ஹாலந்து நாட்டிலிருந்து ஒரு சமஸ்கிருத ரசிகர்

அத்வைத வேதாந்தத்தில் அபாரமான ஈடுபாடு உள்ளவர்
சமஸ்கிருத மொழியின் வளமையை – செழுமையைப்
பெரிதும் போற்றி மகிழ்ந்து, ஆம், வழிபடுகிறார்.
ரட்ஜர் கோர்ட்டனீஹர்ஸ்ட் வயது 58.

இவர் பிறந்தது ஹாலண்ட். வளர்ந்தது அயர்லாந்து;
தற்சமயம் பணிபுரிவது டப்ளலின், தொழில் சமஸ்கிருத
வாத்தியார்.

இந்தப் பிரபஞ்சத்தின் ரகசியத்தை, அதில் மறைந்துள்ள
உண்மையை மானுட இனத்திற்குத் தெரிவிக்கும் ஆற்றல்
கொண்ட ஒரே மொழி சமஸ்கிருதம்தான் என்று அடித்துச்
சொல்கிறார், இவர்.

இவருக்கு, ஆங்கிலம், சமஸ்கிருதம் மட்டுமின்றி டச்சு, ஐரிஷ்,
பிரெஞ்ச், ஆங்கிலம் ஆகிய மொழிகளும் தெரியும்.

சமஸ்கிருத மொழி பற்றி பல்வேறு நாடுகளில் உள்ள
பல்கலைக் கழகங்களில் கெஸ்ட் லெக்சர் கொடுப்பதுடன்,
சமஸ்கிருத மொழியின் சிறப்பையும் இந்த மொழியில் உள்ள
இலக்கியத்தின் சிறப்பையும் பற்றி குழந்தைகளுக்கும்
கற்பித்து வருகிறார்.

தற்சமயம், டப்ளினில் உள்ள ஜான் ஸ்காட்டிஷ் ஸ்கூலில்
சமஸ்கிருதத் துறைத் தலைவராக பணிபுரிகிறார்.
இவரிடம், 5 முதல் 14 வயது வரை உள்ள 250 மாணவர்கள்
சமஸ்கிருதம் பயில்கின்றனர்.

கல்லூரியில் தத்துவம் பயிலச் சென்றபோது, அத்வைத
வேதாந்தம் ஆங்கிலத்தில் (பயிற்று மொழி) சொல்லித்
தரப்பட்டது. இவருக்கு அந்த வேதாந்தத்தை மூல
மொழியில் படித்துத் தெரிந்து கொள்ள வேண்டும் என்ற
ஆர்வம் தோன்றிற்று. இந்தியாதான் அதற்கு உரிய இடம்
என இங்கு வந்தார்.

புதுச்சேரியில் உள்ள ஸ்ரீஅரவிந்த ஆசிரமத்தில் நரேந்திரா
என்பவரைச் சந்தித்தார். சமஸ்கிருத மொழியை
ஒவ்வொருவரும் இலகுவாக, குழந்தைகள் கூட விரும்பும்
வகையில் சொல்லித்தர முடியும் என்ற தொழில்
நுணுக்கத்தைக் கையாள முடியும் என்பது இவருடைய
ஆய்வின் முடிவு.

ஒவ்வொரு ஆண்டும் ஜூன் முதல் ஆகஸ்டு மாதம் வரை
இந்தியாவில் சுற்றுப் பயணம் செய்வது இவரது வாழ்க்கை.
இந்த ஆண்டு சமஸ்கிருத மொழியின் வளர்ச்சிக்குப்
பெரும் பங்காற்றி வரும் கர்நாடக மாநிலத்திற்கு வருகை
புரிந்து, மவுண்ட் காரிமல் கல்லூரியில் சிறப்பு சொற்
பொழிவாற்றினார்.

பள்ளிப் பாடத்திட்டத்தில் இல்லாத போதிலும்
வ்வொருவரும் (5-14 வயது வரை) காலை அரைமணி
நேரமாவது சமஸ்கிருதம் கற்கவும், பின்னர் அது தொடர்பான
இலக்கியங்களைப் பயிலவும் வேண்டும் என்று யோசனை
கூறுகிறார், இந்த அயர்லாந்துக்காரர்.

சமஸ்கிருத மொழியில் ஒலி, சப்தம் ஆகியவை உச்சரிக்கப்
படுகையில் ஒரு தெய்வீக அதிர்வு உணரப்படும் என்பதும்
இவரது அபிப்பிராயம்.

தெய்வீக மொழி என்பது ஒரு எல்லைக்குள் சுருங்கி,
முடங்கிவிடக்கூடாதல்லவா? பல்கிப் பரவ வேண்டும்,
இப்பூவுலகு முழுவதும் என்பது இவரது ஆசை.

ஜனகன்
நன்றி-மஞ்சரி & வாரமலர்-1-10-2014