மீரா ஜாஸ்மினுக்கு விரைவில் கல்யாணம்...

கார்த்திக் · கார்த்திக் Thu Sep 09, 2010 1:44 pm

மீரா ஜாஸ்மின், மாண்டலின் ராஜேஷ் காதல் கதையின் தொடர்ச்சி கல்யாணத்தில் வளரவுள்ளது.

மலையாளம், தமிழ், தெலுங்கு, கன்னடம் என நான்கு மொழிகளிலும் சிறந்த நடிகை என்று போற்றப்படும் நடிகை மீரா ஜாஸ்மின். 2004ஆம் ஆண்டின் தேசிய விருதை சிறந்த நடிகை என்ற வகையில் தன் வசப்படுத்தியவர். கேரள அரசின் விருதுகளையும் மற்றும் தமிழக கலைமாமணி விருதையும் பெற்றுள்ளார் மீரா.

துடிப்பான நடிப்பில் அனைவரையும் கவர்ந்த மீரா ஜாஸ்மின் மயங்கியது என்னமோ ராஜேஷின் மாண்டலின் இசைக்குத்தான். ஆந்திராவைச் சேர்ந்த மாண்டலின் புகழ் ராஜேஷும் மீராவின் மானச ரசிகனாகிவிட்டார். இப்படி இருவருக்குள்ளும் மலர்ந்த காதல் ஒரு கட்டத்தில் கிசுகிசுக்களாக மணம் பரப்பத் தொடங்கியது.

கடந்த 2ஆண்டுகளாக பரபரப்பாய் பேசப்பட்டு வந்த இவர்களின் காதல் கிசுகிசுகளுக்கு மறுப்பும் சொல்லாமல், பொறுப்பும் ஏற்காமல் ‘ரகசியமானது காதல்’ என காதல் கோட்டை கட்டி வந்தனர் இருவரும். தற்போது இவர்களின் காதல் கோட்டையில் கல்யாணமண்டம் உருவாகியுள்ளது.

என்னதான் மௌனம் சாதித்தாலும் கடைசியாக அம்பலமாக்கித்தானே ஆகனும். அப்படித்தான் மீரா ஜாஸ்மின் ஒரே ஒரு முறை மட்டும் தனது காதல் கதையின் உச்சக்கட்டம் பற்றி ஒருவரிக் கதையாக ஏற்கனவே சொல்லியிருந்தார்.

“நாங்கள் இருவரும் மனதளவில் ஒற்றிவிட்டோம், எங்கள் காதலை இருவர் வீட்டிலும் ஏற்றுக்கொண்டு விட்டார்கள். எப்போது வேண்டுமானாலும் எங்கள் திருமணம் நடக்கலாம். கல்யாணம் என்பது வெறும் சடங்குதான். சந்தோஷமாக வாழ்வதுதான் வாழ்க்கை ” என்று வேதாந்தமாக சொல்லியிருந்தார்.

மீராவின் கண்ணனான ராஜேஷும் இப்போது கல்யாணப் பேச்சை எடுத்துள்ளார். தனது சகோதரரான மாண்டலின் சீனிவாஸுடன் கொச்சியில் நடந்த டிவி நிகழ்ச்சி ஒன்றில் கலந்து கொண்டார் ராஜேஷ்.

அப்போது அவர் , “திருமணத்துக்கு பின்பும் நடிப்பது மீராவின் விருப்பம். அவர் விரும்பும்வரை நடிக்கலாம்” எனக் கூறி கல்யாண வாழ்க்கைக்கு மட்டுமில்லாமல், அதற்கும் பிறகான மீரா ஜாஸ்மினின் சினிமா வாழ்க்கைக்கும் இப்போதே சிவப்புக் கம்பள வரவேற்பு தந்துவிட்டார் ராஜேஷ். அப்பறம் என்ன இனி, முகூர்த்த நாள் பார்ப்பது மட்டும்தான் மிச்சம்.