மழையை பயன்படுத்தி உழைத்த இளைஞர்கள்!

வவுனியா மாவட்டத்தில் நேற்று பெய்த கடும் மழையை பயன்படுத்தி இளைஞர்கள் சிலர் நன்றாக இன்று காலை முதல் பணம் சம்பாதித்தனர். வெள்ளம் காரணமாக செட்டிக்குளத்தில் இருந்து பூவரசங்குளம் ஊடாக வவுனியா செல்லும் பிரதான பாதை ஊடான போக்குவரத்துகள் இன்று மதியம் வரை பாதிக்கப்பட்டு இருந்தன.

குறிப்பாக செட்டிக்குளம் பிரதேச செயலக பிரிபுக்கு உட்பட்ட கந்தசாமிநகர் பகுதியில், வீதியின் குறுக்காக மழை நீர் பாய்ந்திருந்தது. இதனால் இப்பாதையூடான போக்குவரத்துகள் யாவும் ஸ்தம்பிதம் அடைந்து இருந்தன. இச்சந்தர்ப்பத்தைப் பயன்படுத்திக்கொண்ட அப்பகுதி இளைஞர்கள் சிலர் வருமானம் ஈட்டும் முயற்சியில் ஈடுபட்டு வெற்றியும் கண்டனர்.

25 அடி நீளமான வீதியின் பகுதியை வீதி ஊடாக அலுவலர்கள் மற்றும் பயணிகளையும், வாகனங்களையும் இவர்கள் தூக்கிச் சென்றனர். காலை 6 மணி அளவில் ஒரு மோட்டார் சைக்கிளை மறுபக்கம் தூக்கிக்கொண்டு செல்கின்றமைக்கு கூலியாக 500 ரூபாய் வரை பெறப்பட்டது.

எனினும் இவ்வேலையில் ஈடுபட்ட இளைஞர்கள் தொகை அதிகமானமையால் ஒரு மோட்டார் சைக்கிளை மறுபக்கம் கொண்டு செல்கின்றமைக்கான கூலியாக 200 ரூபாயும், ஒரு முச்சக்கர வண்டியை கொண்டு செல்கின்றமைக்காக 400 ரூபாயும் பின்னர் அறவிடப்பட்டது. அதேவேளை ஒரு நபரை தூக்கிக் கொண்டு போய் அடுத்த பக்கம் சேர்க்கின்றமைக்காக 100 ரூபாய் அறவிடப்பட்டடது.

இளைஞர்கள் இரு அணியினராக செயற்பட்டு இருந்தனர். வீதியின் செட்டிக்குளம் பக்கமாக நின்ற அணியினர் 27 மோட்டார் சைக்கிள்களையும், வவுனியா பக்கமாக நின்ற அணியினர் 24 மோட்டார் சைக்கிள்களையும் ஒரு பக்கத்திலிருந்து மறு பக்கத்துக்கு தூக்கிச் சென்றிருக்கின்றனர்.

தூக்கிச் செல்லப்பட்டவர்களில் அநேகமானோர் அரச உத்தியோகத்தர்களும், வியாபாரிகளும் ஆவர். இவர்கள் பணம் கொடுத்தமை பற்றி கவலைப்பட்டு இருக்கவில்லை. மாற்று வழியில் பயணத்தைத் தொடர்ந்து இருந்தால் 35 கிலோ மீற்றருக்கும் அதிகமான தூரம் பயணம் செய்யவேண்டி ஏற்பட்டு இருக்கும், நேரம் வீண் விரயம் ஆகி இருக்கும் என்றார்கள்..

அருமை ................