தமிழில் 'ஆஃப்லைன் அகராதி'யை இலவசமாக வழங்கும் இ-கலைவன்!

by ராஜு சரவணன் Thu Jun 13, 2013 11:54 am

(டவுன்லோடு இணைப்பு கீழே)

இணையத்தில் உலா வரும் தமிழர்களுக்கும், தமிழ் மாணவர்களுக்கும் உதவும் நோக்கத்தில் ஆஃப்லைனிலேயே இயங்கக்கூடிய ‘ஆங்கிலம் - தமிழ்' அகராதி மென்பொருளை உருவாக்கி இருக்கிறார், திருப்பூரைச் சேர்ந்த சேகர்.

தொழில்நுட்பத் துறையைக் கல்வி நிலையத்தில் படிக்காமல், தனது முயற்சிகளால் தாமாகவேத் தேடிப் பயின்று, இளம் மாணவர்களுக்கு கற்றுதரும் அளவுக்கு முன்னேறி இருக்கிறார், இந்த 40 வயது இ-கலைவன். கோவை - சரவணம்பட்டியில் குமரகுரு கல்லூரிக்கு அருகில், 'இ-கலை' கணினி என்ற தொழில்நுட்ப பயிற்சி மையம் ஒன்றையும் நடத்தி வருகிறார்.

ஓர் ஆண்டு காலம் முழுமையாக உழைத்து, இவர் யுனிகோடில் உருவாக்கி இருக்கும் அகராதியின் பெயர் - ‘களஞ்சியம் அகராதி'.

ஆன்லைனிலும், தொழில்நுட்ப உலகிலும் தாம் கடந்து வந்த பாதையை விவரித்த சேகர், ‘‘நான் பிறந்த ஊர் போத்தம்பாளையம் என்னும் குக்கிராமம். எந்த அடிப்படை வசதிகளும் இல்லாத எங்கள் நெசவு குடும்பம் திருப்பூருக்கு குடிபெயர்ந்தது. அங்கு ஆங்கிலம் மற்றும் தொழில்நுட்பம் சம்பந்தப்பட்ட அறிவை கற்றுக்கொள்ளும் சூழ்நிலை ஏதுவாக இல்லை. இந்நிலையில் வானொலியிலும், பத்திரிகைகளிலும் வரும் அறிவியல் சம்பந்தமான் கட்டுரைகளை கேட்டும், படித்தும் ஆராய்ந்தும் திறமையை வளர்த்துக்கொண்டேன்.

எங்கள் கிராமத்து பள்ளியில் நாங்கள் ஆசிரியர்கள் வந்தால் "காலை வணக்கம் ஐயா'' என்றும், அட்டென்டன்ஸ் எடுக்கும்போது "உள்ளேன் ஐயா" என்றும் 10 வருடங்கள் பழகிய நாக்கு, நகரத்துக்கு வந்து “Good morning Sir”, "Present Sir”-ருக்கு பழக பல மாதங்கள் ஆகிவிடும். அந்தப் பள்ளி மாணவர்களிடம் கேட்டால் அவமானமாகிவிடும் என்பதால் அவர்களிடமும் கேட்கமாட்டோம். Dictionary என்பது படிக்கும் காலம் வரை ஒரு சிலருக்கு மட்டுமே கிடைக்கும். காரணம் அப்பொழுதெல்லாம் வாத்தியார் எழுதி கொடுக்கும் நோட்டு புத்தகங்கள்தான் வீட்டில் வாங்கி தருவார்கள். அதில் Dictionary இருக்காது.

கிராமத்தில் உள்ளவர்களுக்கு எப்படி தொடங்கவேண்டும், எப்படி படிக்க வேண்டும் என்று விளக்கமளிக்கூடியவர்கள் குறைவாக உள்ள காரணத்தால், மாணவர்கள் புரியாமல் படிப்பதனால் கால விரயத்துடன் படித்தது பயனற்றதாக ஆகிவிடுகிறது. அதைப் போக்க அனைத்தும் அடங்கிய எளிமையான ஒரே ஒரு நூல் தமிழில் இருந்திருந்தால் பயனுள்ளதாக இருந்திருக்கும்.

ஆங்கிலத்தில் கணினி, மருத்துவம் மற்றும் தொழில் நுட்ப அறிவுள்ள புத்தகங்கள் ஏராளம். அவற்றில் வரும் வார்த்தைகளை புரிந்துகொள்வது மாற்று மொழிக்காரர்களுக்கு அதிலும் தமிழ் மொழி கொண்டவர்களுக்கு எப்போதுமே சவால்தான். இன்னும் நிறைய பேருக்கு உச்சரிப்பில் "Message”- “மெஜேஜ்'' ஆகிவிடும், “Fan" - “ஸ்பேன்" ஆகிவிடும்.

இன்றைய கணினி பயன்பாட்டில் இணையத்தில் இருந்து ஏராளமாக நமக்கு வேண்டிய புத்தகங்களை PDF, EBUP போன்ற கோப்புகளில் இலவசமாக Download செய்து கொண்டு படிக்கலாம். ஆனால், இங்கும் பிரச்னை வார்த்தைகளுக்கான பொருள்தான். இணையம் இருந்தால் இணையத்தில் தேடிக்கொள்ளலாம். அதில் நமது கவனமும், நேரமும் வீணாகும். இன்டர்நெட்டில் எலி பிடிக்கபோய் குரங்கை பிடித்து வருவோம்.

பத்தாவது வரை தமிழில் படித்தேன். அதுவரை தமிழில் கற்றதால் ஆங்கிலம், அறிவியல் கணினி சம்பந்தபட்ட வார்த்தைகள் மிகப் புதிதாகக இருந்தன. அதற்கு விளக்கம் தேடி நூலகம் சென்று படிப்பேன். இருந்தபோதும் ஒரு முழுமையாக என் தேடல்களுக்கான தீர்வுகள் கிடைக்கவில்லை. இதை அனைத்தையும் ஒரே இடத்தில் கொண்டு வர வேண்டுமென்ற என்னுடைய கனவு கணினியில் சாத்தியம் என்பது புரிந்தது. இது சம்பந்தமான தேடல்களில் கணினி மொழிகளை பலவற்றையும் கற்றுக் கொள்ளும் ஆர்வம் பிறந்தது.

நான் கணினியில் புரோகிராமிங் கற்றுக்கொள்ள PDF கோப்புகளில் உள்ள ஆங்கில புத்தகங்களை படிக்கும்போது ஏற்பட்ட இடர்கள் ஏராளம். “For loop”, “If condition”-க்கு எல்லாம் பொருள்தேடியவன் நான். இதைப்போன்ற இடர்பாடுகள் தமிழில் படிப்பவர்களுக்கு இருக்கக்கூடாது என்று அவர்களுக்கு பயன்படும் வகையில் ஒரு மென்பொருளை உருவாக்கவேண்டும் என்கிற எண்ணம் உதித்தது. English-English ஏராளமான அகராதிகள் உண்டு. ஆனால், தமிழில் ஒரு சிலவே உண்டு. அவையும் கால மாற்றத்திற்கு ஏற்ப ஒருங்கு குறிக்கு (Unicode) மாற்றமடையவில்லை, அது தவிர, புதிய Windows 7, Windows 8 போன்ற நவீன இயங்கு தளங்களில் இயங்காது. தமிழில் Unicode அகராதிகள் ஆன்லைனில் உண்டு. ஆனால் Desktop-ல் இயங்கும் அகராதி இல்லை. இதன் விளைவாக உருவானதுதான் ‘களஞ்சியம் அகராதி'.

என்னுடைய கணினி அனுபவ அறிவைப் பார்த்து ஒரு சில மென்பொருள் கம்பெனிகள் அழைத்தபோதும், எனக்கு ஆங்கில அறிவு போதிய அளவு இல்லாமையால் அந்த வாய்ப்புகள் தவறிவிட்டன. என்னைப் போல சிரமப்படும் மாணவர்களுக்கு என்னால் இயன்ற வரையில் HTML, CSS, Javascript, Java, C, C# , SQL, Animation, Electronics மற்றும் Embedded Project போன்றவற்றை தமிழில் மாணவர்களுக்கு கற்றுத்தருகிறேன்.

கல்வியில் உயர்ந்த சமுதாயமே உலகின் உயர்ந்த சமுதாயம். அந்த உயர்ந்த நோக்கோடு தான் தமிழக அரசு அனைத்து மாணாக்கர்க்கும் மடிக்கணினி தந்துள்ளது. அதனால் மாணவர்களின் அறிவு மிகவும் மேம்பாடு அடையும். அதற்கு கூடுதல் உந்து சக்தியாக இருக்க கல்வி பயன்பாட்டிற்கான இந்த களஞ்சியம் அகராதி இலவசமாக இணையத்தில் Download செய்துகொள்ளலாம்.

இன்றைய இளைஞர்களுக்கும், இளைஞிகளுக்கும் படிப்பதற்கு ஏராளமான வாய்ப்புகள் உள்ளன. அதேபோல் படிப்பை கெடுப்பதற்கும் நிறைய வாய்ப்புகள் உள்ளன. இருந்தாலும் நம் ஒவ்வொருவருக்கும் இந்த சமுதாயத்திற்கும், உலகிற்கும் செய்ய நிறைய கடமைகள் இருக்கின்றன என்பதை கருத்தில் கொண்டால் வெற்றியடைவது என்பது நிச்சயம். இந்த உலகில் வெறும் 2% மட்டுமே கண்டுபிடிக்கப்பட்டுள்ளன. மீதி 98% Dark Mater-ராக இன்னும் கண்டுபிடிக்கபடாமல் உள்ளன. அதில் வருங்காலத்தில் தமிழகத்தின் கண்டுபிடிப்பின் பங்கு அதிகமாக இருக்கட்டும்.

எனக்கு பிடித்த பொன்மொழி உங்களுக்கும் நிச்சயம் பிடிக்கும். "என்னை தலை குனிந்து படி, உன்னை தலை நிமிரச் செய்வேன்- என்று சொன்னது புத்தகம்."

இந்த உலகம் என்பது நமக்கு சொந்தமல்ல. இதை நம் எதிர்கால சந்ததியிடம் இருந்து கடன் வாங்கியுள்ளோம். அதை பத்திரமாக, நாம் அனுபவிக்கும் இத்தனை வசதிகளுடனும் அவர்களுக்கு ஒப்படைக்க வேண்டும். அதுதான் நம் ஒவ்வொருவருக்கும் இருக்கும் இப்போதுள்ள தலையாய கடமை. எனவேதான் எனது ஆஃப்லைன் அகராதியை இலவசமாகவே வழங்குகிறேன்'' என்றார் சேகர்.

களஞ்சியம் அகராதியின் சிறப்புகள்:

* ஒருங்குகுறி (Unicode) கொண்டு உருவாக்கப்பட்டது.

* 2 லட்சத்துக்கும் மேற்பட்ட தனிப்பட்ட வார்த்தைகளுக்கான பொருள் கொண்டது.

* 40 லட்சத்துக்கும் மேற்பட்ட பொருள் தரும் இணைப்பு வார்த்தைகள்.

* ஆங்கிலம் - தமிழ், ஆங்கிலம் - ஆங்கிலம், தமிழ் - தமிழ் மற்றும் பல்கலைகழகக் பேரகராதி ஆகிய அனைத்து அகராதிகளையும் உள்ளடக்கியது.

* 3000-க்கும் அதிகமான படங்கள்.

* உலக நாடுகளின் கண்டம், வரைபடம், கொடி கொண்டது.

* தமிழில் (Built-in Tamil Typing) தட்டச்சு செய்து வார்த்தைகளுக்கு பொருள் தேடும் வசதி.

* தமிழிலும், ஆங்கிலத்திலும் படித்துச் சொல்லும் (LH-Michelle & LH-Michael).

* கணினியில் எங்கிருந்தும் ஒரு வார்த்தையை தேர்வு செய்துகொண்டு Shortcut key (Ctrl + ~) அழுத்தினால் வார்த்தைக்கான பொருள் கிடைக்கும்.

* தானியக்க இருமொழித் தேடுதல் (Automatic encoding)

* புதிய வார்த்தை, பொருள் மற்றும் படங்களை பயனாளரே இணைத்து கொள்ளும் வசதி.

* Free Software (இலவச மென்பொருள்)

* தமிழில் முதல் மேஜைபயன்பாட்டு (Windows Desktop) ஒருங்குகுறி (Unicode) அகராதி.

* Destop-ல் விரும்பிய வார்த்தைகளை விரும்பிய வண்ணங்களில், எழுத்துருக்களில் அமைத்துக் கொள்ளலாம்.

* Windows XP, Windows 7, Windows 8 சார்ந்த இயங்கு தளங்களில் இயங்கும்

சேகர் உருவாக்கியுள்ள களஞ்சியம் அகராதியை டவுன்லோடு செய்ய க்ளிக்க வேண்டிய இணைப்பு - http://www.ekalai.com/kalanjiam/download/

நன்றி கல்வி-விகடன்

by **மதுமிதா** Thu Jun 13, 2013 12:02 pm

by **மாணிக்கம் நடேசன்** Fri Jun 14, 2013 5:36 am

மிக்க நன்றி ஐயா. இத்தகவலை இங்குள்ள தமிழ் பள்ளிகளுக்கு தெரிவிக்கிறேன்.
பலருக்கும் பயனுள்ளதாக அமையட்டும்.

by ராஜு சரவணன் Fri Jun 14, 2013 5:59 am

மாணிக்கம் நடேசன் wrote:மிக்க நன்றி ஐயா. இத்தகவலை இங்குள்ள தமிழ் பள்ளிகளுக்கு தெரிவிக்கிறேன்.
பலருக்கும் பயனுள்ளதாக அமையட்டும்.

வரவேற்கிறேன் ஐயா
உங்களின் உதவிக்கு எனது விருப்பம்

இது போல் தமிழுக்கு என்று தனது நேரத்தை செலவழித்து எந்த எதிர்பார்ப்பும், பணமும் இல்லாமல் ஒரு அகராதி பயன்பாடை உருவாக்கி கொடுடித்திருக்கும் அன்பர் சேகர் அவர்களின் சேவை உண்மையில் நாம் அனைவரும் வரவேற்கதக்க ஒன்று. அவருடைய பயன்பாடு(Application) நமக்கு உதவுகிறதோ இல்லையோ.. அவருக்கு ஒரு நன்றி மட்டுமாவது தெரிவிக்கலாமே. இவர்களை போன்றோரை நாம் நிச்சயம் ஊக்கப்படுத்தவேண்டும் என்பது என் விருப்பம்.

நன்றி சேகர் உங்களின் பணி சிறக்க எனது வாழ்துகள் புன்னகை

by ராஜு சரவணன் Tue Aug 06, 2013 7:59 pm

நண்பர் சேகருடன் இன்று பேசினேன். போனை எடுத்தவுடன் வணக்கம் சொல்லுங்கள் என்ற கனிவான குரல். அவருடைய பேச்சில் அவ்வளவு மரியாதை. மனிதர் பொறுமையாக நான் கேட்ட கேள்விகளுக்கு அவருடைய பயன்பாட்டை திறக்க சொல்லி போனில் விளக்கமாக பதில்லத்தார். உண்மையில் இந்த பயன்பாட்டை அவர் ஒருவரே தன்னந்தனியாக உழைத்து உருவாக்கிய ஒன்று. இந்த பயன்பாட்டில் அவர் தமிழ்-ஆங்கிலம்,தமிழ்-தமிழ், ஆங்கிலம்-ஆங்கிலம் போன்ற பல வசதிகளுடன் இந்த அகராதியை உருவாகியிருக்கிறார்.

நான் இந்த பயன்பாட்டை இன்று தான் நிறுவி பயன்படுத்தி பார்தேன். உண்மையில் பல பெரிய நிறுவனங்கள் காசுக்கு உருவாகும் பயன்பாட்டை காட்டிலும் அருமையான ஒன்றாக இருக்கிறது. இவர் இந்த டெஸ்க்டாப் அகராதியை எந்த கட்டணமும் இன்றி இலவசமாக கொடுத்துள்ளார். PALS, LIFCO போன்ற அகராதிகள் இருந்தாலும் இதன் சேவை அற்புதமாக உள்ளது.

நான் அவரிடம் பேசும் போது நம் ஈகரை தளத்தை பற்றி கூறினேன். அவரும் நம் தளம் பற்றி அறிந்திருந்தார். நல்ல பல தகவல்களை பரப்பும் நம் ஈகரைக்கும் வாழ்துக்களை கூறினார்.

இவர் தற்போது மாணவர்களுக்கு கணணி நிரல் சம்பந்தமான பயன்பாடு ஒன்றை உருவாக்கி வருவதாக கூறினார். இவர் Chip level programming நிரல் எழுதுவதில் வல்லவர். இவர் தற்போது BE,ME கணணி துறை மாணவர்களுக்கு பயிற்சியும் அளித்து வருகிறார்.

இவ்வளவு காரியங்கள் செய்யும் இவர் படிப்பு என்ன தெரியுமா... சொன்னால் ஆட்சர்யபடுவீர்கள். இவர் SSLC மட்டுமே முடித்தவர். இவருடைய படிப்பு வேண்டுமானால் குறைவா இருக்கலாம், ஆனால் இவர் செய்யும் சேவைகள் பட்டபடிப்பு முடித்து வெளிநாட்டுகாரனுக்கு உழைத்து கொடுக்கும் நம்மூர் சாப்ட்வேர் பொறியாளர்களின் சேவைகளுக்கு மேலானது.

எத்தனை பேர் தமிழுக்காக தான் படித்த படிப்பை வைத்து ஒரு சிறு சேவையாவது செய்கிறார்கள். கண்டிப்பா இல்லை என்று தான் கூறுவேன். இவரை போன்றோரை நாம் கண்டிப்பா ஊக்கப்படுத்த வேண்டும். முடிந்தால் அவருக்கு ஒரு வாழ்த்து எஸ்‌எம்‌எஸ் அனுப்புங்கள் அல்லது போனில் அவருக்கு வாழ்த்து தெரிவியுங்கள்.

by பூவன் Tue Aug 06, 2013 8:13 pm

அண்ணா நல்ல பயனுள்ள அகராதி நானும் இதை நிறுவி கொள்கிறேன் சூப்பருங்க

சேகர்

இவரின் சேவை போற்றுவோமாக , மேலும் பல அறிய சாதனைகள் புரியட்டும் இவர் .

by ராஜு சரவணன் Tue Aug 06, 2013 8:21 pm

பூவன் wrote:அண்ணா நல்ல பயனுள்ள அகராதி நானும் இதை நிறுவி கொள்கிறேன்

சேகர் இவரின் சேவை போற்றுவோமாக , மேலும் பல அறிய சாதனைகள் புரியட்டும் இவர் .

நன்றி பூவன்.... மற்றவர்களுக்கும் முடிந்தால் தெரிவியுங்கள்.... மனிதர் கஷ்டப்பட்டு தமிழுக்காக உழைக்கும் இவருக்கு நாம் செய்யும் உதவி இதுவென இருக்கட்டுமே புன்னகை

by யினியவன் Tue Aug 06, 2013 9:46 pm

சேகர் அவரின் விளக்கமே அருமை - நல்ல பகிர்வு டெக்லஸ்.

by ராஜு சரவணன் Wed Aug 07, 2013 11:03 am

யினியவன் wrote:

சேகர் அவரின் விளக்கமே அருமை - நல்ல பகிர்வு டெக்லஸ்.

இவர் நம்மிடம் வைக்கும் ஒரே கோரிக்கை, இதை பற்றி தெரியாத/தேடிக்கொண்டிருக்கும் பயனாளர்களுக்கு முடிந்தவரை தெரியப்படுத்துங்கள் அதுவே போதும் என்கிறார். அதனால் தான் இந்த பழய பதிவை மேலே கொண்டுவந்தேன்.