகை !

சேலம் மாவட்டம் ஆத்தூர் பகுதியில் கடந்த சில மாதங்களாக குடி தண்ணீர் கிடைக்காததால் அப்பகுதி பெண்கள் காலி குடங்களுடன் நகராட்சி கமிஷனர் மற்றும் இன்ஜினியர் வீடுகளுக்கு சென்று முற்றுகையிட்டனர். இதனால் அங்கு பரபரப்பு ஏற்பட்டது. ஆத்தூர் நகராட்சியில் மொத்தம் 33 வார்டுகள் உள்ளன. சுமார் 400 க்கும் மேற்பட்ட தெருக்கள் உள்ளன. 63 ஆயிரத்து 220 குடும்பங்கள் வரை வசிக்கின்றனர். ஆத்தூர் நகராட்சி பகுதியில் கடந்த சில மாதங்களாக மக்களுக்கு தேவையான அளவு குடி நீர் கிடைக்கவில்லை. நகராட்சி நிர்வாகம் 10 நாட்களுக்கொரு முறை தண்ணீர் விட்டு வந்தது. இதனால் பல குடும்பங்கள் கடுமையாக பாதிக்கப்பட்டன.


இந்நிலையில் கடந்த 15 நாட்களாக தண்ணீர் வரவே இல்லை. இதனால் கடும் ஆவேசமுற்ற பெண்கள் நூற்றுக்கணக்கானவர்கள் காலி குடங்களுடன் திரண்டனர். கவுன்சிலர் வீடுகளுக்கு சென்றனர். அங்கு கவுன்சிலர் இல்லை. இதனையடுத்து நகராட்சி கமிஷனர் மற்றும் இன்ஜினியர் வீடுகளுக்கு சென்றனர். தண்ணீர் கேட்டு ஆவேசமாக பேசினர். பின்னர் அதிகாரிகள் பெண்களுடன் அமைதிப்பேச்சு நடத்தினர். விரைவில் தண்ணீர் வழங்க ஏற்பாடு செய்கிறோம் என உறுதி கொடுத்தனர். இதனையடுத்து பெண்கள் வீட்டிற்கு திரும்பி சென்றனர்.


காரணம் என்ன ? : ஆத்தூர் பகுதிக்கு மேட்டூர் ஆத்தூர் கூட்டு குடி நீர் திட்டம் மூலம் தண்ணீர் சப்ளை செய்யப்படுகிறது. ஆத்தூருக்கு வரவேண்டிய தண்ணீர் அமைச்சர் தொகுதியான சேலம் (2 ) க்கு திருப்பி அனுப்பப்படுகிறது. இதனால் ஆத்தூர் மக்களுக்கு தண்ணீர் போதிய அளவு கிடைப்பதில்லை. அத்தோடு சமீபத்தில் பெய்த மழையில் இடி தாக்கி அணையில் உள்ள டிரான்ஸ்பார்மர் சேதம் அடைந்தது. இதனால் தண்ணீர் சப்ளைக்கு மின்சாரம் பாதிக்கப்பட்டுள்ளது. இதன் காரணமாக தண்ணீர் விநியோகம் செய்ய முடியவில்லை என அதிகாரிகள் தரப்பினர் கூறுகின்றனர். கோளாறு அடைந்து 10 நாட்கள் கழிந்தும் சரி செய்யப்படாததது ஏன் என இப்பகுதி மக்கள் கேட்கின்றனர்.


தொற்று நோய் பரவும் அபாயம்: குடி நீர் சப்ளை சரியாக கிடைக்காததால் மக்கள் பெரும் சிரமத்திற்குள்ளாகி இருக்கின்றனர். காவரி தண்ணீரில் நகராட்சி நிர்வாகம் கிணற்று நீரை கலந்து விநியோகம் செய்கிறது. இதனால் இங்குள் மக்களுக்கு நோய் பாதிப்பும் ஏற்படுகிறது. குழந்தைகளுக்கு சளி காய்ச்சல் பாதிப்பு அடிக்கடி ஏற்படுகிறது. தண்ணீர் சுவையும் இல்லை , தாகமும் அடங்குவதில்லை. சம்பந்தப்பட்ட அதிகாரிகள் உடனடி நடவடிக்கை எடுக்க வேண்டும் என இப்பகுதி மக்கள் எதிர்பார்க்கின்றனர்.