அனைத்து பஸ்களிலும் இலவச பாஸ் செல்லும் ஏற்ற மறுத்தால் செல்போனில் புகார் அளிக்கலாம்

திருவள்ளூர்,

திருவள்ளூர் மாவட்டத்தில் உள்ள பள்ளி மாணவர்கள் இலவச பஸ் பாஸ் மூலம்
அரசு போக்குவரத்து கழகம் மற்றும் மாநகரப் பேருந்துகளில் செல்லலாம் என
மாவட்ட ஆட்சியர் டி.பி.ராஜேஷ் அறிவித்துள்ளார். திருவள்ளூர்
மாவட்டத்தில் திருவள்ளூர், திருத்தணி, பள்ளிப்பட்டு, பொன்னேரி,
கும்மிடிப்பூண்டி, ஊத்துக்கோட்டை போன்ற பகுதிகளில் அரசு போக்குவரத்துக்
கழக பஸ்களும், திருநின்றவூர், பட்டாபிராம், ஆவடி, அம்பத்தூர், பூந்தமல்லி,
போரூர், அய்யப்பன்தாங்கல் போன்ற பகுதிகளில் மாநகர பஸ்களும்
இயக்கப்படுகின்றன. பள்ளி நேரத்தில் வரும் பஸ்களை பொறுத்து
மாணவர்கள் மாநகரப் பேருந்து அல்லது அரசு போக்குவரத்து கழகம் என இரு வேறு
நிர்வாகங்களுக்குட்பட்ட பஸ்களில் பயணிக்கின்றனர். ஆனால் பெரும்பாலான
நடத்துனர்கள் இந்த பாஸ் இந்த பஸ்சில் செல்லாது என இறக்கி விடுகின்றனர். மேலும்
சில டிரைவர்கள் பள்ளி மாணவர்களின் கூட்டத்தை பார்த்தாலே உரிய இடத்தில்
நிறுத்தாமல் தள்ளிச் சென்று பஸ்சை நிறுத்துகின்றனர். அரசு இலவச பாஸ்
வழங்கியும் இதுபோல் ஓட்டுநர்கள், நடத்துடனர்கள் செய்யும் தவறுகளால் அரசின்
திட்டம் முழுமையாக பயனளிக்காமல் போகும். இதுகுறித்து திருவள்ளூர்
மாவட்ட ஆட்சியர் டி.பி.ராஜேஷிடம் கேட்டபோது, முதலில் இலவச பஸ் பாஸ் மூலம்
சில பஸ்களில் மட்டுமே செல்ல முடியும் என்ற நிலை இருந்தது. ஆனால் கடந்த
ஆண்டு மாநகரப் பேருந்து, அரசு போக்குவரத்து கழகம் என இரண்டு பஸ்களிலும்
மாணவர்கள் பயணிக்கலாம் என்று அறிவிக்கப்பட்டுள்ளது. டீலக்ஸ் பஸ், குளிர்
சாதன வசதி செய்யப்பட்ட பஸ்கள் தவிர அனைத்து பஸ்களிலும் மாணவர்கள்
செல்லலாம் என்றார். ஒருவேளை மாணவர்களை ஏற்ற மறுத்தால் அந்த பஸ்
எண், நேரம் ஆகியவற்றுடன் கீழ் கண்ட போக்குவரத்து துறை அதிகாரிகளின் மொபைல்
எண்களில் மாணவர்கள் அல்லது பொதுமக்கள் புகார் கூறலாம் என்றும் ஆட்சியர்
அறிவித்தார்.

புகார் தெரிவிக்க:
அரசு போக்குவரத்து கழக பொது
மேலாளர்: 9445021399, கோட்ட மேலாளர் திருவள்ளூர்: 9445021352, கிளை
மேலாளர் திருவள்ளூர்: 9445021368, ஊத்துக்கோட்டை : 9445021370, பொன்னேரி :
9445021371, திருத்தணி: 9445021369. மாநகரப் பேருந்து
பொதுமேலாளர்: 9445030505, பூந்தமல்லி: 9445030549, ஆவடி: 9445030538,
அம்பத்தூர்: 9445030536, ஐய்யப்பன்தாங்கல்: 9445030544, எண்ணூர்:
9445030543 ஆகிய மொபைல் எண்களில் புகார் கூறலாம்.