கபாலி படத்தை வெளியிட தடை கோரி மீண்டும் வழக்கு:ரஜினி உள்ளிட்டோருக்கு நோட்டீஸ்

"லிங்கா' படத்துக்கான நஷ்டத்தை வழங்காததால், "கபாலி' படத்தை வெளியிட தடை கோரி, சென்னை உயர் நீதிமன்றத்தில் மனு தாக்கல் செய்யப்பட்டுள்ளது. இந்த மனுவுக்கு பதிலளிக்குமாறு நடிகர் ரஜினிகாந்த், தயாரிப்பாளர் எஸ்.தாணு உள்ளிட்டோருக்கு நோட்டீஸ் அனுப்ப நீதிமன்றம் புதன்கிழமை உத்தரவிட்டது.

இதுதொடர்பாக "சுக்ரா பிலிம்ஸ்' நிறுவனத்தின் பங்குதாரரான மகாபிரபு தாக்கல் செய்த மனு விவரம்:

நடிகர் ரஜினிகாந்த் நடித்த லிங்கா படத்துக்கு ரூ.13.25 கோடியைக் கொடுத்து, கோவை, ஈரோடு, திருப்பூர், நீலகிரி ஆகிய மாவட்டங்களில் விநியோக உரிமத்தைப் பெற்றோம்.

ஆனால், லிங்கா படம் எதிர்பார்த்த அளவு லாபத்தை தரவில்லை. ஆகையால், எங்கள் நிறுவனத்துக்கு மட்டும் ரூ.7.45 கோடி நிதியிழப்பு ஏற்பட்டது. இதேபோன்று பல விநியோகஸ்தர்களுக்கும் இழப்பு ஏற்பட்டது. அதற்கு நஷ்டஈடு வழங்கும்படி கோரிக்கை விடுத்தோம்.

இதையடுத்து படத்தின் நடிகரும், தயாரிப்பாளரும் இணைந்து அனைத்து விநியோகஸ்தர்களுக்கும், தியேட்டர் உரிமையாளர்களுக்கும் ரூ.12.50 கோடி இழப்பீடு வழங்கினர். கோவை மண்டலத்துக்கு ரூ.2.59 கோடி ஒதுக்கீடு செய்யப்பட்டது. அதில், ரூ.1.70 கோடியை, கோவை, ஈரோடு, திருப்பூர், நீலகிரி ஆகிய மாவட்டங்களில் உள்ள தியேட்டர் உரிமையாளர்கள் சங்கத்துக்கு வழங்கி விட்டனர். மீதமுள்ள ரூ.89 லட்சத்தை எங்கள் நிறுவனத்துக்கு இதுவரை தரவில்லை.

இந்தச் சூழலில், நடிகர் ரஜினிகாந்த் நடித்த "கபாலி' படத்தை எஸ்.தாணு தயாரித்துள்ளார். இந்த படம் விரைவில் வெளியாக உள்ளது. இந்தப் படம் தயாரிக்கப்படும்போதே, லிங்கா படத்தில் ஏற்பட்ட நஷ்டத்துக்காக வழங்க வேண்டிய ரூ.89 லட்சத்தை தாமே வழங்கி விடுவதாக தாணு, எங்களுக்கு உத்தரவாதம் அளித்திருந்தார். ஆனால், அந்தப் பணத்தை இன்னும் வழங்கவில்லை. எங்களுக்கு தரவேண்டிய ரூ.89 லட்சத்தை வழங்கும் வரை, கபாலி படத்தை வெளியிட தடை விதிக்க வேண்டும் என்று அந்த மனுவில் தெரிவிக்கப்பட்டுள்ளது.

இந்த மனு நீதிபதி எம்.எம்.சுந்தரேஷ் முன்பு புதன்கிழமை விசாரணைக்கு வந்தது. அப்போது, மனுவுக்கு பதிலளிக்குமாறு ராக்லைன் வெங்கடேஷ், வேந்தர் மூவிஸ் நிறுவனம், நடிகர் ரஜினிகாந்த், தயாரிப்பாளர் கலைப்புலி எஸ்.தாணு உள்ளிட்டோருக்கு நோட்டீஸ் அனுப்ப நீதிபதி உத்தரவிட்டார். இந்த மனு, வியாழக்கிழமை மீண்டும் விசாரணைக்கு வருகிறது.

-

தினமணி