இளைஞர்களை ஈர்க்கும் பாடல்!- கவிஞர் முத்துலிங்கம்

**ayyasamy ram** · **ayyasamy ram** Thu Sep 06, 2018 8:29 am

ஆனந்தத் தேன்காற்று தாலாட்டுதே - 68
-
'கிழக்கே போகும் ரயில்' படத்தைத் தயாரித்த ராஜ்கண்ணு
அதற்குப் பின் ஒரு படத்தைத் தயாரித்து இயக்கினார்.
அந்தப் படத்தின் பெயர் "அர்த்தங்கள் ஆயிரம்'

சங்கர் கணேஷ் இசையில் அதில் இரண்டு பாடல்களை
நான் எழுதினேன். அதில் ஒன்று
-
"கடலோடு நதிக்கென்ன கோபம் - காதல்
கவிபாட விழிக்கென்ன நாணம்
இளங்காற்றுத் தீண்டாத சோலை - மண்ணில்
எங்கேயும் பார்த்தாயோ என் தோட்டப் பூவே'
-
என்ற பல்லவியுடன் ஆரம்பமாகும்.
-
சரணம்
-
நீல வான மேகம் போல
காதல் வானில் தவழுகிறேன்
நீரில் ஆடும் பூவைப் போல
ஆசை நெஞ்சம் மயங்குகிறேன்
ஓடை மீனே ஜாடை பேசு
வனமோகினி வனிதாமணி
புதுமாங்கனி சுவையேதனி
புதுவெள்ளம் போலே வாராய்
-
இது மாதிரி மூன்று சரணங்கள் வரும்.
இதில் இரண்டாவது சரணம் மட்டும் வேறுவகையான
சந்தத்தில் இருக்கும். இந்தப் பாடலை
எஸ்.பி. பாலசுப்பிரமணியன் பாடினார்.

வழக்கறிஞரும் இலக்கியப் பேச்சாளருமான சகோதரி
சுமதிக்கு மிகவும் பிடித்த பாடல் இது. அடிக்கடி
இப்பாடலைப் பற்றிக் கூறுவார்.

இந்தப் படத்திற்குத் திரைக்கதை வசனம் எழுதியவர்
காங்கிரஸ் கட்சிப் பேச்சாளரும் வழக்கறிஞருமான
கவிஞர் நேதாஜி. இவரும் நானும் பல கவியரங்கங்களில்
பாடியிருக்கிறோம்.

நான் "முரசொலி' பத்திரிகையில் பணியாற்றியபோது
அவர் காங்கிரஸ் கட்சி நடத்திய "நவசக்தி' இதழில்
பணியாற்றினார். இவர் இன்று நம்மிடம் இல்லை.
நான் எழுதிய இந்தப் பாடல் பிரபலமானது.
படம் சுமாராக ஓடியது.
-
---------------------------------

**ayyasamy ram** · **ayyasamy ram** Thu Sep 06, 2018 8:30 am

இளைஞர்களை ஈர்க்கும் பாடல்!- கவிஞர் முத்துலிங்கம் Sk4

-
இதில் இன்னொரு பாடலையும் நான் எழுதினேன்.
-
ஆசைகளோ ஒரு கோடி - புது
மோக ராக அலைமோதும் வேளைதனில்
ஆசைகளோ ஒரு கோடி
நீ வராமல் தொடாமல் விடாது அந்த
ஆசைகளோ ஒரு கோடி
-
என்று தொடக்கமாகும். "ஆசைகளோ ஒரு கோடி'
என்று பல்லவிக்கான முதல் வரியை எனக்குச்
சொன்னவரே நேதாஜிதான். இதில் இரண்டு சரணம்
வரும்.
-
முகிலில் இருந்து குளிர்ந்த பனியும் வீசும்
தரையில் இருக்கும் மலரைத் தடவிப் பேசும்
-
உனையே நினைந்தேன் மலர்ந்தேன் வளர்ந்தேன்
அழகிய கனியுடல் நீ தொடும் புதுமடல்
இருவரும் கலந்தொரு சுகநிலை பெறவே
அருகினில் நெருங்கிட உனக்கென்ன பயமோ
இணைவோம் கனிவோம் மகிழ்வோம்
-
என்று சரணம் முடியும்.
கானடா ராகத்தில் தொடக்கமாகும் இந்தப் பாடல்
ராஜ்கண்ணுக்கு மிகவும் பிடித்த பாடல். இதைப் பாடியவர்
எஸ். ஜானகி. இந்தப் பாடலை அம்மன் கிரியேஷன்ஸ்
அலுவலகத்திற்கு நடிகர் ராஜேஷ் வந்தபோது அவரிடம்
போட்டுக் காட்டினார்கள்.

அவர் வார்த்தைகளே புரியவில்லை; என்ன பாடுகிறார்
என்று தெரியவில்லை என்று சொல்லிவிட்டார்.
அந்த அளவு இசைக் கருவிகளின் ஒலி பாடியவரின்
குரலை அமிழ்த்திவிட்டது.

உள்ளதை உள்ளபடியே சொல்பவர் நடிகர் ராஜேஷ்.
அந்த வகையில் அவரை எனக்கு மிகவும் பிடிக்கும் .

அம்மன் கிரியேஷன்ஸ் தயாரித்த "கன்னிப்பருவத்திலே'
என்ற படத்தில் தான் இவர் கதாநாயகனாக அறிமுகமானார்.
அதில் வில்லன் பாத்திரத்தை ஏற்று நடித்தவர்
கே. பாக்கியராஜ். ராஜேஷ் பள்ளி ஆசிரியராகப்
பணியாற்றியவர். உலக சினிமாவை அலசி ஆராய்ந்தவர்.

இவரளவிற்கு உலக சினிமாவை அலசி ஆராய்ந்தவர்கள்
தமிழ்த் திரையுலகில் எவரும் கிடையாது. ஜோதிடக்
கலையிலும் வல்லவர். என் மகள் திருமணத்திற்கெல்லாம்
வந்து வாழ்த்தினார்.
--
--------------------------------

படங்கள் உதவி: ஞானம்
தினமணி கொண்டாட்டம்

குழலோன் · குழலோன் Thu Sep 06, 2018 10:02 am

கவிஞர் முத்துலிங்கம் என்று இருத்தல் வேண்டும். நல்ல கவிஞர். 'உன்னால் முடியும் தம்பி' திரைப்படத்தில் பல நல்ல பாடல்களுக்கு உயிர் கொடுத்தவர். நிரம்பக் கவிஞானம் கொண்டாலும் கொண்டாட ஆளில்லை!