சிவரமணி – ஈழத்து பெண் கவிஞரின் கவிதைகள்

**ayyasamy ram** · **ayyasamy ram** Tue May 05, 2015 11:41 am

சிவரமணி – ஈழத்து பெண் கவிஞர்.
-
தற்கொலை செய்து இறக்கும்முன் அவள் செய்த செயல்:

தன் கைவசமிருந்த தன்னுடைய அத்தனை கவிதைகளையும்
நெருப்பில் இட்டு எரித்து விட்டுச் சென்றிருக்கிறாள்.
அந்த நெருப்போடு அவள் கவிதைகளும் உணர்வுகளும் சேர்ந்து
அழிந்து போயின.

தன் இறுதிக்கடிதத்தில் தன் நண்பர்கள் யாரிடமாவது
அவளுடைய கவிதைகள் மிச்சமிருந்தால் அவற்றையெல்லாம்
அழித்து விடும்படி வேண்டுகோள் விடுத்து இருந்தாள்.

அத்தனை பேரையும் உறைய வைத்து விட்டு உலகத்தை
விட்டு சென்ற சிவரமணியின் கவிதைகளில் இலங்கையின்
மட்டகளப்பு பல்கலைக்கழத்தின் பேராசிரியை
சித்ரலேகா மௌனகுருவிடம் எஞ்சியிருந்த அவளுடைய
22 கவிதைகள் அவரால் நூலாக பதிக்கப்பட்டு இன்று அவை
மட்டுமே சிவரமணி என்ற பெண் கவிஞரின் பதிவாக நம்மிடையே
கிடைத்திருக்கின்றன
-

**ayyasamy ram** · **ayyasamy ram** Tue May 05, 2015 11:41 am

கிடைத்தவற்றில் சில:

“எனக்கு உண்மைகள் தெரியவில்லை
பொய்களை கண்டுபிடிப்பதும்
இந்த இருட்டில்
இலகுவான காரியமில்லை…
தெருவில் அவலமும் பதற்றமுமாய்
நாய்கள் குலைக்கும் போது
பூட்டப்பட்ட கதவுகளை
மீண்டும் ஒருமுறை சரிபார்த்துவிட்டு
எல்லோரும் தூங்கப்போகும் நேரத்தில்
நான்
நாளைக்கு தோன்றுகின்ற சூரியன் பற்றி
எண்ண முடியாது
இரவு எனக்கு முக்கியமானது
நேற்றுப் போல்
மீண்டும் ஒரு நண்பன் தொலைந்து போகக்கூடிய
இந்த இருட்டு
எனக்கு மிகவும் பெறுமதியானது.”

எமது விடுதலை

நாங்கள் எதைப் பெறுவோம்
தோழர்களே
நாங்கள் எதைப் பெறுவோம்?
இன்பமும் இளமையும்
இழந்து நின்றோம்
ஏக்கமும் ஏழ்மையும்
சுமந்து வந்தோம்
நாங்கள் எதைப் பெறுவோம்?
விடுதலை என்றீர்
சுதந்திரம் என்றீர்
எம் இனம் என்றீர்
எம் மண் என்றீர்
தேசங்கள் பலதிலும்
விடுதலை வந்தது இன்று
சுதந்திரம் கிடைத்தது
எனினும்
தேசங்கள் பலதிலும் மனிதர்கள்
இன்னும்
பிச்சைப் பாத்திரங்களை
வேலைக்கு அமர்த்தியுள்ளனர்.
நாமும் பெறுவோமா
தோழர்களே
பிச்சைப் பாத்திரத்தோடு
நாளை ஒரு விடுதலை?
நாம் எல்லாம் இழந்தோம்
எனினும்
வேண்டவே வேண்டாம்
எங்களில் சிலரது விடுதலை
மட்டும்;
விலங்கொடு கூடிய
விடுதலை மட்டும்
வேண்டவே வேண்டாம்!
தோழர்களே
விலங்குகளுக்கெல்லாம்
விலங்கொன்றைச் செய்தபின்
நாங்கள் பெறுவோம்
விடுதலை ஒன்றை.”

இலங்கையின் போர்ச்சூழலில் அவள் எழுதிய கவிதைகள் இவை.
-

ஈகரைச்செல்வி · 08/06/2015

சிவரமணி – ஈழத்து பெண் கவிஞரின் கவிதைகள் 103459460

Sponsored content · Sponsored content

சிவரமணி – ஈழத்து பெண் கவிஞரின் கவிதைகள்

சிவரமணி – ஈழத்து பெண் கவிஞரின் கவிதைகள்

Re: சிவரமணி – ஈழத்து பெண் கவிஞரின் கவிதைகள்

Re: சிவரமணி – ஈழத்து பெண் கவிஞரின் கவிதைகள்

Re: சிவரமணி – ஈழத்து பெண் கவிஞரின் கவிதைகள்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக