``எங்களின் கோரிக்கை இந்த ஐந்துதான்" - ஸ்டெர்லைட் போராட்டக்குழுவினரின் அடுத்த மூவ்

தூத்துக்குடியில் ஸ்டெர்லைட் ஆலைக்கு எதிர்ப்பு போராட்டக்குழு சார்பில் அரசுக்கு ஐந்து கோரிக்கைகள் விடுக்கப்பட்டுள்ளன.


தூத்துக்குடி ஸ்டெர்லைட் ஆலைக்கு எதிரான போராட்டம் நாளுக்கு நாள் தீவிரமடைந்துவருகிறது. கலெக்டரிடம் மனு கொடுக்கச் சென்ற பொதுமக்கள் மீது போலீஸார் துப்பாக்கிச் சூடு நடத்தியதில் 13 பேர் பலியாகியுள்ளனர். மேலும், சிலர் சிகிச்சை பெற்றுவருகின்றனர். இந்த போராட்டத்தால் தூத்துக்குடியில் இயல்பு வாழ்க்கை பெரிதும் பாதிக்கப்பட்டுள்ளது.
இந்தநிலையில் ஸ்டெர்லைட் ஆலை எதிர்ப்பு போராட்டக்குழு சார்பில் அரசுக்கு 5 கோரிக்கைகள் வைக்கப்பட்டுள்ளன.
1. மே மாதம் 22-ம் தேதி நடந்த துப்பாக்கிச் சூடு தடியடி குறித்து தேசிய மனித உரிமை ஆணையம் தன்னிட்சையாக விசாரிக்க வேண்டும் (தற்போது தேசிய மனித உரிமை ஆணையமும், மாநில மனித உரிமை ஆணையமும் வழக்கை விசாரணைக்கு எடுத்து சம்பந்தப்பட்டவர்களுக்கு நோட்டீஸ் அனுப்பியுள்ளது)
2. சாமானிய மக்களுடைய வாழ்வைப் பாதித்து பலருடைய உயிரைக் குடித்த நாசகார ஸ்டெர்லைட் ஆலையை நிரந்தரமாக இழுத்து மூட வேண்டும்.
3. திட்டமிட்ட இந்தப் படுகொலைக்கு தனது பொறுப்பற்ற போக்குக்கு துணை நின்ற தூத்துக்குடி மாவட்ட கலெக்டர் வெங்கடேசன் மீதும் காவல்துறை சீருடை அணியாமல் மஞ்சள் நிற டி சர்ட் அணிந்து அப்பாவி மக்களை நெஞ்சிலும் தலையிலும் துப்பாக்கியால் சுடுவதற்குப் பின்னணியில் காரணமாக இருந்த தூத்துக்குடி மாவட்ட காவல்துறை கண்காணிப்பாளர் மகேந்திரன் மீதும் 302 ஐ.பி.சி. சட்டப் பிரிவின்படி வழக்கு பதிவு செய்து நடவடிக்கை எடுக்க வேண்டும்.


4. துப்பாக்கிச் சூட்டில் இறந்தவர்களுடைய குடும்பங்களுக்கு சமூகநீதி அடிப்படையில் குறைந்தது ரூ.30 லட்சம் இழப்பீடு கொடுக்க வேண்டும். பாதிக்கப்பட்ட குடும்பத்தினரில் உள்ள ஒருவருக்கு அரசு தரப்பில் வேலை கொடுக்க வேண்டும்.
5. துப்பாக்கிச் சூடு, தடியடியில் காயமடைந்து மருத்துவமனையில் சிகிச்சை பெற்றுவரும் படுகாயமடைந்தவர்களுக்கு தலா ரூ.5 லட்சமும் சிறிய காயமடைந்தவர்களுக்கு ரூ.2 லட்சமும் வழங்க வேண்டும். இதுவரை ஸ்டெர்லைட் ஆலையால் பாதிக்கப்பட்ட மக்களைக் கண்டறிந்து அவர்களின் பாதிப்புக்கு ஏற்ப நீதி அடிப்படையில் இழப்பீடு கொடுக்க தமிழக அரசு உடனடியாக நடவடிக்கை எடுக்க வேண்டும்.
இதுகுறித்து போராட்டக்குழுவைச் சேர்ந்தவர்கள் கூறுகையில், "எங்களின் யார் தலைமை என்பதில் பிரச்னை இல்லை. எங்களின் ஒரே கோரிக்கை, ஸ்டெர்லைட் ஆலையை நிரந்தரமாக மூட வேண்டும். ஏனெனில் இதற்கு முன்பு மூடப்பட்டபோது, மீண்டும் ஆலை திறக்கப்பட்டுவிட்டது. அரசுத் தரப்பில் அறிவிக்கப்பட்ட நிவாரணத் தொகையை அதிகரிக்க வேண்டும். அப்பாவி பொதுமக்கள் மீது துப்பாக்கிச் சூடு நடத்தியவர்கள் மீது கடும் நடவடிக்கை எடுக்க வேண்டும். துப்பாக்கிச் சூடு நடத்துவதற்கான நெறிகளை காவல்துறை மீறிவிட்டது. வருங்காலங்களில் இதுபோன்ற சம்பவங்கள் நடக்கக் கூடாது. எங்களின் கோரிக்கைகள் நிறைவேறும்வரை போராட்டம் தொடரும்" என்றனர்.
நன்றி
விகடன்

ஸ்டெர்லைட் ஆலை,
எப்போது ,யார் காலத்தில் அமைக்க கையெழுத்து ஆனது?
எப்போது ஆரம்பிக்கப்பட்டது?
இவ்வளவு காலம் மௌனமாக இருந்த மக்கள் இன்று எழுச்சி பெறுவது ஏன்?
இப்போது போராடும் கட்சிகளுக்கும், அன்று கையெழுத்து போட்ட கட்சிக்கும்
சம்பந்தம் இல்லையா?
எனக்கு தெரியாது என்பதால் கேட்கிறேன் .
தெரிந்தவர்கள் விளக்கவும்.

ரமணியன்