உலகின் செக்ஸியான பெண்ணாக தீபிகா படுகோனே தேர்வு...!

தேர்தல் முடிந்த பின்னும் கருத்துக் கணிப்பு ஜுரம் பத்திரிகைகளிடம் இன்னும் முடியாமலே உள்ளது. ஆனால், இந்த கருத்துக் கணிப்புகள் அரசியலைப் பற்றியது அல்ல, அழகைப் பற்றியது. சமீபகாலமாக நாளிதழ்கள், வார, மாத இதழ்கள் ஏதாவது ஒரு கருத்துக் கணிப்பை வெளியிட்டு ஏதாவது ஒரு பரபரப்பைக் கிளப்பி வருகின்றன. இப்போதுதான் அடுத்த சூப்பர் ஸ்டார் யார் என்ற பஞ்சாயத்து முடிந்தது. அடுத்து மனம் கவர்ந்த நடிகை யார் என்றார்கள்...இப்படி தொடர்ந்து கொண்டேயிருக்கிறது. இதில் அடுத்ததாக உலகின் செக்ஸியான பெண்ணாக தீபிகா படுகோனேவைத் தேர்வு செய்திருக்கிறார்கள். இந்தக் கருத்துக் கணிப்பை ஒரு ஃபேஷன் ஆங்கில இதழ் வெளியிட்டுள்ளது.

கடந்த மூன்று வருடங்களாக பின்னணியில் இருந்த தீபிகா படுகோனே, தொடர்ந்து மூன்று வருடங்களாக இருந்த காத்ரீனா கைப்பை பின்னுக்குத் தள்ளி விட்டு இந்த படத்தைப் பெற்றுள்ளார். இது குறித்து மிகவும் மகிழ்ச்சியடைந்துள்ளார் தீபிகா. “இது ஒரு அழகான ஆரம்பம். குறிப்பாக மக்களுக்காக மக்களால் தேர்ந்தெடுக்கப்படும் ஒன்று இது. ஒரு பெண்ணை மற்றவர்கள் செக்ஸியாக இருக்கிறார் எனச் சொல்வதே ஒரு பெருமைதான். யாராவது ஒருவர் வெற்றி பெற்றுத்தான் ஆகவேண்டும்.

பொதுவாகவே பெண்களை செக்ஸியாக இருக்கிறாய் என்று சொன்னால் அவர்கள் வெட்கப்பட்டு போய் விடுவார்கள், ஏனென்றால் அது அடுத்ததாக செக்ஸ் என்பதுடன் தொடர்புபடுத்திவிடும். பொதுவாக செக்ஸி என்றாலே அது உடலை வெளிச்சம் போட்டுக் காட்டும் விஷயம் என்று சொல்வார்கள். ஆனால், என்னைப் பொறுத்தவரையில் அது ஒருவருடைய குணநலனைப் பொறுத்தது. ஒருவர் நகைச்சுவை உணர்வுடன் இருந்தால் அது செக்ஸி, ஒருவர் தன்னம்பிக்கையுடன் இருந்தால் அது செக்ஸி, உணர்ச்சிவசப்படக் கூடியவர்களாக இருந்தால் அது செக்ஸி,” என பல விளக்கங்கள் தருகிறார் தீபிகா படுகோனே.