புலிகளின் தாக்குதல் வெற்றி பெற்றிருந்தால் சிறிலங்கா விமானப்படை முற்றாக அழிந்திருக்கும்

வான் புலிகளின் தாக்குதல் வெற்றி பெற்றிருந்தால் சிறிலங்கா விமானப்படை முற்றாக அழிந்திருக்கும்

விடுதலைப் புலிகளின் வான் தற்கொலைத் தாக்குதல் முயற்சி வெற்றி பெற்றிருந்தால் சிறிலங்கா அரசு தனது விமானப்படையை முற்றாக இழந்திருக்கும் என அரசின் பாதுகாப்புப் பேச்சாளரும் அமைச்சரு மான கெஹலிய ரம்புக்வெல செய்தியாளர்களுக்குத் தெரிவித்திருக்கிறார்.

விடுதலைப் புலிகளின் முயற்சி வெற்றி பெற்றிருந்தால் விமானப்படையென்ற ஒன்று இங்கு இருந்திருக்காது எனவும் அவர் குறிப்பிட்டுள்ளார்.அந்த விமானங்கள் தமது இலக்குகளை அடைய முன்னர் சுட்டு வீழ்த்தப்பட்டமையால் பாரிய அனர்த்தம் தவிர்க்கப்பட்டதாகவும் அவர் தெரிவித்துள்ளார்.

விடுதலைப் புலிகளிடம் இறுதியாக இருந்த இரு விமானங்களுமே வெள்ளிக்கிழமை இரவு அழிக்கப்பட்டுள்ளன. பயங்கரவாதத்திற்கு எதிரான மகத்தான வெற்றி என்று அவர் மேலும் தெரிவித்துள்ளார்.

இதேவேளை, விடுதலைப் புலிகளின் விமானப்படைப் பலம் முற்றாக சிதைவடைந்துவிட்டது என சிறிலங்கா இராணுவப் பேச்சாளர் பிரிகேடியர் உதய நாணயக்கார குறிப்பிட்டுள்ளார்.

விடுதலைப் புலிகளிடம் வேறு விமானங்கள் இருக்குமென்று தாம் நினைக்கவில்லையென மேலும் தெரிவித்துள்ள அவர், புதுக்குடியிருப்பிலுள்ள ஓடுபாதையிலிருந்து புறப்பட்ட விமானங்கள் மாங்குளம், மன்னார் ஊடாக கொழும்பிற்குள் நுழைந்துள்ளன எனவும் அவர் தெரிவித்தார்.

கொழும்பிற்குள் நுழைந்த ஒவ்வொரு விமானத்திலும் 215 கிலோகிராம் சி 4 ரக வெடிமருந்துகள் காணப்பட்டுள்ளன. அவர்கள் விமானப் படைத் தலைமையகத்தை இலக்கு வைத்துள்ளனர் என்றும் உதய நாணயக்கார குறிப்பிட்டுள்ளார்.

விமான எதிர்ப்பு துப்பாக்கிப் பிரயோகம் காரணமாக விடுதலைப் புலிகளின் விமானி ஒருவரின் கை துண்டிக்கப்பட்டதாலேயே அவரால் அதனை வெடிக்கவைக்க முடியவில்லையென விமானப்படைப் பேச்சாளர் ஜனக நாணயக்கார குறிப்பிட்டுள்ளார்.

இதேவேளை, இந்தத் தாக்குதல் பெரும் வெற்றியளித்துள்ளதாகவும், இலக்குகள் வான் கரும்புலிகளால் வெற்றிகரமாக தாக்கியழிக்கப்பட்டுள்ளன என்றும் விடுதலைப் புலிகள் ஏற்கனவே அறிவித்திருந்தனர். இந்தத் தாக்குதலின்போது எற்பட்ட இழப்புக்களை படையினர் மறைத்திருந்ததுடன், இறைவரித் திணைக்களத்திற்கு ஏற்பட்ட அழிவுகளை மட்டும் வெளியிட்டிருந்தனர் என்பது குறிப்பிடத்தக்கது.