தடை விதித்தால் தற்கொலை செய்வேன்

சம்சுதீன் · சம்சுதீன் Tue Feb 09, 2010 4:49 pm

தடை விதித்தால் தற்கொலை செய்வேன் : மலையாள நடிகர் திலகன் மலையாள திரையுலகின் சூப்பர் ஸ்டார் மோகன்லால். இவருக்கும், மலையாள குணச்சித்திர மற்றும் வில்லன் நடிகர் திலகனுக்கும் இடையே கருத்து வேறுபாடு ஏற்பட்டது. பதினைந்து ஆண்டுகளாக இவர்கள் இருவரும் எந்தப் படத்திலும் சேர்ந்து நடிக்கவில்லை. இந்நிலையில் மோகன்லால் நடிக்கும் 'கிறிஸ்டியன் பிரதர்ஸ்' என்ற மலையாளப் படத்தில் திலகனும் நடிக்க ஒப்பந்தம் செய்யப்பட்டார். [/size]

மோகன்லாலுக்கும் திலகனுக்கும் இடையேயான பிரச்சினை தீர்ந்துவிட்டதென ரசிகர்கள் கருதினார்கள். இதற்கிடையே மலையாள நடிகர் சங்கமான 'அம்மா'வுடன் நடிகர் வினையனுக்கும் பிரச்சினை ஏற்பட்டது. வினையன் எடுக்கும் படத்தில் யாரும் நடிக்கக்கூடாதென்று மலையாள நடிகர் நடிகைகளுக்கு தடை விதிக்கப்பட்டிருந்தது. ஆனால் நடிகர் திலகன் இந்தத் தடையை மீறி வினையன் எடுக்கும் 'எக்சியும் நானும்' என்ற படத்தில் நடித்தார். இதனால் நடிகர் திலகனையும் நடிகர் சங்கத்திலிருந்து விலக்கக் கோரிக்கை எழுந்தது. இதையடுத்து மோகன்லால் படத்திலிருந்து திலகன் விலக்கப்பட்டார். இது அவருக்கு பெரும் அதிர்ச்சியைக் கொடுத்தது. இந்தப் பிரச்சினைகளுக்கு மோகன்லால்தான் காரணம் என்று அவர் கருதினார். இந்நிலையில் நடிகர் திலகனுக்கு திருவனந்தபுரம் அருகேயுள்ள பிரபல நடிகர் பிறந்த ஊரான 'சிறையின்கீழ்' என்ற இடத்தில் விருது வழங்கும் விழா நடைபெற்றது. இதில் நடிகர் திலகன் விருதைப் பெற்றுக்கொண்டு மோகன்லாலுக்குக் கண்டனம் தெரிவிக்கும் வகையில் பேசியதாவது :

ஒரு படத்துக்காக என்னை 25 நாட்கள் செட்டில் காக்க வைத்தனர். அதன் பின்பு திருப்பியனுப்பினர். இதனால் மூன்று தமிழ் படங்கள், ஒரு தெலுங்கு மற்றும் ஒரு கன்னட பட வாய்ப்புகளை இழந்தேன். 2004 ஆம் ஆண்டில் எட்டு படங்களில் வாய்ப்பையும் நான் இழந்துள்ளேன். மலையாள பட உலகில் ஒரு சூப்பர் ஸ்டாரின் தன்மானம்தான் இதற்கு காரணம். மலையாள பட உலகம் ஒரு சூப்பர் ஸ்டாரின் கையில்தான் உள்ளதா? என்பதை நீங்கள் நினைத்துப்பார்க்கவேண்டும். இங்கு தொடர்ந்து என்னை அவமானப்படுத்துகிறார்கள். இந்த நிலை நீடித்தால் நான் தற்கொலை செய்து கொள்வது நிச்சயம். அடிப்படையில் நானொரு கம்யூனிஸ்ட் காரன், என்னைத் தூக்கில் போட்டாலும் அதற்கு நான் பதில் சொல்லப்போவதில்லை. மலையாளம் மட்டுமல்ல, அண்டை மாநிலத்தில் தயாராகும் தமிழ், தெலுங்கு, கன்னட படங்களில் நடிக்கும் எனக்கு அங்கெல்லாம் நல்ல மரியாதை கிடைக்கிறது. ஆனால் என் தாய்மொழிக்காரர்கள் என்னை விமர்சனம் செய்வதை ஜீரணிக்க முடியவில்லை. சினிமாதான் எனது உலகம். நடிப்பு எனது தொழில். ஆனாலும் நான் மனசாட்சிக்குப் பயந்தவன். அவரவர் மனம் போன போக்கில் என்னை இம்சிக்கவேண்டாம். அதைப் பொறுத்துக்கொள்ளும் மனப்பக்குவமும் என்னிடம் இல்லை" இவ்வாறு திலகன் பேசினார்.