பந்து.. புல்லாங்குழல் பணம்!

-

ஒரு ஊரில் ஒரு பணக்ககாரன் இருந்தான்.
பணத்தினால் பெறக்கூடிய எல்லா
சுக-சௌகர்யங்களும் அவனுக்கு இருந்து
மகிழ்ச்சியின்றி இருந்தான். நிம்மதியையும்
சந்தோஷத்தையும் தேடி, ஒரு ஞானியிடம்
வந்தான்.
-
அவரிடம் தன் குறையைச் சொன்னான்.
ஞானி “ஏராளமான செல்வம் படைத்த நீங்கள்
என்ன வேண்டுமானாலும் வாங்கலாம்; எங்கு
வேண்டுமானாலும் போகலாம். அப்படியிருக்க
என்ன பிரச்னை?’ என்று கேட்டார்.
-
“எனக்கு உடனடியாக மகிழ்ச்சி தேவை. அதை
வாங்க முடியுமா?’ என்றான் செல்வந்தன்.
-
ஞானி அவனைக் கால்பந்து விளையாட்டைப்
பார்க்க அழைத்துச் சென்றார். மைதானத்தை
அடைந்து பந்தயத்தை கவனிக்க ஆரம்பித்தனர்.
இரு அணிகளும் உற்சாகமாக ஆடிக்
கொண்டிருந்தனர்.
-
ஞானி ” எவ்வளவு நன்றாக விளையாடுகிறார்கள்!
ஒருவருக்கொருவர் சளைக்காமல் வெற்றி ஒன்றே
லட்சியமாக விளையாடுவதை பார்க்கவே
ஆனந்தமாக இருக்கிறது’ என்றார்.
-
ஆனால் பணக்காரன் கண்களில் பந்து உதைப்
பட்டு இங்கும் அங்கும் அலைக்கழிக்கப்படுவது
தான் விழுந்தது!
அவன் ஞானியிடம் சொன்னான் “எனது நிலையும்
இந்தப் பந்தைப் போன்றதுதான். வருமான
வரிக்காரர்கள், தொழிலாளர்கள், பிள்ளைகள்
என்று நாலாபக்கமும் இடிதான்!’
-
“சரி, இது வேண்டாம் வேறு இடத்திற்கு போகலாம்’
என்ற ஞானி ஒரு சங்கீதக் கச்சேரிக்குப் போனார்.
அங்கு ஒரு பெண் புல்லாங்குழல் வாசித்துக்
கொண்டிருந்தாள். அவர்கள் அமைதியாக இசையை
ரசித்து மகிழ்ந்தனர்.
-
வழியில் ஞானி கேட்டார் “பந்துக்கும் குழலுக்கும்
என்ன வேற்றுமை?’
-
“இதென்ன கேள்வி? ஒன்று இசைக்கருவி,
மற்றொன்று விளையாட்டுச் சாதனம்!’ என்றான்
வணிகன்.
-
ஞானி விளக்கினார். “இவை இரண்டிற்கும் தேவைப்
படுவது காற்று. பந்து தான் வாங்கிய காற்றைத்
தனக்குள்ளேயே வைத்துக் கொள்கிறது. அதனால்
தான் அது உதைப்படுகிறது.
-
புல்லாங்குழல் உள்வாங்கிய காற்றைத் தகுந்த
இடத்தில், தக்க அளவில் வெளியே விட்டுவிடுகிறது.
அதனால் அற்புதமான இசை உருவாகிறது.
இப்போது புரிகிறதா?’ என்று கேட்டார் ஞானி.
-
செல்வந்தன் பணத்தைத் தன்னிடமே வைத்தக்
கொள்வதில் நிறைவு கிடைக்காது. அதைப்
பாத்திரமறிந்து, தேவையறிந்து,
வினியோகிப்பதில்தான் உண்மையான மகிழ்ச்சியும்,
நிம்மதியும் கிடைக்கும் என்று தெளிவடைந்தான்.
-
——————————————-
- கே. நிருபமா, பெங்களூரு. (மங்கையர் மலர்)