தமிழ்ப் புத்தாண்டை எப்படிக் கொண்டாடுவது?

சித்திரை முதல் நாளை நாம் எப்படியெல்லாம் கொண்டாட
வேண்டும், அன்றைக்கு நாம் என்னென்ன செய்யவேண்டும்
என்பது பற்றியெல்லாம் தெரிந்துகொள்ளலாமே…

புத்தாண்டு அன்று வீட்டை சுத்தம் செய்து,வாயில்களில்
அழகாகக் கோலமிட வேண்டும்.மேலும் செம்மண் பூசியும்
அழகு செய்யலாம். கதவுகளில், மஞ்சள் குங்குமம் இட்டு
அலங்கரிக்கவேண்டும்.

புத்தாண்டு அன்று காலையில் மருந்து நீரில் நீராட
வேண்டும்.

இந்த மருந்து நீரானது தாழம்பூ, தாமரைப்பூ, மாதுளம்பூ,
துளசி, விஷ்ணுகிராந்தி, சீதேவியார் செங்கழுநீர், வில்வம்,
அறுகு, பீர்க்கு, பால், கோசலம், கோமயம், கோரோசனை,
மஞ்சள், திப்பிலி, சுக்கு போன்றவற்றைச் சேர்த்து
காய்ச்சப்படும்.

மருந்துநீரை தலையில் தேய்த்து நீராடினால் நல்ல
பலன்களைப் பெறலாம் என்பது நம்பிக்கை. நீராடிய
பின்பு புதிய ஆடைகளை அணிய வேண்டும். காலையில்
பூஜை அறையில் சுவாமி படங்களைச் சுத்தம் செய்து,
பொட்டு வைக்க வேண்டும்.
மேலும் பூக்களால் அலங்கரித்து விளக்கேற்றி வணங்க
வேண்டும்.

காலையில் இல்லத்தில் சர்க்கரைப் பொங்கல் வைத்து
நைவேத்தியம் செய்து தீபாராதனை செய்ய வேண்டும்.
நைவேத்தியம் செய்யப்பட்ட சர்க்கரைப் பொங்கலை
அனைவருக்கும் பரிமாற வேண்டும்.

பாசிப்பருப்பு பாயசம்,வெல்ல அவல் போன்ற இனிப்பு
வகைகளும் செய்யலாம்.

​மதிய உணவில் அறுசுவையும் சேர்த்துகொள்ள வேண்டும்.
இனிப்பு, புளிப்பு, கசப்பு, உவர்ப்பு, துவர்ப்பு, கார்ப்பு ஆகிய
அறுசுவைகளைக் குறிக்கும் சர்க்கரை பொங்கல்,
மாங்காய் பச்சடி, வேப்பம்பூ ரசம், நீர்மோர், வாழைப்பூ
வடை, காரக் குழம்பு ஆகியவற்றைச் செய்து உண்ண
வேண்டும்.

இன்பம், துன்பம், மகிழ்ச்சி, கவலை, வியப்பு என்று
பலதரப்பட்ட அனுபவங்கள் கொண்டதுதான் வாழ்க்கை
என்பதை உணர்த்துவதுபோல் அன்று நாம் உண்ணும்
உணவு பல சுவைகளில் இருக்கும்.

கண்டிப்பாக அன்று அசைவ உணவுகளைத் தவிர்த்துவிட
வேண்டும்.

தமிழ்ப் புத்தாண்டு அன்று கை விசேடம், கை நீட்டம்
என்று ஒரு வழக்கம் பின்பற்றப்படுகிறது. பெரியவர்கள்
குழந்தைகளுக்கு அன்பளிப்பாகப் பணம் தருவதே
இப்படிச் சொல்லப்படுகிறது.

அதற்கென்று ஒரு நேரம் பஞ்சாங்கத்தில் குறிப்பிடப்
பட்டிருக்கும். அந்த நேரத்தில் தாத்தா, அப்பா என்று
வீட்டுப் பெரியவர்களின் காலில் அனைவரும் விழுந்து
ஆசி பெற்று, அவர் தரும் பணத்தைப் பெற்றுக்
கொள்வார்கள்.

இதனால், ஆண்டு முழுவதும் பணவரவுடன் பல
நன்மைகளும் ஏற்படும் என்பது நம்பிக்கை. இப்படிப்
பெரியவர்கள் கொடுக்கும் பணத்தைப் பத்திரமாக
வைத்துக்கொள்ளவேண்டும்.

உறவினர்கள் மற்றும் நண்பர்களுக்கு வாழ்த்துக்கள்
பரிமாறி, மகிழலாம்.
---------------------
நன்றி- மாலைமலர்