கன்னியாகுமரி கடல் நடுவே பாலம்! - மத்திய அரசு ஒப்புதல்

கன்னியாகுமரி கடல் நடுவே பாலம்! - மத்திய அரசு ஒப்புதல்

கன்னியாகுமரிக்கு வரும் சுற்றுலாப் பயணிகளில் பெரும்பாலானோர் படகில் சென்று விவேகானந்தர் மண்டபத்தையும், திருவள்ளுவர் சிலையையும் பார்வையிடுகிறார்கள். ஆனால், கடற்சீற்றம், கடல் உள்வாங்குதல், நீர்மட்டத் தாழ்வு போன்ற இயற்கை மாற்றங்களின் காரணமாக திருவள்ளுவர் சிலைக்கு அடிக்கடி படகுப் போக்குவரத்து ரத்து செய்யப்படுகிறது. விவேகானந்தர் மண்டபம் வரையே படகுகள் இயக்கப்படுகின்றன. இதனால் திருவள்ளுவர் சிலைக்கு அருகில் சென்று பார்க்க முடியாமல் சுற்றுலாப் பயணிகள் ஏமாற்றத்துடன் திரும்பும் நிலை ஏற்படுகிறது. எனவே, விவேகானந்தர் நினைவு மண்டபத்துக்கும், திருவள்ளுவர் சிலைக்கும் இடையே இணைப்புப் பாலம் அமைக்க வேண்டும் என்று சுற்றுலாப் பயணிகளும், தமிழ் ஆர்வலர்களும் அரசுக்கு கோரிக்கை விடுத்து வந்தனர்.


மத்திய இணை அமைச்சர் பொன்.ராதாகிருஷ்ணன், மத்திய சுற்றுலாத் துறை மந்திரி மகேஷ் சர்மா ஆகியோர் கன்னியாகுமரிக்கு நேரில் வந்து ஆய்வு செய்தனர். அப்போது அவரிடம் விவேகானந்தர் நினைவு மண்டபத்துக்கும், திருவள்ளுவர் சிலைக்கும் இடையே இணைப்புப் பாலம் அமைக்க வேண்டும் என வலியுறுத்தப்பட்டது. அதன் அடிப்படையில் மத்திய சுற்றுலாத்துறையின் கடற்கரைச் சுற்றுலாப் பகுதிகளை மேம்படுத்தும் திட்டமான ‘சுவதேஷ் தர்ஷன்’ என்ற திட்டத்தின் கீழ் கன்னியாகுமரி உள்பட தமிழ்நாட்டில் உள்ள சில சுற்றுலாத்தலங்கள் மேம்படுத்தப்பட உள்ளன. இதற்காக மத்திய சுற்றுலாத் துறை தமிழ்நாட்டுக்கு ரூ.100 கோடி நிதி ஒதுக்குவதற்கான ஒப்புதலை வழங்கி உள்ளது.
இந்தத் திட்டத்தின் மூலம் கன்னியாகுமரி கடல் நடுவில் உள்ள விவேகானந்தர் நினைவு மண்டபத்துக்கும், திருவள்ளுவர் சிலைக்கும் இடையே புதிய நடைபாலம் அமைக்கப்பட உள்ளது. இந்த பாலம் ரூ.15 கோடி செலவில் அமைப்பதற்காக திட்ட மதிப்பீடு தயாரிக்கப்பட்டு இருக்கிறது. கடலுக்கு நடுவில் அமையும் நடைபாலம் 95 மீட்டர் நீளத்திலும், கடல் மட்டத்தில் இருந்து 7 மீட்டர் உயரத்திலும் அமைக்கப்படுகிறது. 8 ராட்சத தூண்களைக் கடலுக்குள் அமைத்து, இந்தப் பாலம் உருவாக்கப்படுகிறது. இந்த பாலம் அமைக்கப்படுவதன் மூலம் இயற்கைச் சீற்றம் ஏற்படும் காலங்களிலும் எந்தத் தடங்கலும் இன்றி பார்வையாளர்கள் திருவள்ளுவர் சிலையை அருகில் சென்று பார்க்க முடியும் என்பது குறிப்பிடத்தக்கது. 

நன்றி விகடன்

ரமணியன்

விவேகானந்தர் மண்டபம் நல்ல முறையில் பராமரிக்கப்பட்டு
(விவேகானந்த கேந்திரா -கல்கோத்தா) வருகிறது.
ஆனால் திருவள்ளுவர் சிலை உள்ள மண்டபம் பராமரிப்பு (தமிழக அரசு)சுத்த மோசம்.--

ரமணியன்

நான் சென்ற மாதம் கன்னியாகுமரி சென்று வந்தேன் . விவேகானந்தர் மண்டபத்திற்குப் படகு போக்குவரத்து உள்ளது ; ஆனால் வள்ளுவர் சிலைக்கு படகு போக்குவரத்து நிறுத்திவிட்டதாகச் சொன்னார்கள் . ஏனென்றால் அங்கு கடல் அதிக ஆழமில்லை ; படகு தரைதட்டும் என்ற ஒரு நொண்டிக் காரணத்தைச் சொன்னார்கள் . அறிவிப்பாக எழுதியும் வைத்துள்ளார்கள் .

வள்ளுவர் சிலையை எழுப்பியது யார் என்று பார்க்காமல் , வள்ளுவர் சிலையை தக்க முறையில் பராமரிப்பு செய்யவேண்டும் . படகு போக்குவரத்தை உடனே தொடங்கவேண்டும் . வள்ளுவர் அரசியலுக்கு அப்பாற்பட்ட ஒரு மாமேதை ! அதை இன்றைய அரசு மறக்கக்கூடாது !