அமெரிக்கப் படைகளின் கொடூர தாக்குதலால் வரைபடத்திலிருந்து அழிந்துள்ள ஆப்கான் கிராமம்

தலிபான் போராளிகளை ஒழிப்பதற்காக அமெரிக்க இராணுவத்தால் ஆப்கானிஸ்கானின் கந்தஹார் மாநிலத்திலுள்ள கிராமம் ஒன்றின் மீது நடத்தப்பட்ட கொடூர தாக்குதலைத் தொடர்ந்து அக்கிராமமே வரைபடத்திலிருந்து முழுவதுமாக நீக்கப்பட்டுள்ளதாக லண்டனிலிருந்து வெளிவந்த ஊடக அறிக்கையொன்றில் குறிப்பிடப்பட்டுள்ளது.
ஆர்கந்தார் ஆற்றுப்பள்ளத்தாக்குக்கு அருகிலுள்ள கந்தஹார் மாநிலத்தின் தரோக் கொலாச் என்ற கிராமமே வரைபடத்திலிருந்து முற்றாக அழிக்கப்பட்டுள்ளதாக டெய்லிமெயில் பத்திரிகை கூறியுள்ளது.

அக்கிராமத்தை தமது கட்டுப்பாட்டின் கீழ் கொண்டுவந்த தலிபான்கள் வீட்டுத்தயாரிப்பு குண்டுகள்,நவீன வெடிபொருட்களுடன் கூட்டுப் படைகளுடன் மோதல் நடவடிக்கைகளில் ஈடுபட்டுள்ளனர்.

இக்கிராமத்திலுள்ள தலிபான்களை அழிப்பதற்காக மேற்கொள்ளப்பட்ட இரு தாக்குதல்களில் இரு தரப்பினரிலும் பாரிய இழப்புகள் ஏற்பட்டபின் அக்கிராமத்தை தகர்க்குமாறு கூட்டுப்படை அதிரடிப்படை 1320 இன் தளபதி லெப்ரினன்ட் கேணல் டேவிட் பிளைன் உத்தரவிட்டுள்ளார்.

வீட்டுத்தயாரிப்பு கைக்குண்டுகள் விதைக்கப்பட்ட அக்கிராமத்தினை சுத்திகரிப்பதற்கு கூட்டுப்படைகள் அஞ்சுகின்றன. அப்பகுதிக்குச் சென்றால் மரணம் நிச்சயம் எனக் கருதப்படுவதே இதற்குரிய காரணமாகுமென இராணுவ ஆய்வாளர் ஒருவர் தனது பதிவுத்தளத்தில் (புளொக்) குறிப்பிட்டுள்ளார்.

இதனால் கண்ணிவெடி அகற்றும் பிரிவினர் பணிகளை ஆரம்பித்திருப்பதாகவும் கூறப்பட்டுள்ளது.

இங்கு மேற்கொள்ளப்பட்ட தாக்குதல்களில் பொதுமக்கள் எவரும் கொல்லப்படவில்லையென டெய்லிமெயில் தெரிவித்துள்ளபோதிலும் அங்கு 25 தொன் நிறையுள்ள வெடிபொருட்கள் தாக்குதலுக்காகப் பயன்படுத்தப்பட்டிருப்பதாகத் தெரிவிக்கப்படுகிறது.

எனினும் மோசமான இத்தாக்குதல்கள் காரணமாக கூட்டுப்படை ஆப்கானிஸ்தானிய உறவுகளில் விரிசல் ஏற்படும் எனக் கருதப்படும் நிலையில், அழிவடைந்த பகுதிகளில் புனரமைப்பு நடவடிக்கைகளை மேற்கொள்வதற்காக ஒரு மில்லியன் அமெரிக்க டொலர் ஒதுக்கப்பட்டுள்ளதாகத் தெரிவிக்கப்படுகிறது.

விடுப்பு குலுமம்