காய்கறிகளை வாங்கும் பொழுது கவனிக்க வேண்டியவை

by **சிவா** Mon Apr 20, 2015 10:45 pm

தேங்காய் - கையில் எடுத்து குலுக்கிப்பாருங் கள். உள்ளே தண்ணீர் இருக்கவேண்டும். தேங்காயின் கண்கள் இருக்கும் பகுதியை லேசாக அழுத்திப்பாருங்கள். அமுங்காமல் இருந்தால் நல்ல தேங்காய்.

முட்டைக்கோஸ் - கெட்டியாக, பளிச்சென்று புதிதாக இருக்கவேண்டும்.

உருளைக்கிழங்கு - பழையது என்றால் அமுங்கும். புதியது கெட்டியாக இருக்கும். பார்த்து வாங்குங்கள்.

கீரைத்தண்டு - ஒடித்துப்பாருங்கள். வளையாமல் ஒடிந்துவிடவேண்டும்.

முள்ளங்கி - வேர்கள் தோன்றாமல் இருப்பது நல்லது. நிறமும் நம்மை கவரும்படி அமைந்திருக்கவேண்டும்.

பச்சை மிளகாய் - வாடிப்போயிருக்ககூடாது. கெட்டியாக நல்ல நிறத்தோடு தோன்றவேண்டும்.

பூண்டு - கையில் எடுத்து அழுத்திப்பாருங்கள். கனமாக, கெட்டியாக பரல்களோடு இருப்பதே சிறந்தது.

காலிபிளவர் - பிரஷ்ஷாக இருக்கவேண்டும். இதழ்களில் பூ தோன்றியிருக்க கூடாது.

கருணைக்கிழங்கு - நல்லதாக பார்த்து தேர்ந்தெடுத்து வாங்கிவந்து, இரண்டு நாட்கள் வீட்டில் வைத்துவிட்டு சமைக்க பயன்படுத்துங்கள்.

கோவக்காய் - சீராக, பளிச்சென்று இருக்கவேண்டும். அமுங்கினால் வாடிவிட்டதாக அர்த்தம். வாடிப்போனதை வாங்கக்கூடாது.

வெண்டைக்காய் - இளசாக இருக்கவேண்டும். நுனியை லேசாக அழுத்தினாலே ஒடிந்துவிடும்.

பீன்ஸ், அவரை - கையில் எடுத்து பார்த்தாலே நாரை எளிதாக உரித்தெடுக்க முடியுமா என்பது தெரிந்துவிடும். எளிதாக உரிக்கும் விதத்தில் இருக்கவேண்டும்.

கொத்தவரை - வெண்டைக்காய் மாதிரிதான் வளையாமல் முறியவேண்டும்.

வாழைத்தண்டு - அதிக தண்ணீர்தன்மையோடு வாடாமல் வெள்ளை நிறத்தில் பளிச்சென்று இருப்பதை தேர்ந்தெடுங்கள்.

சேனைகிழங்கு - அதிக சிவப்பாக இல்லாமல் மஞ்சள் நிறம் கலந்திருப்பதை பார்த்துவாங்குங்கள். அதிக சிவப்பை குழந்தைகள் சாப்பிட்டால் நாக்கு அரிப்பதாக சொல்வார்கள்.

வெங்காயம் - சிவப்பு நிறத்தில் இருப்பது நல்லது. வாடலாக, அழுகலாக இருந்தால் நிறம் மாறும். பொதுவாக கருநீலநிறத்தில் இருப்பது அழுகலின் அடையாளம்.

முருங்கைக்காய் - பச்சை நிறமாக இருக்கவேண்டும். அதிக கனமாகவும், கெட்டியாகவும் இருக்கக்கூடாது. வளையவேண்டும். முற்றிய முருங்கைக்காயை வளைத்தால் முறிந்துவிடும்.

புடலை - நார் இருக்கக்கூடாது. எளிதாக உடையும் விதத்தில் இருந்தால் நல்லது.

பீட்ரூட் - அமுங்காமல் நல்ல நிறத்துடன் இருக்கவேண்டும்.

கேரட் - இப்போதே பச்சையாக கடித்துவிடலாமா? என்று தோன்றும் விதத்தில் பளிச்சென்ற நிறத்துடன் மீடியமான சைசில் இருக்கவேண்டும்.

பாகற்காய் - சிறியதுமில்லாமல், பெரியதுமில்லாமல் நடுத்தரமாக, நல்ல நிறமாக, அமுங்காமல் இருக்கவேண்டும்.

வாழைப்பூ - இதழை தூக்கிப்பார்த்தால், கறுப்பாக பீலிகள் இருந்தால் நல்லதல்ல. கெட்டியாக, இளசாக இருக்கவேண்டும். முற்றல் அதிக துவர்ப்பாகிவிடும்.

கத்திரிக்காய் - காம்பை பார்த்தால், பழையதா- புதியதா என கண்டுபிடித்துவிடலாம். ஒரே சைசில் பளிச்சென்று இருப்பதைவிட பெரிதும், சிறிதும் கலந்து இருப்பதே தரமானது.

சுரைக்காய் - கையில் தூக்கிப்பாருங்கள். கனமாக இருக்கவேண்டும். நீர்ச்சத்து வற்றியிருப்பது நல்லதல்ல. வற்றியிருந்தால் தூக்குவதற்கு இலகுவாக இருக்கும்.