இந்திய கிரிக்கெட் அணிக்கு ஜனாதிபதி விருந்து

உலகக் கோப்பையை வென்ற இந்திய கிரிக்கெட் அணிக்கு ஜனாதிபதி பிரதீபா பட்டீல் மும்பையில் நேற்று விருந்து அளித்தார்.

உலகக்கோப்பையை வென்றது

கபில்தேவ் தலைமையிலான இந்திய கிரிக்கெட் அணி 1983-ம் ஆண்டு உலகக் கோப்பையை கைப்பற்றியது. அதன்பின்னர் உலகக்கோப்பை என்பது இந்தியாவைப் பொறுத்தமட்டில் கனவாகவே அமைந்தது. இடையில் 2003-ம் ஆண்டு இறுதிப்போட்டி வரை இந்தியா முன்னேறினாலும் ஆஸ்திரேலியாவிடம் தோற்றுப்போனது. அதன்பின்னர் நமக்கு வாய்ப்பு இல்லாமல் போனாலும் இந்த ஆண்டு இந்திய அணி உலகக்கோப்பையை கைப்பற்றி விடும் என நாட்டின் 121 கோடி மக்களும் கனவு கண்டனர்.

இந்தக் கனவை டோனி தலைமையிலான இந்திய அணி நேற்று முன் தினம் மும்பை வான்கடே மைதானத்தில் நடந்த இறுதிப்போட்டியில் இலங்கையை வீழ்த்தி நனவாக்கியது.

முதல் விருந்து

இந்தப் போட்டியை ஜனாதிபதி பிரதீபா பட்டீல் நேரில் கண்டு மகிழ்ந்தார். இந்திய அணி, குழுவாகப் பணியாற்றி பிரமிக்கத்தக்க அளவு செயல்பட்டு, இலங்கையை வீழ்த்தி உலகக்கோப்பையைக் கைப்பற்றியதில் அவர் மகிழ்ச்சியை வெளிப்படுத்தி, இந்திய வீரர்களுக்கு பாராட்டு தெரிவித்தார்.

இந்த நிலையில் உலகக்கோப்பையை கைப்பற்றிய இந்திய அணிக்கு முதன் முதலாக அதிகாரப்பூர்வமான விருந்து அளித்த பெருமையையும் ஜனாதிபதி பிரதீபா பட்டீல் தட்டிச்சென்றார்.

மும்பையில் விருந்து

மும்பையில் கவர்னர் மாளிகையில் ஜனாதிபதி பிரதீபா பட்டீல் நேற்று இந்திய அணிக்கு சிறப்பு தேனீர் விருந்து அளித்தார். இந்த விருந்தில் இந்திய அணியின் தலைவர் மகேந்திரசிங் டோனியும், அவரது அணியினர் அனைவரும் கலந்துகொண்டனர்.

இந்த விருந்து நிகழ்ச்சியில் மராட்டிய கவர்னர் கே. சங்கரநாராயணன், முதல் மந்திரி பிரிதிவிராஜ் சவான், அவரது மந்திரிசபை சகாக்கள் கலந்து கொண்டனர். விருந்தின்போது உலகக்கோப்பை வென்ற இந்திய அணியினரை ஜனாதிபதி பாராட்டி மகிழ்ந்தார். அத்துடன் அவர் இந்திய அணியினருடன் குரூப் போட்டோ எடுத்துக்கொண்டார்.

தினதந்தி!

இந்திய வீரர்கள் அனைவரும் வெற்றிக்களிப்பில் உள்ளனர்...... இதேபோல் தொடர்ந்து வரும் போட்டிகளிலும் ஜெயிக்க வேண்டும்