மருத்துவர்களின் அறுவை சிகிச்சை விளம்பரம் கூடாது

நிசாந்தன் · நிசாந்தன் Thu Oct 28, 2010 10:28 am

தங்களிடம் வந்து அறுவைச் சிகிச்சை செய்துகொள்ளுமாறு மருத்துவர்கள் விளம்பரங்கள் செய்யக் கூடாது என தேசிய நுகர்வோர் குறை தீர்வு ஆணையம் கூறியுள்ளது.

இதுபோன்ற விளம்பரங்களை மருத்துவர்கள் வெளியிடுவது நியாயமற்ற வணிக நடவடிக்கை என்றும் அந்த அணையம் கூறியுள்ளது.

3 நாளில் முடி வளர வைக்கும் அற்புத அறுவைச் சிகிச்சை, முடங்கிக் கிடப்பவரையும் ஒலிம்பிக்கில் ஓடவைக்கும் சிகிச்சை போன்ற நம்பமுடியாத வாக்குறுதிகள் அடங்கிய சில விளம்பரங்களை மருத்துவர்கள் என்ற பெயரில் சிலர் வெளியிட்டிருப்பார்கள்.

இவற்றில் பல போலியானவை. ஆனால், இவற்றை நம்பி ஏமாற்றமடைபவர்களும், உடல்நிலை பாதிப்புக்கு உள்ளானவர்களும் மிக அதிகம்

இது போன்ற வழக்கு ஒன்று தேசிய நுகர்வோர் குறை தீர்வு ஆணையத்துக்கு வந்தது. அதில் உத்தரபிரதேசத்தைச் சேர்ந்த சுரேந்திரகுமார் தியாகி என்பவர் மருத்துவர் ஒருவரின் தவறான சிகிச்சையால் தனது சிறுநீரகங்கள் பாதிக்கப்பட்டுள்ளதாக குற்றம்சாட்டியிருந்தார்.

மீரட்டைச் சேர்ந்த மருத்துவர் சர்மா என்பவர் தன்னை அறுவைச் சிகிச்சை செய்வதில் முதுநிலைப்பட்டம் பெற்றவர் என்று விளம்பரம் செய்திருந்தார். அதனை நம்பி அவரிடம் அறுவைச் சிகிச்சை செய்துகொண்டேன். இதில் எனது சிறுநீரகங்கள் பாதிக்கப்பட்டுவிட்டன என்று அவர் கூறியிருந்தார்.

இதனை விசாரித்த தேசிய நுகர்வோர் குறை தீர்வு அணைய உறுப்பினர்கள் ஆர்.சி. யெயின், சந்திரா ஆகியோர் கூறியது :

மருத்துவம் என்பது மிகவும் புனிதமான சேவை செய்யும் தொழில். அதில் போலியான விளம்பரங்களை கொடுத்து சிகிச்சைக்கு வருபவர்களை ஏமாற்றுவ்தை எவ்விதத்திலும் ஏற்றுக்கொள்ள முடியாது.

மருத்துவர்கள் விளம்பரங்களை வெளியிடுவது ஒரு நியாயமற்ற வணிக நடவடிக்கை. இது போன்ற செயல்களில் மருத்துவர்கள் ஈடுபடக்கூடாது.

பலர் மருத்துவருக்கு படிக்காமலேயே மருத்துவர் என்று கூறிக்கொண்டு மருத்துவம் செய்கின்றனர். இது மிகவும் தவறானது. எம்.பி.பி.எஸ். படித்தவர்களும், அறுவைச் சிகிச்சை துறையில் சிறப்புப்பட்டம் பெற்றவர்களும் மட்டுமே அறுவை சிகிச்சைகளை மேற்கொள்ள வேண்டும் என்று கூறினர்.

மேலும் மருத்துவரால் பாதிக்கபட்ட சுரேந்திரகுமார் தியாகிக்கு ரூ.25 இலட்சம் நட்ட ஈடு வழங்கவும் அவர்கள் உத்தரவிட்டனர். முன்னதாக உத்தரபிரதேச மாநில நுகர்வோர் குறை தீர்வு ஆணையம், ரூ.1 இலட்சம் நட்ட ஈடு வழங்க உத்தரவிட்டது