"போராட்டத்தை கைவிடுகிறோம்'

அரசுக்கு அவகாசம் அளித்து சென்னை மெரீனாவில் நடைபெற்று
வரும் போராட்டத்தை கைவிடுகிறோம் என போராட்டக்குழு
ஒருங்கிணைப்பாளர்கள் தெரிவித்தனர்.

மெரீனாவில் போராடி வரும் மாணவர்கள், இளைஞர்களும்
போராட்டத்தை நிறுத்திக்கொள்ளுமாறும் அவர்கள் வேண்டுகோள்
விடுத்தனர்.

இதுதொடர்பாக போராட்டக் குழுவின் ஒருங்கிணைப்பாளர்கள்
கார்த்திகேய சேனாபதி, ராஜேஷ், ராஜசேகர், அம்பலத்தரசு,
ஹிப் ஹாப் ஆதி ஆகியோர் ஞாயிற்றுக்கிழமை செய்தியாளர்களிடம்
கூறியதாவது:

தமிழகத்தில் கடந்த சில நாள்களாக நடைபெற்று வந்த ஜல்லிக்கட்டு
போராட்டம் தற்போது முக்கியமான கட்டத்தை எட்டியுள்ளது.

ஜல்லிக்கட்டு நடத்துவதற்காக அவசரச் சட்டத்தை பிறப்பித்துள்ள
அரசு அதுதொடர்பாக சில வாக்குறுதிகளை எங்களுக்கு அளித்துள்ளது.
அந்த வாக்குறுதிகள் குறித்து 136 ஒருங்கிணைப்பாளர்களுடன்
ஆலோசனை நடத்தினோம். அப்போது சில முடிவுகள் எடுக்கப்பட்டன.

அரசுக்கு அவகாசம் அளிக்கும் வகையிலும், மாணவர்கள், பொது
மக்களின் நலன் கருதியும் இந்தப் போராட்டத்தை தாற்காலிகமாக
கைவிடுகிறோம். அதன்படி திங்கள்கிழமை இந்தப் போராட்டம்
முழுமையாக விலக்கிக் கொள்ளப்படும். மெரீனாவில் போராடி வரும்
மாணவர்கள், இளைஞர்களும் போராட்டத்தை நிறுத்திக் கொள்ள
வேண்டும்.

இதைத்தொடர்ந்து ஒரு வாரத்துக்கு பிறகு இங்கு போராட்டம் நடத்திய
ஒருங்கிணைப்பாளர்கள் சார்பில் ஒரு ஆலோசனைக் கூட்டம்
நடத்தவுள்ளோம். அப்போது ஜல்லிக்கட்டு தொடர்பாக அரசின் சார்பில்
அளிக்கப்பட்ட வாக்குறுதிகள் நிறைவேற்றப்பட்டதா? அதன்மீது
எடுக்கப்பட்டு வரும் நடவடிக்கைகள் குறித்து ஆலோசிக்கப்படும்.

வாக்குறுதிகள் நிறைவேற்றப்படாத பட்சத்தில், ஜல்லிக்கட்டு
போராட்டத்தை அடுத்த கட்டத்துக்கு எடுத்துச் செல்லுவோம் என்றார்
அவர்.
-
-------------------------------------------
தினமணி

தலைவன் இல்லாமல் மக்கள் எழுச்சி சாத்தியம் , ஆனால் அடுத்த கட்டத்துக்கு செல்லவேண்டுமெனில் கட்டுபாடான ஒரு தலைமை தேவை.

ஒருவரை முன்னிறுத்தி வைக்காமல் இப்போது செய்துள்ளபடி ஒரு குழுவை "தலைமை ஒருங்கிமைப்பு குழு" என்று முன்னிறுத்தி அடுத்த கட்டத்துக்கு செல்வது இலக்கை எட்ட எதுவாக இருக்கும்

விவேகமான முடிவு. 
ரமணியன்