கிரண் பேடி கருத்து விவகாரம்: மக்களவையில் திமுக, காங்கிரஸ் அமளி

--
புதுச்சேரி துணைநிலை ஆளுநர் கிரண் பேடி, தனது சுட்டுரைப் பக்கத்தில் பதிவிட்டிருந்த தமிழகம் தொடர்புடைய கருத்துக்கு எதிர்ப்புத் தெரிவித்து திமுக, காங்கிரஸ், ஆம் ஆத்மி ஆகிய கட்சிகளின் உறுப்பினர்கள் மக்களவையில் புதன்கிழமை அமளியில் ஈடுபட்டனர்.

சென்னையில் நிலவும் தண்ணீர்ப் பிரச்னை தொடர்பாக புதுச்சேரி துணைநிலை ஆளுநர் கிரண்பேடி சில தினங்களுக்கு முன்பு தனது சுட்டுரைப் பக்கத்தில் கருத்துத் தெரிவித்திருந்தார்.

அதில், தமிழக அரசு நிர்வாகம், அரசியல்வாதிகள், மக்கள் சார்ந்த கருத்துகளை அவர் தெரிவித்திருந்தார். இதற்கு திமுக, காங்கிரஸ் உள்ளிட்ட கட்சிகள் எதிர்ப்புத் தெரிவித்திருந்தன.

இந்நிலையில், மக்களவையில் புதன்கிழமை பூஜ்ய நேரத்தின் போது இந்த விவகாரத்தை திமுக குழுத் தலைவர் டி.ஆர். பாலு எழுப்பினார்.
அவையை ஒத்திவைத்துவிட்டு இது குறித்து விவாதிக்க நோட்டீஸ் அளித்திருப்பதாக அவைத் தலைவரிடம் அவர் கூறினார்.

அப்போது, திமுக குழுத் துணைத் தலைவர் கனிமொழி, அக்கட்சியின் உறுப்பினர்களும், காங்கிரஸ் உறுப்பினர்கள் மாணிக்கம் தாகூர், ஜோதிமணி, விடுதலைச் சிறுத்தைகள் கட்சியின் உறுப்பினர் தொல்.திருமாவளவன் உள்பட அக்கட்சிகளைச் சேர்ந்தவர்கள் எழுந்து நின்று இதே கோரிக்கையை வலியுறுத்தினர்.

டி.ஆர். பாலு பேசுகையில், கிரண் பேடியின் கருத்து, மாநில எம்.பி.க்களை சிறுமைப்படுத்துவது போல் உள்ளது. இதனால், இது குறித்து அவையில் அரசு பதில் அளிக்க வேண்டும் என்றார்.

இதற்கு மக்களவைத் தலைவர் ஓம் பிர்லா கூறுகையில், டி.ஆர். பாலு தனது கோரிக்கையை விதிகளின் கீழ் அளிக்கலாம். அதுகுறித்து பரிசீலிக்கிறேன் என்றார்.

ஆனால், மக்களவைத் தலைவரின் பதிலில் திருப்தியுறாத டி.ஆர். பாலு மற்றும் திமுக, காங்கிரஸ், விடுதலைச் சிறுத்தைகள் கட்சிகளின் உறுப்பினர்கள் அவையின் மையப் பகுதிக்கு வந்து நீதி வேண்டும்! நீதி வேண்டும்! என முழக்கமிட்டனர். இவர்களுடன் ஆம் ஆத்மி கட்சி உறுப்பினர் பகவந்த் மான் சேர்ந்து குரல் எழுப்பினார்.

அப்போது, நாடாளுமன்ற விவகாரங்கள் துறை அமைச்சர் பிரஹலாத் ஜோஷி பேசுகையில், இந்த விவகாரத்தை கேள்வி நேரத்துக்குப் பின் விவாதிக்க முடியாது. இது தொடர்பான விவாதத்திற்கு ஒரு முன்மொழிவை உறுப்பினர்கள் அளிக்க வேண்டும் என்றார். அமளியில் ஈடுபட்ட உறுப்பினர்களை அவரரவர் இருக்கைக்கு செல்லுமாறு அவைத் தலைவர் கேட்டுக் கொண்டதையடுத்து, உறுப்பினர்கள் இருக்கைக்குத் திரும்பினர்.

அப்போது, பாதுகாப்புத் துறை அமைச்சரும், அவையின் துணைத் தலைவருமான ராஜ்நாத் சிங் இந்த விவகாரத்தில் தலையிட்டு, அவை அலுவல் நடத்தை மற்றும் நடைமுறைகள் விதி 352-ஐ குறிப்பிட்டுப் பேசுகையில், இந்த விவகாரம் தொடர்பாக விவாதிக்க எதிர்க்கட்சிகள் விரும்பினால், ஒரு முன்மொழிவை அளிக்கலாம். அதன் மீது அவைத் தலைவர் முடிவு செய்வார் என்றார்.
-
தினமணி